“Amnesty International” Azərbaycandakı son olaylarla bağlı həyəcan t’bili çalır
“Amnesty International” beynəlxalq hüquq-müdafiə təşkilatı Azərbaycanda Qeyri-Hökumət Təşkilatları haqqında qanuna son mürtəce dəyişikliklər, eləcə də Seçkilərin Monitorinqi və Demokratiyanın Tədrisi Mərkəzinin rəhbəri Anar Məmmədlinin həbsilə bağlı hesabat hazırlayıb. Hesabat “Azərbaycanda ifadə azadlığı məhdudlaşdırılır, QHT rəhbəri təqib olunur” başlığı altında yayılıb.
Hesabatda bildirilir ki, ötən həftə Azərbaycan hökuməti vətəndaş cəmiyyətinin tanınmış simalarından birini həbs etməklə, həmçinin QHT-lərlə bağlı qanuna gözlənilmədən dəyişiklik edilməsilə ölkədə ifadə, toplaşma və birləşmə azadlıqlarının daha da məhdudlaşdırılması istiqamətində ciddi narahatlıq doğuran addımlar atdı.
Yada salınır ki, müstəqil QHT-lərin fəaliyyətini məhdudlaşdırmaq məqsədilə hökumət bu ilin əvvəlində də sözügedən qanuna bir sıra dəyişikliklər etmişdi. Dekabrın 17-də Milli Məclisin Hüquq siyasəti və dövlət quruculuğu komitəsi gözlənilmədən əlavə və dəyişikliklər layihəsini parlamentin iclasında müzakirəyə çıxartdı, elə həmin gün də qəbul edildi. Bu düzəlişlərə cərimələrin artırılması, qrant müqavilələrinin surətlərinin dövlət strukturlarına təqdim olunması və s. mürtəce xarakterli hallar daxildir.
Anar Məmmədlinin həbsinə gəlincə, hesabatda onun dindirmə üçün Baş Prokurorluğa çağırılmasından tutmuş, məhkəməyə aparılıb, orada barəsində həbs-qətimkan tədbiri seçilməsi, ona qarşı irəli sürülmüş ittihamlara qədər bütün məsələlər ətraflı şəkildə öz əksini tapıb. O da qeyd olunub ki, məhkəmədə Anar Məmmədlinin öz istədiyi vəkilin iştirakına imkan verilməyib. O, vəkililə yalnız təcridxanaya göndəriləndən sonra ertəsi gün görüşə bilib.
“Anar Məmmədlinin rəhbərlik etdiyi Seçkilərin Monitorinqi və Demokratiyanın Tədrisi Mərkəzi oktyabrın 9-da keçirilən və Ilham Əliyevin mübahisəli şəkildə üçüncü dəfə prezident olduğu seçki prosesində kütləvi qanun pozuntularıyla bağlı konkret faktları, sənədləri yayandan, bu mövzuda tənqidi hesabat hazırlayandan sonra – oktyabrın 27-dən hökumətin təzyiqlərilə üzləşdi. Oktyabrın 31-də Baş Prokurorluğun Ağır Cinayətlərə Dair Işlər üzrə Istintaq Idarəsinin əməkdaşları təşkilatın ofisində təxminən 5 saat axtarış apararaq, təxminən 20 papka sənədləri və iki kompüteri aparıblar.
Anar Məmmədli ilə yanaşı, Bəşir Süleymanlı və Elnur Məmmədova qarşı da ittiham irəli sürülüb”, – deyə hesabatda qeyd olunub.
“Amnesty International” Anar Məmmədlinin həbsilə bağlı ziddiyyətli məqama da diqqət çəkir: “Baş Prokurorluğun 18 dekabr tarixli açıqlamasında bildirilirdi ki, Seçkilərin Monitorinqi və Demokratiyanın Tədrisi Mərkəzinə qarşı araşdırmalar Vergilər və Maliyyə nazirliklərinin müraciəti əsasında başlanıb. Lakin dekabrın 20-də Vergilər Nazirliyinin rəsmisi təmsil olunduğu qurumun bu işlə ümumiyyətlə, məşğul olmadığını bildirdi”.
Bir neçə il əvvəl Anar Məmmədlinin rəhbərlik etdiyi təşkilatın qeydiyyatının heç bir əsas olmadan ləğv edildiyini, yeni adla fəaliyyətə başlayan təşkilatının isə illərdir dövlət qeydiyyatına alınmadığını yada salan hesabat müəllifləri vurğulayır ki, məhz təşkilatların qeydiyyat problemilə əlaqədar son illərdə Avropa Məhkəməsi Azərbaycana qarşı onlarla qərar çıxarıb: “Amnesty International” hesab edir ki, Anar Məmmədlinin təşkilatını qeydiyyata almamaq da vətəndaşların birləşmə azadlığının pozuntusudur”.
“Amnesty International” vurğulayır ki, Anar Məmmədli barəsində məhkəmə qərarı siyasi motivlidir və onun aktiv ictimai fəaliyyətilə bağlıdır.
“Amnesty International” hesab edir ki, Anar Məmmədli vicdan məhbusudur. O, qanunla ona verilmiş ifadə, birləşmə azadlıqlarından istifadə etdiyinə görə həbs olunub. “Amnesty International” Azərbaycan hökumətini Anar Məmmədlini dərhal, qeyd-şərtsiz azadlığa buraxmağa, ona, eləcə də Elnur Məmmədov və Bəşir Süleymanlıya qarşı cinayət işinə xitam verməyə çağırır”, – deyə hesabatda qeyd olunur.
Informasiya şöbəsi
