Rusiyanın hərbi gəmisi Suriya sahillərinə yan alıb
Suriyanın kimyəvi silahı nəzarətə təhvil verməsinin arxasında gizli Rusiya-Suriya anlaşmasının olduğu iddia edilir. Bu barədə ANS PRESS Türkiyə mətbuatına istinadən məlumat verir. İsrailin “Channel 2” televiziyasında yayımlanan xəbərdə, Suriya dövlət başçısı Bəşər Əsədin kimyəvi silahları beynəlxalq nəzarətə verməsinin əvəzində, Rusiyadan daha çox silah və əsgər alacağı iddia edilib.
İsrail televiziyasının iddiasına görə, Suriyadakı Əsəd rejimi əlindəki silhaları nəzarətə verərək həm ABŞ-ın hərbi müdaxiləsinin qarşısını alacaq, həm də bu anlaşma əvəzində Rusiyadan yeni hərbi təyyarə və əsgər qüvvəsi alaraq müxalifətə qalib gələcək.
“Channel 2” nin iddiasına görə, Rusiyada olan Suriya Xarici işlər naziri Velid Muallim, yeni silahların almaq üçün Rusiya ilə danışıqları davam etdirir. Xəbərdə Əsədin müxalifətə qarşı istifadə etməyi planlaşdırdığı Rus silahlarının bir qisminin Rusiyanın Qara dənizdəki Novorossiysk limanından yola düşdüyü deyilib.
Yeri gəlmişkən, Rusiyanın Qara Dəniz Donanmasına məxsus “Moskva” admiral gəmisi Suriya sahillərinə yan alıb. Rusiya mətbiuatının məlumatına görə, NATO tərəfdən “təyyarə qatili” kimi tanınan və idarə olunan Kreyser raketləri daşıyan gəmi Atlantik okeanından Aralıq dənizə keçid edib. “İnterfaks”ın hərbi-diplomatik qaynaqlara istinadən məlumatına görə, gəmiyə kapitanı Serqey Tronev rəhbərlik edir.
Məlumata görə, sentyabrın 15-16 aralığında “Moskva” gəmisi Aralıq dənizindən “Admiral Panteleev” sualtı gəmisindəki Rusiya hərbi-dəniz qüvvələrinin operativ dəstəsini götürəcək.
