Rövşən Qəmbər: “Mövcud ictimai-siyasi vəziyyətdə demokratik qüvvələrin sırasından ikinci bir namizədin irəli sürülməsi müzakirə oluna bilməz”
Dünya Azərbaycanlıları Məclisi Azərbaycan vətəndaşlarına və xaricdə yaşayan həmvətənlərimizə ünvanlanan bəyanat yayıb.
Bəyanatda bildirilir ki, artıq qısa müddət ərzində fəaliyyət göstərməsinə baxmayaraq, Azərbaycan demokratik qüvvələrinin Milli Şurası bir sıra uğurlu addımlar atıb: “Bu cür uğurlu addımlardan birincisi demokratik prinsiplərə əsaslanmış hüquqi dövlətin Azərbaycanda qurulmasını istəyən müxtəlif partiyaların və sosial qrupların son 20 ildə Ən Böyük Birliyə nail olmasıdırsa, digər uğurlu addım da, qarşıdan gələn prezident seçkilərində Rüstəm İbrahimbəyovun Milli Şuranın vahid namizədi olmasına aid qəbul edilən qərardır!
Biz, Azərbaycanda demokratiyanın bərqərar edilməsi istiqamətində vətənimizdə və dünyada bütün imkanlarımızın və səylərimizin birləşdirilməsini, demokratik qüvvələrin vahid mövqedən çıxış etməsini dəstəkləyir və bu ilin oktyabrında keçiriləcək prezident seçkilərində Milli Şuranın vahid namizədi Rüstəm İbrahimbəyovu dəstəklədiyimizi bəyan edirik!
Bu gün yaranmış mövcud ictimai – siyasi vəziyyətdə demokratik qüvvələrin sırasından ikinci bir namizədin irəli sürülməsi və ya bu mövzunun müzakirə obyektinə çevrilməsi deyil, Rüstəm İbrahimbəyovun vətənimizə problemsiz qayıtması, ən az bir zamanda namizəd kimi qeydiyyata alınması və vətəndaşlarımız tərəfindən ən çox qorunan Şəxsiyyət olması mövzusu müzakirə oluna bilər!!
Dünya Azərbaycanlıları Məclisi adından vətənimizdə bütün demokratik qüvvələri ilk növbədə Milli Şurada daha sıx birləşməyə və vahid namizəd kimi R.İbrahimbəyovun prezident seçkilərində qələbəsinin təmin edilməsi üçün bütün səyləri birləşdirməyə çağırırıq!” (virtualaz.org).
Qeyd edək ki, Dünya Azərbaycanlıları Məclisinin sədri Müsavat başqanı İsa Qəmbərin qardaşı Rövşən Qəmbərdir və bəyanatı o imzalayıb.
