“Xalq əmin ola bilər ki, onun iradəsilə seçiləcək hakimiyyət tapdanmış hüquqlarını özünə qaytaracaq, ədalət bərpa olunacaq”
Avropa Məhkəməsinin 14 mart 2013-cü il tarixli qərarı əsasında Əli İnsanovun işinə baxan Ali Məhkəmənin Plenumunun qərarı keçmiş səhiyyə nazirinə göndərilib. Bu barədə “Azadlıq”a Əli İnsanovun vəkili Toğrul Babayev məlumat verərək bildirib ki, hazırda qərar ingilis dilinə tərcümə olunur. Çünki ondan Avropa Məhkəməsinin qərarlarının icrasına nəzarət edən Avropa Şurası Hazirlər Komitəsinə şikayət göndəriləcək: “Faktiki Avropa Məhkəməsinin qərarı icra olunmayıb. Avropa Məhkəməsi Əli İnsanovun işinə birinci instansiya məhkəməsində baxılarkən pozuntulara yol verildiyini təsdiqləyib və buna görə qərar çıxarıb. Ali Məhkəmənin Plenumu isə Əli İnsanovun azadlığa çıxmasının qarşısını almaq məqsədilə birinci instansiya məhkəməsinin hökmünü saxlayıb, amma həmin hökmün qüvvədə qalması barədə Apelyasiya Məhkəməsi və Ali Məhkəmənin qərarlarını ləğv edib”.
Dekabrın 23-də cəzaçəkmə müəssisəsində Əli İnsanovla görüşən vəkil azərbaycanlıların Ermənistandan deportasiyasıyla bağlı müraciətini də yayıb. Müraciətdə deyilir:
“Əziz həmvətənlərim!
Bugünlərdə azərbaycanlıların Ermənistan adlanan qədim Oğuz yurdundan faciəli şəkildə son məcburi deportasiyasının 25-ci ilini böyük üzüntü və kədərlə yada salırıq. Təəssüf ki, bu uzun illər ərzində Azərbaycan iqtidarı qaçqın və məcburi köçkünlərin tapdanmış hüquqlarının müdafiəsi, onların doğma yurdlarına qayıtması üçün heç bir real iş görməyib. Azərbaycan xalqı əmin ola bilər ki, onun iradəsilə seçiləcək hakimiyyət tapdanmış hüquqlarını özünə qaytaracaq, ədalət bərpa olunacaq, açıq və demokratik cəmiyyət qurulacaq. Sözlərimi böyük alman mütəfəkkiri Hötenin fikrilə tamamlamaq istəyirəm: “Həyat və azadlığa yalnız hər gün bu yolda savaşanlar layiqdir!”
Aytən
