Mirvari Qəhrəmanlı: «Neft şirkətinə daxil olan bütün strukturlarda dəyişiklik olacaq və bu da xeyli sayda işçinin ixtisar olunması deməkdir»
Hələ seçkidən öncə belə məlumatlar gəzirdi ki, ARDNŞ-da kütləvi ixtisarlar olacaq. Bu məsələ ətrafında xeyli müzakirələr getdi və müxtəlif əsaslandırmalar meydana çıxdı. Son günlər neft şirkətində ixtisarlara start verilməsi ilə bağlı məlumatlar yenidən gündəmə gəlib.
Səslənən fikirlərə aydınlıq gətirmək üçün Neftçilərin Hüquqlarını Müdafiə komitəsinin rəhbəri Mirvari Qəhrəmanlı ilə əlaqə saxladıq. Mirvari Qəhrəmanlı bildirdi ki, Neft Şirkətində ciddi struktur dəyişiklikləri olacaq və bu da xeyli sayda insanın iş yerini itirməsilə nəticələnəcək: “ Dövlət Neft Şirkətinə daxil olan bütün strukturlarda dəyişiklik olacaq. ”Azneft” Istehsalat Birliyində, nəqliyyatla əlaqəli sektorda, qazma sektorunda strukturlar dəyişiləcək. Bizə daxil olan məlumata görə Abşeron qazma idarəsi, Sahil qazma idarəsi, Neft daşları qazma idarəsində dəyişiklik olacaq və idarələr sahəyə çevriləcək. “Azəriqaz”ın idarələrində də dəyişiklik gözlənilir. Struktur dəyişikliyi əsasən gələn ildən başlayacaq və tədricən davam edəcək. Bütün bunlar isə çoxlu sayda mühəndis-texniki işçinin işsiz qalması deməkdir. Əslində struktur dəyişikliyi həyata keçiriləndə, 2 ay öncədən məlumat verilməlidir. Belə məlumatlar gəzir ki, attestasiya yolu ilə işçilər seçiləcək, vəzifələr veriləcək. Ancaq mən buna inanmıram. Çünki, bu sektorda rəhbər şəxslərin xeyli sayda qohum-əqrabası var və iş yerlərində də bu adamlar təmsil olunacaq. Sonra hörmətli Rövnəq müəllim deyəcək ki, bizdə işçi var, mütəxəssis yoxdur”.
ARDNŞ-dan gözlənilən ixtisarlarla bağlı qurumun mətbuat xidmətindən məlumat almaq istəsəkdə, gün ərzində zənglərimizə cavab verən olmadı.
