Heydərov fəlakət qurbanlarını işçilərinin üstünə göndərib, onlar isə şikayətçilərə 1 dəqiqə vaxt ayırıb
Dekabrın 23-ü fövqəladə hallar naziri Kəmaləddin Heydərov İmişli şəhərində qəbul keçirib. Qəbulda Şirvan şəhər, Sabirabad, Salyan, Neftçala, Hacıqabul, Saatlı, Biləsuvar və İmişli rayonlarının sakinləri, həmin ərazilərdə məskunlaşan məcburi köçkünlər iştirak edib.
Bir neçə gün əvvəldən yerli icra hakimiyyəti İmişlidəki Yanğından Mühafizə Hissəsinin inzibati binasına gedən Muğan küçəsini asfaltlayıb, yol kənarında təmizlik işi aparıb. Qəbul keçirildiyi inzibati bina da bir neçə gün öncə rənglənib.
Nazirlə görüşə gələnlərin sayı isə 50 nəfərdən çox olmayıb. Qəbula yazılanların əksəriyyəti 2010-cu ildə Kür və Araz çaylarının daşması nəticəsində yaşayış evləri qəzalı vəziyyətə düşənlər olduğundan, onların qəbulu üçün ayrıca məkan – “Gənclər Mərkəzi” seçilib. Nazir Kəmaləddin Heydərovun qəbul keçirdiyi Yanğından Mühafizə Hissəsi ilə həmin mərkəzi bir neçə kilometr məsafə ayırır. Rayonda çoxsaylı inzibati bina olduğu halda, tədbirin şəxsi mülkiyyətdə olan iaşə obyektində keçirilməsi də maraq doğurur.
BİR DƏQİQƏLİK QƏBUL
Səhər açılandan yüzlərlə bölgə sakini əllərində məktub və fotoşəkillərlə sözügedən mərkəzin önünə toplaşıb. Eyni vaxtda, daha bir neçə yüz adam qəbula yazılmaq üçün növbəyə dayanıb. Onların arasında əlillər, qadınlar və ahıl yaşlılar üstünlük təşkil edib.
Hava qaralanadək növbəsi çatmayacağından narahatlıq keçirilənlərə bildirilib ki, qəbul fasiləsiz olaraq davam edəcək və ən sonuncu müraciət gecə saatlarında olsa belə, dinləniləcək.
Saat 10-dan başlayaraq tədbirin təşkilinə məsul olan FHN əməkdaşları səsgücləndirici ilə iştirakçıların ad-soyadını elan etməyə başlayıb. Qəbula gələnlər “Gənclər Mərkəzi”nin ön hissəsindən binaya daxil olub, arxa qapıdan çıxıblar.
“Mərkəz”dən çıxanlar bildirib ki, FHN-in ayrı-ayrı vəzifəli şəxsləri onların yazılı müraciətlərini qəbul edib, problemlərini sözlə ifadə etməsi üçün cəmi 1 dəqiqə vaxt ayırıb. İçəridə tez-tez qalmaqal, qışqırıq qopmağı barədə də danışılır. Özlərini pis hiss edənlər başqa şəxslərin köməyi ilə bayıra çıxarılıb.
Qəbula FHN-in geniş bir kontingenti cəlb edilib. İctimai yerdə kütləvi toplaşma ilə əlaqədar İmişli rayon polis şöbəsi gücləndirilmiş iş rejiminə keçib. Ərazidə mülki geyimdə olan çoxsaylı dövlət qulluqçuları, yanğından mühafizə və “təcili yardım” avtomobilləri olub (“Azadlıq” radiosu).
