Misir Mərdanov nazir postundan getsə də, bu iki qurum arasında ziddiyyətlər davam edir və edəcək
Misir Mərdanovun təhsil naziri vəzifəsindən çıxarılması ilə Təhsil Nazirliyi ilə Tələbə Qəbulu Üzrə Dövlət Komitəsi arasındakı qarşıdurmaya son verildiyini düşünənlər yanıldı. Mikayıl Cabbarovun təyinatından bir neçə ay keçməmiş Təhsil Nazirliyi və TQDK yenidən üz-üzə gəldi.
Bu günlərdə Bakı şəhər Təhsil Idarəsinin TQDK-nı ittiham etməsi, qarşı tərəfin də dərhal bunu cavablandırması qurumlar arasında konfliktə son verilmədiyini ortaya qoydu.
Əslində belə də olmalı idi. TQDK ilə Təhsil Nazirliyi arasındakı qarşıdurma heç də Misir Mərdanov-Məleykə Abbaszadə duellosu deyildi. Bu hakimiyyət daxilində iri qruplaşmaların çəkişməsinin təzahürü idi. Əvvəlcə hakimiyyətdəki Qərbi Azərbaycan qruplaşmasında təmsil olunan Misir Mərdanov 2005-ci ildən sonra Paşayevlərin çətiri altına keçmişdi.
Məleykə Abbaszadə isə Prezident Administrasiyasının rəhbəri Ramiz Mehdiyevə yaxın kadr sayılır. Paşayevlərlə Ramiz Mehdiyev arasında ziddiyyətlərin olması isə sirr deyil. Misir Mərdanovu əvəzləyən Mikayıl Cabbarov da Paşayevlərin komandasına daxildir. Bu baxımdan Təhsil Nazirliyi ilə TQDK arasında qarşıdurmanın yeni nazirin dövründə də davam edəcəyi gözlənilirdi. Hətta Mikayıl Cabbarovun dövründə qarşıdurmanın daha da gərginləşəcəyi qənaətində olanlar var.
