Fətullah Gülən-Ərdoğana savaşı qızışır
Türkiyədə “böyük rüşvət” əməliyyatında həbs edilən “Halkbank”ın baş direktoru Süleyman Aslanın məhkəmədəki müdafiə çıxışı mətbuata sızıb. S.Aslanın evində ayaqqabı qutularının içərisində tapılan 4.5 milyon dolların ianə olduğunu dediyi artıq yayılmış məlumatdır. Bankir bildirmişdi ki, evində saxladığı 4.5 milyon dollar Makedoniyada Balkan Universiteti və Çorum Osmancık Anadolu İmam Hatip Liseyi üçün yığılmış ianə olub.
Məhkəmə də isə S.Aslan bildirib ki, Universitetin qəyyumlar şurasının sədri olan H.B. adlı İstanbuldan millət vəkili (söhbət Hüseyn Bürgəndən gedir – red.) ona “Türkiyədə ianə yığılıb, Makedoniyaya çatdırmağa çətinlik çəkirik”, deyərək kömək istəyib. Sonra da oğlu C.B. vasitəsilə ona 1 milyon 950 min avro verib. S.Aslan ifadəsində Rza Zərrab barəsində də danışıb: “Rza Zərrab xeyriyyəçiliklə məşğul olmaq istədiyini deyəndə, ağlıma məzunu olduğum Çorum Osmancık İmam Hatip Liseyi gəldi. Ehtiyacları ona deyəndə xərci ödəməyə hazır olduğunu bildirdi. Doğulduğum yer, oxuduğum məktəb olduğunu düşünüb, bu təklif barədə yerli idarəçilərə, məktəb rəhbərliyinə və Çorumdan olan millət vəkillərinə məlumat verdim. Texniki səbəblərdən layihənin icrasına başlaya bilmədiyimiz üçün verilən ianələri öz evimdə saxladım. Vəziyyəti Çorum millət vəkilimiz C.B.-yə də danışıb 7 milyon lirə ianənin yığıldığını demişdim”.
Süleyman Aslan deyib ki, Balkan Universiteti üçün yığılan pulların 450 min avrosunu qarşı tərəfdəki hüquqi prosedurlar səbəbindən vaxtında ünvanına çatdırmaq mümkün olmayıb. Buna gör də həmin vəsaiti də evində saxlayıb. Bank direktorunun sözlərinə görə, millət vəkili H.B.-nin ona verdiyi 1 milyon 950 min avro ianənin yalnız 950 minini çətinliklə ünvanına çatdıra biliblər. 1 milyon avro isə evdə qalıb. Əməliyyat zamanı da həmin pullar müsadirə olunub.
Süleyman Aslan bildirib ki, Rza Zərrab da Balkan Universitetinə öz xətti ilə 500 min avro ianə göndərib. İanə üçün nəzərdə tutduğu qalan vəsaiti isə göndərməyə çətinlik çəkib və pulları ünvanına çatırmaq üçün “Halkbank”ın direktoruna verib. Bankirin dediyinə görə, ona verilən pulları Makedoniyaya niyə köçürə bilmədiklərini göstərən bütün qeydlər bankın sənədlərində mövcuddur. S.Aslan qeyd edib ki, hazırda müsadirə olunan pulların 2 milyon avrosu Balkan Universiteti üçün verilən, qalanı isə İmam Hatip Liseyi üçün ayrılan pullardır.
Vəkil diqqəti ABŞ-a yönəltdi
Süleyman Aslanın vəkili, cinayət hüququ üzrə professor Ersan Şən isə məhkəmədəki müdafiə çıxışında baş verənlərin arxasında ABŞ-ın durduğuna işarə vurub.
Vəkil deyib ki, BOTAŞ ve TÜPRAŞ-ın İrandan aldığı xam neftə görə ödəməli olduğu pulları “Halkbank”da İranın hesablarına köçürülüb. İrandan bu vəsaitlərinin saxlanması üçün qızıl alınır. Pulların sahibi hansı firmaya desə, “Halkbank” da pulları o firmanın hesabına köçürüb. “Ortada bir qəpik də qara pul yoxdur. Əksinə, bu ticarətdən Türkiyə Cümhuriyyəti milyardlarla dollar qazanır. Sırf Amerikanın mənfəəti üçün Türkiyə qanuni ticərət əməliyyatlarından imtina edəsi deyil”, – deyə Ersan Şən bildirib.
Vəkil qeyd edib ki, 2013-cü ilin avqustundan qızıl ticarətinə embarqo qoyulduğu üçün qida ticəarti başlanıb. Müvəkkili olan bank müdürünün burada hər hansı şəxsi qazancından söhbət gedə bilməz. Bank qanuni əməliyyatlar həyata keçirib və bütün qazanılan da bankın və Türkiyənin mənfəətidir.
Ersan Şən bildirib ki, ortada nə bankın zərəri var, nə də haqsız mənfəəti. Vəkil mütəşəkkil cinayətkarlıq ittihamlarının gülməli olduğunu deyib.
Ersan Şən müvəkkili Süleyman Aslanın həyat yoldaşı ilə telefon danışıqlarının dinlənilməsini cinayət adlandırıb. O da müvəkkili kimi qeyd edib ki, evdən tapılan 4.5 milyon dollar ianə olub. Bunu sübut etmək üçün vəkil İstanbuldan millət vəkili Hüseyn Bürgənin, Bəkir Yazıcının, Əhməd Aksunun və İdris Makinacının şahid kimi dindirilməsini tələb edib. Lakin onun vəsatəti təmin olunmayıb.
«Türk Hava Yolları»nda nurçuların 4 qəzetinə qadağa qoyuldu
«Türk Hava Yolları» şirkətinin təyyarələrində dünəndən “Zaman”, “Bu gün”, “Todays Zaman” və “Orta Şərq” qəzetlərinin sərnişinlərə paylanması dayandırılıb. Modern.az saytı Türkiyə KİV-nə istinadən bildirir ki, buna qədər pasport qeydiyyatından keçəndən sonra sərnişinlər uçuş kartlarını göstərərək istədikləri qəzeti ala bilirdilər. “Business Class”da uçacaq sərnişinlərə isə qəzet təyyarənin içində paylanırdı. Artıq sərnişinlər pasport qeydiyyatından sonra qəzet ala bilsələr də, “Business Class”a bileti olanlara adı çəkilən qəzetlər paylanmayacaq. Digər məlumata görə, şirkətin «CİP» və «Lounge» salonlarında da həmin qəzetlərin miqdarı əhəmiyyətli dərəcədə azalıb. Qeyd edək ki, “Zaman”, “Bu gün”, “Todays Zaman” və “Orta Şərq” nurçuların nəzarətində olan və Türkiyə hakimiyyətini ən sərt tənqid edən qəzetlər hesab olunurlar.
Ərdoğan-Gülən «atışması» davam edir
Türkiyənin baş naziri Rəcəb Tayyib Ərdoğanın son açıqlamasına reaksiya özünü çox gözlətməyib. Qeyd edək ki, Fətullah Gülən rüşvət əməliyyatını ifşa edənlərə qarşı hökumətin repressiya kampaniyasını pisləşmiş və bunu edənlərə qarğışlar yağdırmışdı. Ərdoğan isə cavab olaraq bunları demişdi: «Çeteləri», mafiyanı çökdürmüşük. Amma bunların forması başqadır. İndi də bunları çökdürəcəyik. Haradan gəlirsə gəlsin, rəngi nə olursa olsun. Belə məsələlərdə güzəşt yoxdur. Biz müsəlmanların hidayət etməsi üçün dualar edərik. Lənət müsəlmanlar arasında elə bərbad bir şeydir ki, bumeranq kimi onu yağdırana tərəf qayıdar. Millətimizin bölünməsinə səbəbkar olanlar islah olmazlar».
Dünən «Herkul.org» saytında Fətullah Gülənin Ərdoğanın bu açıqlamasına cavabı yayılıb: «Müsəlmana «çete» deyənlər, “şəbəkə” deyənlər, onları meymun hesab edənlər… Bunlarla heç bir əyrini düzəltmək olmaz. İnsanların gözlədiyi o həqiqətlər heç vaxt bunların əliylə üzə çıxmaz. Xəyanəti müdafiə edir, onu ifşa edənlərə təxribatçı deyirlər. Kiminsə xəyanətini ifşa etmək kimi bir vəzifəmiz yoxdur. Amma biriləri bunu edibsə, bu, bizə aidiyyəti olmayan işdir. Bu işə müdaxilə etmək fikrimiz yoxdur. Allah kimin kim olduğunu görür».
Ankara polisinə də növbə çatdı
Məlum hadisələrdən bu yana Türkiyə polisində sözün əsl mənasında «təmizləmə əməliyyatı» aparılır. Əsasən İstanbul polisində həyata keçirilən işdən çıxarılmalar dünən Ankarada da müşahidə olunub. Ankara Polis İdarəsinin iki ayrı şöbəsinin rəis müavinləri işdən çıxarılıb.
İstanbul Polis İdarəsinin xüsusi-xidmət üzrə şöbə rəisi Əhməd Arıbaş isə şübhəli şəxs qismində dindirilmək üçün prokurorluğa çağırılıb. Lakin Polis İdarəsi Arıbaşın hansı dəlil və ittihamlar üzrə prokurorluğa çağrılmasının qeyri-müəyyən olduğunu əsas gətirərək şöbə rəisini ifadə verməyə göndərməkdən imtina edib.
Daxili işlər naziri Müəmmər Gülər isə oğluna qarşı həyata keçirilən əməliyyatı növbəti dəfə təxribat kimi qiymətləndirib. Gülər bildirib ki, oğlu ilə telefon söhbətlərində pul sözünün keçdiyi hissələrə çox peşəkarcasına müdaxilə və əlavələr edilib: «Bu cür yalanlarla ictimai rəyi məharətlə çaşdırmağa çalışırlar». Nazir bununla bağlı müvafiq orqanlara şikayət edəcəyini də bildirib.
Ebru Gündəş Zərraba baş çəkdi
Barəsində həbs qərarı çıxarılaraq Metris həbsxanasına göndərilən iş adamı Rza Zərrab isə dünən həyat yoldaşı Ebru Gündəşlə görüşüb. Müğənni həbsxanaya mühafizəçilərinin əhatəsində daxil olub və mətbuat onu heç cür danışdıra bilməyib. Məlumatlara görə, Ebru Gündəş ərinin başına gələnlərə görə bütün konsert planlarını təxirə salıb. Sənətçi Yeni il gecəsi Şimali Kiprdə Nuhun gəmisində 250 min lirə müqabilində səhnəyə çıxmalı idi. Lakin Gündəş bu konsert proqramını da ləğv edib. Konsert biletlərinin təxminən 4 min lirəyə satıldığı salonda boş yer qalmamışdı.
