Sərkisyandan torpaq almaq asandırsa, hakimiyyət nə gözləyir?
Dövlət başçısı Ilham Əliyev Bərdədə məcburi köçkünlərlə görüşdə Dağlıq Qarabağ münaqişəsinin həlli prosesindən danışıb və Ermənistanın hazırkı rəhbərliyinin iqtidarda qalmasının Azərbaycan üçün əlverişli olduğunu deyib. I.Əliyev bildirib ki, Sərkisyan nə qədər hakimiyyətdə qalsa, torpaqlarımız o qədər tez azad olar.
Xatırladaq ki, bir neçə gün əvvəl oxşar bəyanatla Ermənistan prezidenti Serj Sərkisyan da çıxış etmişdi. Erməni prezidenti Əliyevin seçilməsini Ermənistan üçün məqbul variant hesab edib.
Düşmən ölkə rəhbərlərinin bir birinə ünvanlanmış bu bəyanatlar əslində nədən xəbər verir?
«Bu açıqlama Qarabağ kartı vasitəsilə hər iki avtoritar rejimin mövcudluğunu uzatmaq üçün dünya ictimaiyyətini şantaj etməkdir»
AXCP sədrinin müavini Nurəddin Məmmədli hesab edir ki, bu açıqlama Qarabağ kartı vasitəsilə hər iki avtoritar rejimin mövcudluğunu uzatmaq üçün dünya ictimaiyyətini şantaj etməkdir. Yəni hakimiyyət dünya ictimaiyyətində, beynəlxalq təşkilatlarda, Qarabağ probleminin həllində maraqlı olan ölkələrdə belə bir rəy formalaşdırmağa çalışır ki, həm Ermənistanda, həm Azərbaycanda hakimiyyətin dəyişməsi Qarabağda müharibə variantının gündəmə gəlməsini stimullaşdıracaq. Bu da regional maraqlara ziddir. Regionda yeni münaqişə ocağının meydana gəlməsinə, Qərbin, bütövlükdə dünyanın bu regiondakı siyasi, iqtisadi və digər maraqlarına ciddi zərbə vurmasına səbəb olacaq. Hər iki ölkə başçısı bir-birinə dayaq olmaqla dünya ictimaiyyətini şantaj etməyə cəhd edirlər: “Sərkisyan də, əliyevlər rejimi də uzun müddətdir hakimiyyətdədirlər. Nə qədər ki, bu ölkələrdəki rejimlər mövcuddur Qarabağ problemi həll olunmayacaq. Çünki Qarabağ probleminin həll olunması həm də bu rejimlərin ömrünü qısaldan bir faktordur. Bu fikirlər sadəcə dünya ictimaiyyətini aldatmağa yönəlmiş bir cəhddir”.
«Sərkisyanın Ermənistan hakimiyyətində qalmasının Qarabağ probleminin həllinə heç bir müsbət təsiri ola bilməz»
Musavat partiyası Mərkəzi Icra Aparatının rəhbəri Arif Hacılı Əliyevlər hakimiyyəti ilə Ermənistan hakimiyyəti arasında qarşılıqlı dəstəklə bağlı faktların zaman-zaman bir birini əvəz etdiyini deyir. Heydər Əliyevlə Ter-Petrosyan, Heydər Əliyevlə Köçəryan arasında bir-birilərinin hakimiyyətlərinin qorunması istiqamətində addımlar atılırdı. Görünür, indi də Ilham Əliyevlə Sərkisyan arasında hakimiyyətlərinin qorunması ilə bağlı hansısa razılaşmalar mövcuddur.
A.Hacılının sözlərinə görə, Sərkisyanın Ermənistan hakimiyyətində qalmasının Qarabağ probleminin həllinə heç bir müsbət təsiri ola bilməz. Çünki Sərkisyan faktiki olaraq Qarabağ münaribəsinin qalibi kimi Ermənistanda hakimiyyətə gəlib. Onun hakimiyyətdə qalmasını şərtləndirən əsas amillərdən biri Qarabağın işğal altında qalmasıdır. Ermənistanda başqa bir siyasəti yalnız Sərkisyana qarşı olan qüvvələr yürüdə bilər.
Fizzə
