Əli qumbaralı şəxs şəhəri ayağa qaldırdı
Gəncə şəhərinin Dədə Qorqud küçəsində dramatik anlar yaşanıb. Bina 50, ev 33-də Əflatun adlı bir şəxs bir qadını girov götürüb. Həmin şəxs eyvana çıxaraq girov götürdüyü qadını əlindəki qumbara ilə partladacağını deyib. Hadisə dünən səhər saatlarında baş verib. Gəncədəki mənbələr “Azadlıq”a bildirib ki, hadisə ilə əlaqədar Gəncə polisi və Daxili Qoşunların həyəcan siqnalı ilə ayağa qaldırılıb.
Gəncədən redaksiyamıza daxil olan məlumatlarda bildirilir ki, Əflatun vəhhabi təriqətinə mənsubdur.
Gəncədəki mənbələr deyiblər ki, şəhər prokuroru Adil Vəliyev və Mütəşəkkil Cinayətkarlıqla Mübarizə İdarəsinin rəisi Rasim Qurbanov həmin şəxslə təslim olması danışıqlar aparmaq istəyib. Lakin danışıqlar nəticəsiz olub. Bundan sonra Əflatun yaxın dostu deyilən bir nəfər gəlib və onu təslim olmağa inandıra bilib. Bundan sonra polis Əflatunu və girov saxladığı qadını aparıb.
Deyilənlərə görə, hadisəyə səbəb Əflatunla həmin qadın arasında məişət zəmnində yaranan mübahisə səbəb olub. Qadın Əflatunun qonşusudur. Qadının yüngül həyat tərzi ilə fərqləndiyi, Əflatunun da ondan bu xüsusda istəklərinin olduğu, istəyinə müsbət cavab almayınca belə bir əmələ əl atdığı deyilir.
