İstefaya gedənlərdən biri üsyan etdi: “Lazımdırsa, baş nazir istefa versin” VİDEO
«Böyük rüşvət» əməliyyatı çərçivəsində ikinci həbs dalğası başlayır
Prokurorun həbslər və axtarışlar üçün imzaladığı yeni sanksiyada tanınmış adların yer aldığı bildirilir
Türkiyəni silkələyən anti-korrupsiya əməliyyatına görə Ərdoğan hökumətində gözlənilən istefa qərarları nəhayət, verildi. Adı bu qalmalaqda hallanan üç nazir dünən vəzifələrindən istefa verdiklərini elan etdilər. Bunlar oğlanları həbs olunan iqtisadiyyat naziri Zəfər Çağlayan, daxili işlər naziri Müəmmər Gülər və oğlu istintaq altında olan ətraf mühit və şəhərsalma naziri Ərdoğan Bayraqdardır. “Hürriyet”in yazdığına görə, Pakistan səfərindən dönən baş nazir Rəcəb Tayyib Ərdoğan gecə saatlarında Keçiörəndəki evində bəzi nazirləri qəbul edib. Güman ki, nazirlərin istefası da həmin görüşdə qərarlaşdırılıb.
“Bu oyunu pozmaq üçün nazir vəzifəsindən gedirəm”
Zəfər Çağlayanla Müəmmər Gülər istefalarına dair yazılı açıqlama yayıblar. Zəfər Çağlayanın açıqlaması belə olub: “Dekabrın 17-də başlayan əməliyyatın hökumətimizə, partiyamıza və ölkəmizə qarşı çirkli bir oyun olduğu çox açıq şəkildə ortadadır. Yaxın iş yoldaşlarımın və övladımın da daxil edildiyi bu oyunu pozmaq və həqiqətin ortaya çıxmasını təmin etmək üçün iqtisadiyyat naziri vəzifəsindən gedirəm”.
Müəmmər Gülər isə istefasını belə əsaslandırıb: “Oğlumun daxil edildiyi bu çirkin oyunu pozmaq və gerçəklərin daha açıq şəkildə ortaya çıxmasına imkan yaratmaq üçün istefa verdiyimi həmin gün (əməliyyat həyata keçirildiyi 17 dekabr) hörmətli baş nazirimizə şifahi şəkildə bildirmişdim. Istefa ərizəmi 25 dekabr 2013 tarixində yazılı olaraq təqdim edirəm”.
“Lazımdırsa, baş nazir istefa versin!”
Ərdoğan Bayraqdar isə istefa qərarını Türkiyə siyasi gündəmində bomba kimi partlayan sözlərlə açıqlayıb. Bayraqdar həmkarlarının istefasından sonra nə düşündüyünə dair NTV-nin sualını canlı yayımda cavablandırarkən baş nazir Ərdoğanın istefa verməli olduğunu deyib. Bayraqdar bildirib ki, cinayət araşdırmasına cəlb olunan abadlaşdırma layihələri baş nazir Rəcəb Tayyib Ərdoğanın təsdiqləməsilə həyata keçirilib. Buna görə özünə olan basqıları qəbul edə bilməz.
“Bu gün bizə bir istefa mətni göndərildi. Bunu yanlış sayıram. Xeyirli olsun” deyən Bayraqdar fikrini belə davam etdirib: “Mənə istefa basqısı yapılmasını qəbul etmirəm. Lazımdırsa, baş nazir istefa versin”.
Bununla belə, o, açıqlamasının sonunda nazir vəzifəsindən və millət vəkilliyindən istefa verdiyini elan edib.
Xatırladaq ki, Türkiyəni silkələyən “böyük rüşvət” əməliyyatında Zəfər Çağlayanın oğlu Saleh Kaan Çağlayan, Müəmmər Gülərin oğlu Barış Gülər həbs olunub. Ərdoğan Bayraqdarın oğlu Abdullah Oğuz Bayraqdar isə ilk günlərdə saxlanılıb, sonradan istintaq altında qalmaq şərtilə sərbəst buraxılıb. Hər üç nazir özlərinin və oğlanlarının günahasız olduğunu bəyan ediblər.
“Allah, peyğəmbər deyəcəksən, amma adın kasetlərlə, təxribatlarla anılacaq”
Türkiyənin baş naziri Rəcəb Tayyib Ərdoğan Ədalət və Inkişaf Partiyasının (AKP) vilayət təşkilatlarının rəhbərlərilə keçirdiyi müşavirədə növbəti dəfə “böyük rüşvət əməliyyatından danışıb: ”Doqquz gündür bir əməliyyat həyata keçirilir. Adına “korrupsiya və rüşvət əməliyyatı” deyildi, daha sonra “tarixin ən böyük korrupsiya əməliyyatı” deyildi. Istintaqın gizli aparılmasına baxmayaraq, mediaya mütəmadi məlumat sızdırıldı. Bizim üzərimizə düşən vəzifə bu orqanları təmizləməkdir. Insanları ləkələməyə heç kimin haqqı yoxdur”.
Ərdoğan bildirib ki, hökumətə qarşı həyata keçirilən bu əməliyyatın beynəlxalq miqyası var: “Gəzi Parkı hadisələrində açıq bir xəyanətə şahid olduq. O zaman hökumətimizin may ayında əldə etdiyi uğurlar hədəf alınmışdı, indi isə kürd probleminin həlli prosesi hədəf alınıb. Bəzi dairələr, qurumlar, mərkəzlər bizə qarşı qurulan bu tələdə maşa kimi istifadə edildilər. Biz bu medianı, bu təşkilatları illərdir çox yaxşı tanıyırıq. Açıq deyirəm, son olay göstərdi ki, Türkiyədə öz dövlətinin deyil, başqalarının mənafeyini düşünən, vətənə xəyanət içərisində olan, başqalarının casusu olan media qurumları və təşkilatlar var. Dövlətin içində təəssüf ki, belələri mövcuddur. Hökumət olaraq biz bunun üzərinə gedirik”.
Ərdoğan bir daha nurçular hərəkatını və onların lideri Fətullah Güləni nəzərdə tutaraq dövlətin içində qeyri-qanuni paralel təşkilatlanmalar olduğunu vurğulayıb: “Bir hərəkat, bir ideya ən əvvəl əxlaq sahibi olmaq məcburiyyətindədir. Hər yolu mübah görən, hər yolu özlərinə rəva görən bir hərəkat əsla uğur qazana bilməz. Bir tərəfdən ”Quran”, Allah, peyğəmbər deyəcəksən, amma adın kasetlərlə, təxribatlarla anılacaq. Kimsənin bu əziz dindən bu cür istifadə etməyə haqqı yoxdur. Bu təxribatlar Baykala, Dəmirələ, Ərbakana da quruldu. Ən sərt cavabı verməsək, bənzərləri qurulmağa davam edəcək. Biz bu çirkin əməliyyatdan güclənərək çıxacağıq”.
Keçmiş daxili işlər naziri AKP-dən istefa verdi
Daha bir millət vəkili AKP sıralarından istefa verib. Keçmiş daxili işlər naziri, Ordu millət vəkili Idris Naim Şahin dünən axşam saatlarında partiya sıralarından istefa verdiyini açıqlayıb. Anti-korrupsiya əməliyyatı keçirilən 17 dekabr tarixindən bir gün əvvəl – dekabrın 16-da isə keçmiş futbolçu Hakan Şükür də AKP sıralarını tərk etmişdi.
Yeni nazirlərin adları açıqlandı
Türkiyənin baş naziri Rəcəb Tayyib Ərdoğan hökumətin tərkibində dəyişikliklər edib. Dəyişikliklər Türkiyə vaxtı ilə dekabrın 25-i saat 23 radələrində mətbuata açıqlanıb.
Ərdoğan kabinetdə 10 naziri əvəzləyib. Dəyişikliklərlə bağlı açıqlamasında baş nazir bildirib ki, dekabrın sonlarında belə bir addımın atıla biləcəyi əvvəlcədən deyilmişdi. Son hadisələrdən sonra isə (rüşvət və korrupsiya əməliyyatı – red.) hökumət üzvlərindən bir neçəsi istefa verib, bir neçəsi qarşıdakı seçkilərdə namizəd olacaqları üçün görəvlərindən ayrılıblar. Yeni təyin olunan nazirləri prezident Abdulla Gülün də təqdir etdiyini bildirən Ərdoğan onların adlarını sadalayıb. Beləliklə:
Baş nazirin müavini – Əmrullah İşlər
Ədliyyə naziri – Bəkir Bozdağ
Ailə və sosial siyasət naziri – Ayşənur İslam
İqtisadiyyat naziri – Nihat Zeybək
Ətraf mühit və şəhərsalma naziri – İdris Güllücə
Gənclər və idman naziri – Akif Çağatay Kılıç
Daxili işlər naziri – Əfqan Ala
Nəqliyyat naziri – Lütfü Əlvan
Sənaye və texnologiya naziri – Fikri İşıq
Avropa Birliyi ilə əlaqələr naziri – Mövlud Çavuşoğlu
AKP millət vəkilindən baş nazirə sərt tənqid
Türkiyənin keçmiş mədəniyyət və turizm naziri, Ədalət və Inkişaf Partiyasının (AKP) Izmir millət vəkili Ərtoğrul Günay baş nazir Rəcəb Tayyib Ərdoğanı sərt tənqid edib. Ə.Günay “Hürriyet” qəzetinə açıqlamasında R.T.Ərdoğanın Pakistandan qayıtdıqdan sonra hava limanında tərəfdarları qarşısında etdiyi çıxışı üzüntü ilə izlədiyini söyləyib: “Bir neçə gündür hörmətli baş nazir ölkə xaricində idi. Hadisələri daha soyuqqanlı təhlil etmək üçün fürsət əldə etdiyini və cəmiyyətin bütün təbəqələrini rahatladacaq şeylər söyləyəcəyini düşünürdüm. Təəssüf ki, belə bir çıxış olmadı. Öncəki həftə Qara dəniz bölgəsində söylədiklərini təkrarladı. Bir neçə nazir və nazir övladı ilə bağlı konkret iddialar və bəzi görüntülər haqda şübhələrimizi dağıda biləcək heç nə söyləmədi. Bank müdirinin evində tapılan, ayaqqabı qutularında gizlədilmiş milyonlara toxunmadı. Cəmiyyətin gözləntiləri özünü doğrultmadı. AKP-yə səs vermiş və verməmiş milyonlarla vətəndaşımız kimi, mən də baş nazirin açıqlamalarını böyük bir üzüntü və hüznlə dinlədim”.
İşdən çıxarılan polislər hökuməti məhkəməyə verir
Türkiyədə 17 dekabr korrupsiya və rüşvət əməliyyatı sonrası vəzifələrindən kənarlaşdırılan və yerləri dəyişdirilən polis əməkdaşları məhkəməyə ikili iddia ilə müraciət etməyə hazırlaşırlar. Bu xəbəri “Bu gün” qəzeti yayıb. Məhkəməyə həm vəzifələrinə qaytarılmaq, həm də zərərçəkən kimi dəyən maddi-mənəvi zərərə görə təzminat ödənilməsi iddiası təqdim olunacaq. Polislər Birliyinin rəhbəri Faruk Sezer zərərçəkən durumda olan ictimai-asayiş əməkdaşlarının zərərlərini ödəməkdən əlavə, bütün hüquqlarının bərpası üçün “tam məhkəmə” prosesinə hazırlaşdıqlarını bildirib. F.Sezer qeyd edib ki, vəzifədən çıxarılan və yerləri dəyişdirilən polislər 60 gün ərzində dairə məhkəmələrinə müraciət etdikləri halda vəzifələrinə qayıtmaq hüququna malikdir. O əlavə edib ki, vəzifələrinə bərpa iddiasını qaldıran polislər həm də maddi və mənəvi zərərlə bağlı iddia qaldıra biləcəklər: “Bu, hüquqda ”tam məhkəmə” prosesi kimi təsbitini tapır. Ictimai-asayiş mənsublarının hər hansı əsas göstərilmədən iş yerinin dəyişdirilməsi maddi zərərlə yanaşı, bu şəxsləri xalqın gözündə aşağılamaq kimi, mənəvi ziyana da məruz qoyur ki, bu da diqqətdən kənarda qala bilməz”.
Prokuror tədbiri əldən vermir
“Böyük rüşvət əməliyyatı”nı araşdıran prokuror Zəkəriyyə Öz əməliyyatla bağlı Istanbul Polis Idarəsindəki orijinal qeydləri özü ilə prokurorluğa aparıb. Z.Öz əməliyyatda şübhəli şəxs kimi saxlanılanların ifadələrinin dəyişdirilməsindən ehtiyat edir. O, şübhəlilərə aid telefon dinləmələrinin və səsyazmaların surətlərini almaqdan imtina edərək, yalnız orijinallarla maraqlanıb. Prokuror orijinal qeydlərin möhürlü zərflə mühafizə altına alınmasına göstəriş verib. Çünki şübhəli şəxs kimi saxlanılanların yaxınları səsyazmaların dəyişdirilməsi, bu səsyazmalara əlavələr edilməsi kimi ittihamlar səsləndiriblər. Amma Öz belə bir ehtimalı rədd edib.
Dünən o da məlum olub ki, Türkiyədə rüşvət, korrupsiya, çirkli pulların yuyulması ittihamı ilə bağlı ikinci həbs dalğası başlaya bilər. Bu barədə Türkiyənin “Radikal” qəzeti yazıb. Prokurorun həbslər və axtarışlar üçün imzaladığı sanksiyanın Istanbul Əmniyyət Müdirliyinə (polis idarəsi) göndərildiyi bildirilir. Sanksiyada ictimaiyyətin yaxından tanıdığı şəxslərin adlarının olduğu xəbər verilir. Məlumatlara görə, siyahıda 30 adamın adı var. Polisin bu sanksiyaya əməl edib-etməyəcəyi sual altındadır. Çünki 17 dekabrda həyata keçirilən həbslərdən sonra Istanbul Əmniyyət Müdirliyində ciddi kadr dəyişiklikləri aparılıb. Əmniyyət müdiri (polis rəisi) başda olmaqla, bir çox şöbə müdiri vəzifəsindən uzaqlaşdırılıb.
