Əbülfəz Qurbanlı: “Fəaliyyətimdə daha məsuliyyətli bir mərhələ başlayır”
AXCP sədrinin yeni müavini Əbülfəz Qurbanlı dekabrın 24-də “Media forum” saytının suallarını cavablandırıb:
– Artıq cəbhəçi fəaliyyətimdə yeni, daha məsuliyyətli bir mərhələ başlayır. Gənclər Komitəsinin sədri olarkən gördüyümdən daha çox iş görməliyəm. Hazırda müavin olaraq görəcəyim işləri planlaşdırıram. Yəqin ki, yaxın günlərdə partiya sədri Əli Kərimli də öz tövsiyə və tapşırıqlarını verəcək. Ümumilikdə götürsək, görəcəyim işlərin nədən ibarət olacağı aydındır: partiya sıralarının genişləndirilməsi, yerli strukturların inkişaf etdirilməsi, təbliğat işlərinə yeni metodların əlavə olunması…
– Belə bir təyinatı gözləyirdinizmi?
– Açığı, partiyada gəncləşmə məsələsi bir qərar kimi qəbul olunub. Rəyasət Heyətinin və Ali Məclisin iclaslarında qərar qəbul olunub ki, partiya gəncləşməlidir. Bu siyasət artıq bir neçə ildir davam edir. Özümü partiyanın daim üzdə olan şəxslərindən biri sayıram, amma partiya sədrinin müavini təyin olunacağımı gözləmirdim. Ona görə də bu təyinat mənim üçün bir qədər gözlənilməz oldu.
– Gənclər Komitəsi sədrliyindən ayrılmaq çətin olmadı?
– Komitəyə 4 ildən artıq sədrlik etmişəm. Təşkilatçı, partiya funksioneri kimi Gənclər Komitəsinə rəhbərlik etdiyim dövrdə yetişdim. Komitə sədri olduğum müddətdə yaxşı fəaliyyət göstərdik. Düzdür, ölkədə köklü dəyişikliklərin baş verməsinə nail olmamışıq, amma bu istiqamətdə qarşımıza qoyulan vəzifələri uğurla yerinə yetirmişik. Biz ölkənin 43 rayonunda gənclər təşkilatı qurmuşuq, tələbə özəklərimiz fəaliyyət göstərir, 20-dən artıq rayonda gənclər komitəsi qurmağa hazırlaşırıq.
Gənclər Komitəsində çox yaxşı komanda var. Bu gənclərdən bir az aralıda fəaliyyət göstərmək ilk günlərdə çətindir. Amma yenə də hamımız eyni partiyadayıq.
