Nemət Əliyev: «Görünür, Dövlət Statistika Komitəsi kiçik qrupun maliyyə vəsaitlərini ümumi əhalinin gəlirlərinə aid edir»
Dövlət Statistika Komitəsi bu ilin 11 ayı ərzində əhalinin gəlirlərini açıqlayıb. Komitənin saytına istinadən “anspress”in yaydığı məlumatda bildirilir ki, bu ilin yanvar-noyabr aylarında əhalinin gəlirləri ötən ilin müvafiq dövrü ilə müqayisədə 7,9 faiz artaraq, 32,3 milyard manata çatıb. Adambaşına düşən gəlir 6,5 faiz artaraq 3471,7 manat və ya orta hesabla ayda 315,6 manat təşkil edib. Adambaşına düşən gəlirlərin artımı istehlak qiymətlərinin bahalaşmasını 4,2 faiz üstələyərək, 6,5 faiz olub.
Məlumata görə, bu dövr ərzində əhali gəlirlərinin 68 faizini istehlak xərclərinə, 9 faizini vergilər, sosial sığorta və könüllü üzvlük haqlarına, 1,8 faizini kreditlər üzrə faizlərin ödənilməsinə sərf edib, 21,2 faizi isə yığıma yönəldilib.
Bütün xərclərdən sonra əhalinin sərəncamında 29,4 milyard manat vəsait qalıb ki, bu da ötənilkindən 7,9 faiz çoxdur.
Amma ekspertlər Dövlət Statistika Komitəsinin bu məlumatını doğru hesab etmir. Iqtisadçı ekspert Nemət Əliyev deyir ki, açıqlanan rəqəmlər adambaşına düşən gəlirin səviyyəsini xarakterizə etmir. Əhalinin gəliri 300 manatdan çox artmayıb: “Əhalinin ümumi gəlirləri, adambaşına düşən gəlirlərlə bağlı Komitənin açıqladığı rəqəm orta statistik rəqəmi ifadə edir. Ona konkret, real məzmun və don geyindirmək mümkün deyil. Yəni, 32 milyard manat əhalinin əksər təbəqələrinin gəlirlərindəki artımı xarakterizə etmir. Əhalinin gəlirləri dedikdə sahibkarlıq fəaliyyətindən daxil olan, bir qrup şəxsin xaricə daşıdığı maliyyə vəsaiti bura aid edilir. Ona görə də bu rəqəmlər böyük görünə bilər. Azərbaycanda neft sektoru inkişaf edib, bununla əlaqədar gəlirlər var, ümumdaxili məhsulun həcmi artıb. Yəni, rəqəmlər yüksək təqdim oluna bilər”.
Ekspertin sözlərinə görə, ziddiyyət təşkil edən məqam isə ümumiləşmiş göstəricilərin artması fonunda əhalinin sosial vəziyyətinin daha da ağırlaşması, insanların həyatın dibinə enməsidir. Bu da ondan irəli gəlir ki, ölkənin gəlirləri artır, neft sektorundan külli miqdarda maliyyə vəsaitləri daxil olur, Azərbaycan vətəndaşlarının sosial, maddi durumu isə getdikcə ağırlaşır. Həmçinin ölkənin təhsil və səhiyyə sistemi dağılır.
Nemət Əliyev yada salır ki, deputatlar və digər vəzifəli şəxslərin maaşları 200-300 manat şəklində artırıldı. Buna rəğmən, əhalinin 90 faizini təşkil edən vətəndaşların maaşları 2-3 manat həddində artırılıb: “Görünür, Dövlət Statistika Komitəsi kiçik qrupun maliyyə vəsaitlərini ümumi əhalinin gəlirlərinə aid edir. Bir sözlə, Statistika Komitəsi rəqəmləri düzgün araşdırmır və hakimiyyətin maraqlarına xidmət edir”.
Nigar
