Vidadi Mirkamal: «Mehriban Əliyevanın namizədliyi nəbz yoxlamasıdır»
Mehman Əliyev: «Ilham Əliyevin 3-cü dəfə prezident seçiləcəyinə inanmıram»
YAP-ın qurultayında Ilham Əliyevin namizədəliyi irəli sürülsə də, bir müddət sonra bir neçə partiya Ilham Əliyevin həyat yoldaşı, millət vəkili Mehriban Əliyevanın namizədliyini irəli sürdü. Bu partiyalar öz seçimlərində israrlı olduqlarını bildirirdilər və digər qruplaşamadan gələn fikirlərə, etirazlara sərt cavab verirdilər.
Bütün bu hadisələrin start götürdüyü vaxtdan bu günə kimi Mehriban Əliyeva deyilnələrə münasibət bildirməyib, təkzib verməyib.
Mehriban Əliyevanın namizədlik məsləsi gündəmə gələndə bəzi ekspertlər bunu hakimiyyətdaxili gərginliyin göstəricisi kimi qiymətləndirmişdi.
Son günlər yayılan xəbərlər bu fikirləri təsdiqləyir.
Yayılan xəbərlərə görə, Mehriban Əliyevanın namizədliyini dəstəkləyən Demokratik Azərbaycan Dünyası Partiyasına (DADP) ciddi təzyiqlər başlanıb və partiyadan bu mövqedən geri çəkilmək tələb olunub. Bəzi məlumatlara görə isə, DADP-nin sədri Əlisahib Hüseynovu polis saxlayıb, partiyanın yetkilisi Sevda Xurşudova isə Gürcüstana deportasiya olunub.
Xatırladaq ki, bir neçə gün öncə Mehriban Əliyevanın namizədliyini dəstəkləyən Azərbaycan Azad Respublikaçılar Partiyası (AARP) və Azərbaycan Mübarizlər Partiyasına (AMP) da mətbuat konfransı keçirməyə imkan verilməmişdi.
Bütün bunlar hakimiyyətdaxili qruplaşmaların açıq müstəvidə mübarizəsini təsdiqləmiş olur.
Bəzi ekspertlər hesab edirdi ki, Mehriban Əliyevanın namizədliyi Ilham Əliyevin geri çəkiləcəyi ilə yekunlaşacaq və bu hakimiyyətin ehtiyat variantıdır.
Bəs, həmin ekspertlər indiki şəraitdə prosesləri necə qiymətləndirir?
Milli Şuranın üzvü Vidadi Mirkamal bildirdi ki, mən yenə də o fikrədəyəm ki, Ilham Əliyevin 3-cü dəfə namizəd olmasını beynəlxalq birlik müsbət qarşılamır və buna görə də Mehriban Əliyevanın namizədliyi gündəmə gətirilib: “Hakimiyyət bütün beynəlxalq birliklərlə iş aparır, öz namizədinin müsbət imicini formalaşdırmağa çalışır. Əgər bu təbliğat müsbət nəticə versə, Ilham Əliyevin namizədliyi saxlanılacaq, əks halda Mehriban Əliyeva hakimiyyətin namizədi olacaq. Mehriban Əliyevanın namizədliyi nəbz yoxlamasıdır. Mehriban Əliyevanın namizədliyini irəli sürən partiyalara təzyiqə gəlincə, bu böyük oyunun xırda detallarıdı və əsas oyunun mahiyyətin dəyişmir. Bu hakimiyyət Azərbaycanı sevənlərə qarşı birləşməyi bacarır”.
“Turan” informasiya agentliyinin rəhbəri Mehman Əliyev hesab edir ki, hakimiyyətdaxili problemlər var və Paşayevlərlə, Naxçıvan qruplaşması arasında ziddiyyət hökm sürür: “Naxçıvan qruplaşması nəyin bahasına olursa olsun Ilham Əliyevi vəzifədə saxlamağı düşünür. Ancaq mən düşünmürəm ki, Ilham Əliyev 3-cü dəfə prezident seçilsin. Hakimiyyət də bu riski anlayır. Ona görə də daha məqbul variant kimi Mehriban Əliyevanın namizədliyi görünür”.
Ilham Hüseyn
