Yeni qərar ölkəyə miqrant axınını gücləndirə bilər
Hikmət Hacızadə: «Miqrantlara qarşı sərt münasibət sərgiləməklə, Rusiya hakimiyyəti millətçilərin simpatiyasını qazanmaq istəyir»
Rusiya hökuməti miqrasiya siyasətini sərtləşdirməkdə davam edir. Rusiya mətbuatının yazdığına görə, hökumət 2014-cü ildən etibarən əcnəbilərin bazarlarda, çadırlarda və apteklərdə işə alınmasını qadağan edəcək. Bildirilir ki, müvafiq sərəncamı Rusiyanın baş naziri Dmitri Medvedev dekabrın 19-da imzalayıb.
Sərəncamın icra olunmasına sosial müdafiə nazirliyi nəzarət edəcək. Ekspertlər hesab edir ki, bu qərar Rusiyada yaşayan soydaşlarımıza ciddi zərbə olacaq və ölkəyə miqrant axınını gücləndirəcək. Məlumatlara görə, artıq 20 mindən artıq soydaşımız Rusiyadan deportasiya olunub.
Bəs, baş verənlər doğurdanmı ölkənin miqrasiya siyasəti ilə bağlıdır? Bu hadisələri siyasi təzyiq kimi qiymətləndirmək olarmı?
Siyasi ekspert Hikmət Hacızadə bildirdi ki, baş verənləri Azərbaycana təzyiq kimi qiymətləndirmək olar və hakimiyyət ölkə daxilində müxtəlif islahatlar aparmalıdır: “Baş verənlərdə 3 məqam var. Birinci, rəsmi elan olunmuş miqrasiya siyasətidir. Yəni hökumət göstərmək istəyir ki, biz miqrasiya siyasətini daha səmərəli, daha müasir standartlara uyğun həyata keçirmək istəyirik. Ikinci, Azərbaycana təzyiq göstərməkdi ki, bu da hamıya məlumdu. Rusiya istəyir ki, Azərbaycan Gömrük Irrifaqına qoşulsun, Avropa Birliyindən uzaq olsun. Üçüncü isə Rusiyada millətçilərin əcnəbilərə münasibətidir. Bu gün rus cəmiyyətində böyük millətçilik dalğası başlayıb. Rusiya hakimiyyəti də əhalinin etirazını əngəlləmək üçün onlarla eyni mövqedən çıxış edir. Yəni Putin millətçilərə deyir ki, biz də sizin kimi düşünürük, biz də əcnəbilərin fəaliyyətini məhdudlaşdırırıq. Və əsas məsələ də məhz 3-cü, millətçilərlə bağlı məsələdi. Təbii ki, bu faktlar ölkəyə miqrant axınını sürətləndirə bilər və Azərbaycanın bu baxımından Rusiyaya hansısa təzyiq mexanizmi yoxdur. Nə qədər ki, Putinin komandası iş başındadır, bu təzyiqlər davam edəcək. Azərbaycan hakimiyyəti yalnız ölkəyə qayıdan soydaşlarımızın yaşayışını yaxşılaşdırmaq, sosial problemlərin qarşısını almaq üçün islahatlar həyata keçirməlidir, azad sahibkarlığı inkişaf etdirməlidir”.
Ilham Hüseyn
