XIN-dən Vaşinqtona Anar Məmmədli ilə bağlı sərt cavab verildi
SMDTM sədri Anar Məmmədlinin həbsi ilə bağlı ABŞ Dövlət Departamentinin bəyanatına Azərbaycan XIN-dən cavab verilib. XIN mətbuat xidmətinin rəhbəri Elman Abdullayev APA-nın sorğusuna cavab olaraq deyib: “Azərbaycan Respublikasının Konstitusiyası və qanunları əsasında Azərbaycanda qanunun aliliyi, məhkəmə hakimiyyətinin müstəqilliyi və onun işinə müdaxilənin qəbuledilməzliyi və bütün vətəndaşların qanun qarşısında bərabərliyi tam şəkildə təmin olunub.
Məhkəmə hakimiyyətinin işinə və istintaqın gedişinə müdaxilə xarakterli bəyanatların səsləndirilməsi, cinayət işinin mahiyyətinin siyasiləşdirilməsi və siyasi fəaliyyətlə cinayət tərkibli əməllərin eyniləşdirilməsi yönümlü addımların atılması və məhkəmə orqanları tərəfindən fərqli qərarlar qəbul edilməsinə dair çağırışların edilməsi ilk növbədə Azərbaycan Respublikasının suverenliyinə hörmətsizlik əlaməti olaraq, tamamilə qəbuledilməz və əsassız hesab olunur və şantaj kimi qiymətləndirilir”.
Anar Məmmədlinin həbsi barədə Baş Prokurorluğun bəyanatı da təxminən bu məzmunda olub.
Xatırladaq ki, ABŞ Dövlət Departamenti Azərbaycan hakimiyyətini Anar Məmmədlini dərhal azadlığa buraxmağa çağırıb.
