Bir necə gün öncə həyat yoldaşı həbs edilən Ebru Gündəş canlı efirdə göz yaşlarına boğulub. Türkiyənin “Star” kanalında yayımlanan “O səs Türkiyə” musiqi yarışmasının müsiflər heyətində olan sənətçi başına gələnləri danışıb.
“Rza bəy mənim ərim, uşağımın atasıdır. Biz sevərək evləndik. Evlənirkən bir söz verdik – yaxşı gündə, pis gündə bir yerdə olacağıq. İndi biz qaranlıqdan keçirik. Bilirəm ki, hər gecənin bir sabahı var. Heç kim unutmasın ki, həyatda hər şey insan övladı üçündür. Mən işimi çox sevərək yerinə yetirirəm, evlənmədən də öncə işimi görürdüm. Bundan sonra da işimi görəcəm. Arzum budur ki, bu qara günlər tez keçsin. Çünki uşağımın zərər görməsini istəmirəm. Cismən burdayam, amma ruhən əsla burada deyiləm. Çünki içim qan ağlayır”.
O, göstərdiyi dəstəyə görə, yoldaşlarına və aparıcı Acun İlıcalıya təşəkkür edib.
“Acun sən nə böyük ürəkli adamsanmış. Məni heç yalnız qoymadın. Bütün dostlarıma təşəkkür edirəm”.
Bundan sonra Türkiyənin tanınmış sənət adamları sosial şəbəkələr vasitəsilə Ebru Gündəşə dəstək mesajları yazmağa başlayıblar.
