Son iki ildə Heydər Əliyev parkı üç dəfə yenidən qurulub
Əhalinin problemləri, zibilliklər hasarlarla gizlədilir
Milli Məclisin spikeri Oqtay Əsədovun qudası Alı Qocayev Binəqədi rayonu icra başçısı postu vəzifəsindən uzaqlaşdırılandan sonra rayon sakinləri bundan sonra yaxşı yaşayacaqlarını düşünürdülər. Ancaq Xaləddin Isgəndərov vəzifə başına gələn kimi vətəndaşların problemləri birə-beş artdı. Belə ki, sakinlərə satılan torpaqlara yenidən baxış keçirildi. Lazım olan haqqı verə bilməyənlərin mənzilləri “Sulutəpə olayı”nı yaşadı. Indi isə…
Vəd edilən problemlərin həlli
Öncə Binəqədinin kəndindən başlayaq. Buranın problemlərinə diqqət yetirək, sonra keçək, əsas mətləbə…
“Sentralnıy” adlanan ünvan rayonun “kənd Binəqədi”sinin mərkəzidir ki, bura getmək üçün “tretiy” deyilən məkanı arxada qoymalısan. Kəndə gedən yolda kosmetik də olsa işlər görülüb. Neft quyularının gətirdiyi çirkabları örtmək üçün yolun kənarları hasarlanır, bahalı daşlar bu divarlara hörülür. Bu çirkabı təmizlətdirmək əvəzinə icra hakimiyyəti onları görməmək üçün daha “böyük işlər”ə baş vurub. Halbuki, o yolları təmizlətdirməyə daha az vəsait sərf olunardı. Ancaq bu işi görən şəxslər daha rahat və daha çox qazanc yoluna əl atmağı özünə rəva biliblər.
Binəqədililər bu çəkilişdən narazıdırlar. Onlar deyirlər ki, yolun kənarına çəkilən hasar görüntü baxımdan yaxşı olsa da, ancaq narahatlıq doğurur: “Hər hansı bir qəza ölümlə nəticələnə bilər. Çünki idarəetməni itirən sürücünün avtomobili divara çırpılacaq. Bu isə ölüm deməkdir. Əgər yolun kənarını xarici ölkələrdəki kimi məftillərlə düzəltsəydilər, bu daha yaxşı olardı”.
Sakinlərlə söhbət zamanı məlum oldu ki, seçkilərə görə kəndin su problemi həll olunmaq üzrədir. Deyilənlərə görə, su xətlərinin çəkilməsi, çəkilən xətlərin yenidən təmir olunması üçün nə az, nə çox, düz 8 milyon manat vəsait ayrılıb. Sakinlər illərdir üzləşdikləri problemlərinin yaxın zamanlarda həll olunacağı günü səbirsizliklə gözləyirlər.
Park sökülür, sonra tikilir, sökülür, yenə tikilir…
Xaləddin Isgəndərov rayona icra başçısı gələn kimi Binəqədinin mərkəzində yerləşən Heydər Əliyev parkını təmirə bağlatdı.
Qeyd edək ki, Rəsulzadə qəsəbəsində yerləşən bu park 2001-ci ildə salınıb. Hazırda Samuxun icra başçısı olan Alı Qocayev bu rayonun başçısı olan zaman parkı bir dəfə əsaslı təmir etdirib.
2010-cu ilin dekabrından yenidənqurma işlərinə başlanılıb və 2011-ci ilin sonlarında istifadəsi nəzərdə tutulmuşdu. Tikinti işləriylə Ilham Əliyev də maraqlanıb. Deyilənlər kimi də oldu və bir ildən sonra, yəni 2011-ci ilin sonlarında park rayon sakinlərinin ixtiyarına verildi. Ancaq az keçmədi ki, yenidən təmirə dayandırıldı. Sonuncu dəfə istifadəyə veriləndə parkın giriş qapısı 10 sütundan ibarət olub ki, hündürlüyü 12,5 metr, uzunluğu isə 80 metr idi. Bundan əlavə, girişdə 25 metr hündülükdə bayraq dirəyi ucaldılıb.
Maraqlı bir faktı da diqqətinizə çatdıraq. Ötən il aprel ayında icra başçısı vəzifəsinə gələn Xaləddin Isgəndərov parkda əsaslı təmir və yenidənqurma işlərinin aparılmasını əmr edib. Işlər yekunlaşandan sonra icra başçısı əraziyə baxış keçirib. Işin nəticələrindən razı qalmayan Isgəndərov sökmək göstərişini verib. Hətta 10 sütunluq giriş qapısına da əlvida deyilib və parkda əkmək üçün gətirilən güllər sonradan geri qaytarılıb.
Beləliklə, son iki ildə park üç dəfə təmir edilib ki, bunun üçün də 4 milyon manatdan artıq vəsait xərclənib.
Parkda tamamlanma işləri bitmək üzrə olsa da, kim bilir, seçkidən sonra bəlkə yenidən təmirə bağlandı. Çünki sözügedən ünvanın sakinləri indiyə qədər rahatlıqla bu parkda istirahət edə bilməyiblər.
Problem içində boğulan binəqədililər
Binəqədi bəlkə də Bakının əhali sarıdan ən yüklənmiş rayonudur. Birincisi, burada məcburi köçkünlər daha çox məskunlaşıb. Ikincisi, rayonlarda dolanışıq olmadığı səbəbindən Bakıya gələrək burada çalışıb çörək qazanan insanların çoxu Binəqədi rayonu ərazisində yaşayır. Buna səbəb kirayə haqqının nisbətən aşağı olmasıdır.
Onu da qeyd edək ki, Binəqədi rayonu ərazisində yaşayanların problemi ilə Bakının və ölkənin başqa rayonlarında yaşayan əhalisinin problemləri arasında ciddi fərq yoxdur. Ölkənin hər yerində işsizlik, çox işləyib az əmək haqqı alma halları var və bu, Binəqədi sakinlərinə də aiddir.
Binəqədinin əsas problemlərdən biri də sənədsiz evlərlə bağlıdır. Məsələn, insanlar zamanında bələdiyyədən torpaq alaraq ev tikiblər. Indi isə bəlli olur ki, bu torpaqlar Dövlət Neft Şirkətinə məxsusdur. ARDNŞ isə onun torpaqlarını satan bələdiyyə orqanlarını deyil, sadə insanları məhkəməyə verib və onların evlərini başına uçurmaq istəyir. Yüzlərlə vətəndaş məhkəməyə üz tutub.
SSRI zamanı Bakının ən böyük parklarından olan və hazırda şəhid Ramiz Aboyevin adını daşıyan park da baxımsızlıq ucbatından dağılıb gedir.
Məlumatlara görə, parkın ərazisinin müəyyən bir hissəsi iş adamlarına satılıb. Və onlar da sözügedən ünvanda obyekt tikdiriblər.
Sakinlər deyirlər ki, Binəqədinin problermləri dizə qədərdir: “Problemləri saymaqla bitməz. Biz nə icra başçılarından, nə də deputatlardan bir xeyir gördük. Bir yeri 10 dəfə söküb tikirlər. Ancaq ortada heç nə yoxdur. Seçkidən seçkiyə deputatları, idarə rəhbərlərini görürük. Seçki bitən kimi hamı qeybə çəkilir. Milli Məclisə keçirilən sonuncu seçkilərdə hamı gəldi vədlər verdi. Indiyə kimi problemlərin heç bir həll olunmayıb”.
Ramin DEKO
