Türkiyəni silkələyən antikorrupsiya əməliyyatında oğlanları həbs edilən nazirlər – iqtisadiyyat naziri Zəfər Çağlayan və daxili işlər naziri Müəmmər Gülər istefa verib.
“Hürriyet”in yazdığına görə, Pakistan səfərindən dönən baş nazir Rəcəb Tayyib Ərdoğan gecə saatlarında Keçiörəndəki evində bəzi nazirləri qəbul edib. Güman ki, nazirlərin istefası da həmin görüşdə qərarlaşdırılıb.
Nazirlər istefalarına dair yazılı açıqlama da yayıblar.
Zəfər Çağlayan:“Dekabrın 17-də başlayan əməliyyatın hökumətimizə, partiyamıza və ölkəmizdə qarşı kirli bir oyun olduğu çox açıq şəkildə ortadadır. Yaxın iş yoldaşlarımın və övladımın də daxil edildiyi bu oyunu pozmaq və həqiqətin ortaya çıxmasını təmin etmək üçün iqtisadiyyat naziri vəzifəsindən ayrılıram”.
Müəmmər Gülər: “Oğlumun daxil edildiyi bu çirkin oyunu pozmak və gerçəklərin daha açıq şəkildə ortaya çıxmasına imkan yaratmaq üçün istefa verdiyimi həmin gün (əməliyyatın həyata keçirildiyi 17 dekabr – red.) sayın baş nazirimizə şifahi şəkildə bildirmişdim. İstefa ərizəmi 25 dekabr 2013 tarixində yazılı olaraq təqdim edirəm”.
Türkiyə mediası xəbər verir ki, kulislərdə gəzən söhbətə görə, bu əməliyyata görə oğlu istintaqa cəlb olunan ətraf mühit və şəhərsalma naziri Ərdoğan Bayraqdar da istefa verəcək.
