Bu gün Ukraynada növbəti ümumxalq mitinqidir
Nikolay Azarov: «Avropa Birliyi bizə dərhal 20 milyard təklif etsəydi, assosiasiya sazişi imzalanacaqdı»
Bu gün Kiyevin “Müstəqillik” meydanında avrointeqrasiya tərəfdarlarının növbəti mitinqi olacaq. Yerli vaxtla saat 12.00-a təyin edilən aksiya “Bizim gücümüzün mitinqi” adı altında keçiriləcək. Etirazçılar hesab edir ki, Yanukoviç hökuməti heç cür avrointeqrasiya tərəfdarlarının səsini eşitmək istəmir. Ona görə də növbəti izdihamlı aksiyaya ehtiyac var.
Aksiyaçıların fikrincə, hökumət onların güc olduğunu görməli və bu güclə hesablaşmalıdır. Dünən aksiyaçılar “Avromeydan”da nəhəng divar hörüblər. Divarın üzərində etirazçıların gəldiyi bölgə və şəhərlərin adları qeyd olunub. Qeyd edək ki, dünən “Avromeydan” olaylarının bir ayı tamam olub. Bir ay keçməsinə baxmayaraq, Maydan hələ də öz tələblərinin reallaşmasına nail ola bilməyib.
Bir neçə gün əvvəl məşhur “The Wall Street Cournal”ın Ukrayna ilə bağlı yaydığı xəbərə Yanukoviç hökumətindən dünən reaksiya gəlib. Xatırladaq ki, nəşr son saylarının birində Kiyevin Avropa Birliyinin deyil, Rusiyanın təklifini dəyərləndirməsini tənqid etmişdi. Həmçinin bildirmişdi ki, ggər Ukrayna Assosiasiya sazişini imzalasaydı, Avropa Birliyi Kiyevə ən azı 20 milyard avro vəsait ayıracaqdı. Bu isə Ukrayna tərəfinin Rusiyadan aldığı məbləğdən daha çoxdur. “The Wall Street Cournal” bu rəqəmi Avropa Birliyinin Assosiasiya sazişi ilə bağlı layihəsinə istinadən açıqlamışdı.
Avropa Birliyinin Kiyevə ayıracağı 20 milyardla bağlı Ukraynanın baş naziri Nikolay Azarov açıqlama verib. Azarov bildirib ki, Avropa Birliyi onlara dərhal 20 mlrd. dollar təklif etsəydi, o halda Assosiasiya haqqında saziş imzalanacaqdı: “Assosiasiya haqqında saziş hələ Avropa Birliyi demək deyil. Bu, çox böyük bir iş deməkdir. Biz bu işdə riskləri görürük. Bu mərhələdə Ukraynaya Avropa Birliyi ilə sazişi imzalamağı məsləhət görmək lazım deyil”.
“UDAR” Partiyasının parlamentdəki deputatlarından Viktor Pinzenik isə bildirib ki, baş nazir Azarov Rusiyadan alacaqları 15 milyardlıq krediti Ukrayna cəmiyyətinə böyük qələbə kimi təqdim etməyə çalışsa da, əslində vəziyyət çox kritikdir. Deputatın fikrincə, hökumətin apardığı yanlış siyasət nəticəsində Ukraynanın borcları gələn ilin sonuna qədər 700 milyarda (Ukrayna pulu ilə) yüksələcək. O bildirib ki, 2008-ci ilin əvvəlində ölkənin borcu cəmi 89 (milli pulla) milyard olub. Hazırda isə bu rəqəm 550 (milli pulla) milyarddır.
Almaniya kansleri Angela Merkel dünən açıqlama verərək bildirib ki, sazişlə bağlı Avropa Birliyinin qapıları Ukraynaya açıqdır: “Qapı açıqdır. Onun nə vaxt bağlanacağı haqda hər hansı tarix yoxdur. Biz bu sazişi imzalamaq istəyirik. Indi qərar Ukraynanındır. Nə vaxt istəsələr, gəlib imza ata bilərlər. Çünki bu sazişin hazırlanmasında Avropa Birliyi xeyli işlər görüb”. Merkel onu da qeyd edib ki, Ukrayna eyni anda həm Gömrük Ittifaqında, həm də AB-nin təklif etdiyi Azad Ticarət Zonasında təmsil oluna bilməz. Çünki bu, qəbul olunan qaydalara zidddir. Almaniya kansleri gələn ilin yanvarında Rusiya ilə Avropa Birliyinin iştirak edəcəyi birgə sammitdə məsələnin bir daha müzakirə olunacağını bildirib.
Xatırladaq ki, bundan əvvəl Merkel bildirmişdi ki, Ukraynanı Rusiya və Avropa Birliyi ilə bağlı seçim qarşısında qoymaq olmaz. O, belə cəhdlərin yolverilməz olduğunu bəyan etmişdi.
