Aslan İsmayılov prokurorluğun əməllərini lətifə ilə şərh elədi
Tanınmın vəkil Aslan Ismayılov Seçkilərin Monitorinqi və Demokratiyanın Tədrisi Mərkəzinin rəhbəri Anar Məmmədlinin həbsilə bağlı facebook səhifəsində maraqlı status paylaşıb. Aslan Ismayılovun həmin statusunu təqdim edirik:
“Anar Məmmədlinin həbsi ilə bağlı AR prokurorluğunun hərəkətlərini nə qədər anlamaq istəsəm də alınmadı. Əvəzində bir rus lətifəsi yadıma düşdü. Çar Rusiyasının cənub şəhərlərindən birində yəhudi talanları gedir. Talançılar bir yəhudi evinə girib talana bəhanə üçün dərhal yəhudi ailəsini xristian dininə hörmətsizlikdə ittiham edirlər. Ailə başçısı Avraam dərhal səliqəli bağlamalarda olan rus xaçını və Incili göstərib xristian dininə böyük hörmətləri olduğunu bildirir. Bu bəhanənin alınmadığını görən dəstə başçısı ailəni çar Nikolaya hörmətsizlikdə ittiham edir. Avraam dərhal çar Nikolayın divarda asılmış şəklini göstərir. Bu zaman talançılardan biri həyatda birinci dəfə gördüyü pianoya yaxınlaşıb dillərinə basır və soruşur ki, niyə piano qara, dilləri isə ağ rəngdədir? Avraam cavab verir ki, pianonun dilləri fil dişindən hazırlandığına görə ağdır. Bu zaman talançılar bir ağızdan çığırırlar: ”Lənətlənmiş yəhudi niyə bədbəxt fili öldürmüsünüz”. Və talana başlayırlar…
Anar Məmmədli ilə bağlı prokurorluğun tədbirləri həmin talançıların hərəkətinə bənzəyir. Yuxarıdan göstəriş alan prokurorluq Anarı həbs edib sonra onu seçkilərlə bağlı monitorinqi saxtalaşdırmaqda ittiham edirlər. Tam bədbəxt Avraamın fili öldürməsi kimi…”
