Nazirin intibah dövrü adlandırdığı son 10 il ölkəyə nə verib?
Nemət Əliyev: «Bu illər ərzində Azərbaycanda baş verənlər əhalinin sosial-iqtisadi vəziyyətinin yaxşılaşdırılması istiqamətində cərayan etməyib»
Maliyyə naziri Samir Şərifov Bakıda keçirilən “Azərbaycan 2013-2018: Yeni hədəflərə doğru” konfransında son 10 ili Azərbaycanın intibah illəri kimi səciyyələndirə bilicəklərini deyib. APA-nın məlumatına görə, nazir bildirib ki, ötən müddətdə Azərbaycan xaricdən investisiya alan ölkədən xaricə investisiya yatıran və kosmosa peyk çıxaran ölkəyə çevrilib. O eyni zamanda iqtisadiyyatda artımın müşahidə edildiyini, valyuta ehtiyatlarının artdığını, əmək haqlarının həcmində artım olduğunu, yoxsulluğun səviyyəsinin aşağı düşdüyünü deyib. Samir Şərifovun bu açıqlaması birmənalı qarşılanmır.
Iqtisadçı-ekspert Nemət Əliyev həqiqətən də son illərdə ərzində müəyyən dəyişikliklərin baş verdiyini deyir. Ilk baxışdan diqqəti cəlb edən səhiyyə obyektlərində təmir işlərinin aparılması, məktəblərin, hündürmərtəbəli binaların tikintisidir. Bu baxımdan birmənal şəkildə heç bir dəyişikliyin baş vermədiyi demək yanlışdıq olardı. Amma nəzərə almaq lazımdır ki, hər bir dəyişikliyi insan naminə edilməlidir. Dəyişikliyin istiqamətini müəyyən etmək üçün onun mahiyyətini düzgün dəyərləndirmək, onun insan həyatına nə dərəcədə adekvat olduğunu, insanın yaşayış tərzinə pozitiv, yaxud da mənfi təsir etdiyini dəqiqləşdirmək lazımdır. Bu kontekstdən baxanda məlum olur ki, son 10 il ərzində Azərbaycanda baş verənlər əhalinin sosial-iqtisadi vəziyyətinin yaxşılaşdırılması istiqamətində cərayan etməyib. Bu, insanların böyük hissəsinin yoxsullaşması, iqtisadiyyatının birtərəfli inkişafı, ölkə iqtisadiyyatının yalnız bir sahədən, neft sektorundan asılı vəziyyətdə olması fonunda baş verib. Ekspertin sözlərinə görə, dövlət büdcəsinin neftdən asılı hala gətirilməsi və bu asılılığın daha da dərinləşməsi, ölkənin iqtisadi sahələri arasında dərin disproporsiyanın baş verməsi halı baş verib. Bu sadalananlarla yanaşı Azərbaycanın sərvətlərinin bir qrup adamın cibinə axıb. Sərvət oğurluğu qabarıq şəkildə müşahidə olunub. Iri məbləğli maliyyə vəsaitləri ölkədən kənar çıxarılıb: “Samir Şərifovun nəzərdə tutduğu model bir qrup adamın daha çox var-dövlət sahibi olması məqsədlərinə xidmət edib. Bu var-dövlət xarici offşor şirkətlərə, hansısa xüsusi ciblərə axır. Atılan addımlar da bu məqsədlərin gerçəkləşməsinə xidmət edib”.
Ekspert Azərbaycan xalqının belə bir həyat arzulamadığını deyir. Ölkə vətəndaşları gözəl cəmiyyətdə yaxşı yaşamaq, gündəlik qayğıları azaltmaq, övladlarının gələcəyi üçün baza yaratmaq istəyib. Ancaq təəssüflər olsun ki, ötən müddət ərzində Azərbaycan xalqı bu məqsədlərindən ayrı salındı. Bu müddətdə niyyətlərindən ayrı düşdü.
Ekspertin fikrincə, hökumət məqsədyönlü şəkildə belə vəziyyət yaradıb. Son 10 ildə təqaüdlərin, əmək haqlarının məbləğində, dövlət büdcəsinin həcmində artım baş versə də, digər tərəfdən müəssisələr dağıdılıb, qiymətlər kəskin şəkildə artıb, soyğunçuluq, rüşvətxorluq, monopoliya ölkəni həyatın dibinə sürükləyib. Maaş artımlarını insanlar pozitivə doğru xərcləyə bilməyiblər. Insanlar öz həyatında müsbət mənada dəyişikliklərin şahidi ola bilməyiblər: “Tərəddüd etmədən deyə bilərəm ki, bunlar növbəti illər üçün hansısa sənədin hazırlanması istiqamətində çabalar göstərirlərsə, bu müddət üçün proqlaşdırdıqları da bu günə qədər yürütdükləri siyasətin davamı olacaq. Ona görə də mən hər hansı proqramların qəbul olunmasından Azərbaycan xalqına yaxşı mənada heç nə gözləmirəm. Bunlar camaatın başına bu qədər oyun gətiriblər, bundan sonra bəsdir deyib dayanmalıdırlar”.
Fizzə
