Mirvari Qəhrəmanlı: «Hesabatda yazılanları təkzib etməyə Neft Şirkətində faktlar yoxdur»
Azərbaycanda gizli neft mafiyası barədə araşdırma aparıb, sonda “Anonim Azərbaycan” adlı hesabat hazırlayan “Global Witness” təşkilatı bu mövzuda daha bir bəyanat yayıb. Təşkilatın saytında yerləşdirilmiş bəyanat Azərbaycan Respublikası Dövlət Neft Şirkətinin, eləcə də araşdırmanın əsas qəhrəmanı olan sirli Anar Əliyevin bu hesabatla bağlı fikirlərinə cavab xarakteri daşıyır.
Elə mətn də “Anonim Azərbaycan: ARDNŞ-ə cavab” başlığıyla yayılıb: “ARDNŞ bəyan edib ki, ”Global Witness”in hazırladığı hesabatın məqsədi paxıllıqdan Azərbaycanın mənfi obrazını yaratmaq və ARDNŞ-ə təzyiq göstərməkdir. Iddia olunur ki, hesabat qeyri-dəqiq mənbələrin verdiyi məlumatlara əsaslanır, oradakı informasiyaların əksəriyyəti ya həqiqətə uyğun deyil, ya da köhnədir.
“Global Witness” heç bir partiya bağlılığı olmayan qeyri-hökumət təşkilatıdır. Fəaliyyətinin məqsədi isə bütün dünyada hökumət və şirkətlərin fəaliyyətində şəffaflığın artırılmasıdır. “Global Witness”i “paxıllıqda” ittiham etmək bu təşkilatın fəaliyyəti və məqsədi barədə məlumatsızlıqdan irəli gəlir. “Global Witness” iyirmi ildən çoxdur ki, təbii ehtiyatlarla bağlı araşdırmalar aparır, 2003-cü ildə Nobel Sülh Mükafatına namizədliyi irəli sürülüb.
Bu təşkilatın bütün hesabatları, o cümlədən “Anonim Azərbaycan” da ciddi araşdırılıb, faktlara, mənbələrə əsaslanır. Bu hesabatdakı məlumat mənbələrinin əksəriyyəti ARDNŞ və ya onun törəmə şirkətlərinin illik hesabatları, bəyanatları və ya Dövlət Neft Şirkətinin saytı olub.
2013-cü ilin əvvəlindən başlayaraq, dekabra qədər “Global Witness” dəfələrlə ARDNŞ və onun törəmə şirkətləri, partnyorlarıyla əlaqə saxlamağa cəhd göstərib. Lakin ARDNŞ öz cavabında ünvanladığımız sualların böyük əksəriyyətinə aydınlıq gətirməyib. Hesabatımızda ARDNŞ-in cavabı da öz əksini tapıb.
Dünyada əsas neft istehsalçılarından, eləcə də Mədən Sənayesində Şəffaflıq Təşəbbüsünə ilk qoşulan ölkələrdən biri olan Azərbaycan üçün şəffaflığın artırılması istiqamətində addımlar atılması həyati əhəmiyyətli məsələdir.”Global Witness” bütün bu məsələlərlə bağlı ARDNŞ-lə dialoqu davam etdirməyə hazırdır”.
Xatırladaq ki, Dövlət Neft Şirkəti “Global Witness”ə cavab bəyanatında hesabatın ARDNŞ-in artan işgüzar nüfuzuna xələl gətirmək məqsədi daşıdığından həmin təşkilatın bu hərəkətini pislədiyini qeyd etmişdi: “Şirkət öz əməliyyatlarında şəffaflığı təmin etmək üzrə qərarlı olduğunu bir daha bəyan edir. Bununla yanaşı, ARDNŞ işgüzar nüfuzunun müdafiəsi üçün hüquq prinsiplərinə uyğun olaraq ”Global Witness” təşkilatına qarşı zəruri hüquqi tədbirlər görmək, o cümlədən məhkəməyə müraciət etmək hüququnu da özündə saxlayır”.
Göründüyü kimi “Global Witness” ARDNŞ-in hədələrindən geri çəkilmədi, əksinə cavab verdi. Bəs, Dövlət Neft Şirkəti “Global Witness”i niyə məhkəməyə vermir?
Neftçilərin Hüquqlarının Müdafiə Komitəsinin sədri Mirvari Qəhrəmanlı deyir ki, Dövlət Neft Şirkətinin bütün bəyanatlarının sonu həmişə belə qurtarır: “Neft Şirkəti bu hüququ saxlamalarına baxmayaraq özlərinə inanmadıqları üçün məhkəməyə müraciət etmirlər. Neft Şirkətinin cavab bəyanatını savadlı bəyanat hesab etmirəm. Şirkətin bəyanat, müraciət yazmaq hələ ki səriştəsi yoxdur, formalaşmayıb. Onların bu sahədə bilik və bacarıqlarının artırılmasına ehtiyac var. Ona görə ki, yazılan bəyanat sadəcə nağıl idi”.
Mirvari Qəhrəmanlının sözlərinə görə, “Global Witness”in hesabatı qərəzli, təşkilat isə heç yerə bağlı deyil: “Təşkilat bəyanatı ilə göstərdi ki, Neft Şirkətinə qulaq asmağa vaxtı var. Yəni, Dövlət Neft Şirkətinin bir faktı varsa onlar yenidən hesabatlarına baxmağa hazırdılar. Mənim bildiyim qədər hesabatda yazılanları Neft Şirkətinin təkzib etməyə faktı yoxdur. Düşünürəm ki, onlar imiclərinə vurulan zərbəni aradan qaldırsınlar. Bunun üçün Neft Şirkəti həm beynəlxalq aləmə, həm də yerli ictimaiyyətə açıq olmalıdır. Neft Şirkəti ”Global Witness”in yazdıqlarını təkzib etmək üçün əsaslı arqumentlər, faktlar gətirməlidir. Əks halda öz imiclərini daha da itirəcəklər”.
Ramin DEKO
