«Yeni Azərbaycan»dan sonra YAP-çı deputat Kozlariçə hücum çəkdi
“Onun ermənipərəst mövqeyi həmişə ortalıqdadır və bu şeylərin şahidi olmuşuq”. Bu sözləri “Gündəlik Teleqraf” qəzetinə YAP icra katibinin müavini, deputat Siyavuş Novruzov Amerikanın keçmiş səfiri Riçard Kozlariçin fikirlərinə münasibət bildirərkən deyib. YAP-çı deputat daha sonra əlavə edib:
“Azərbaycan kiminsə nəzərinə görə inkişaf etmir, öz yolu və istiqaməti var. Ölkəmizdə demokratiya da, insan hüquqları da, söz və mətbuat azadlığı da ABŞ-dan qat-qat üstün və azaddır. Niyə indiyədək Quantanamo haqqında Kozlariç bir kəlmə söz demir? Başqa ölkələrdə işgəncələrlə bağlı bəyanat yayır, Quantanamada insanların dini-etnik baxışına görə başına gətirilən oyunlardan niyə danışmır?”
Siyavuş Novruzovun iddia edib ki, Azərbaycanın nüfuzu, beynəlxalq aləmdəki hörməti, Ermənistandakı vəziyyətin ağırlığı təbii ki, səfirə sərf eləmir.
Xatırladaq ki, Kozlariç Azərbaycanda insan haqları sahəsində problemlərin olduğunu bildirmiş, siyasi məhbus məsələsinə toxunmuşdu. O eyni zamanda ABŞ hökumətini Azərbaycanla bağlı da Misirdəki eyni mövqeyi tutmağa çağırmışdı.
Səfirin bu fikirləri isə Azərbaycan hakimiyyətində ciddi narahatlıq doğurub. Siyavuş Novruzovdan əvvəl “Yeni Azərbaycan” qəzetinin baş redaktoru Riçar Kozlariçi topa tutmuşdu.
Bəyim
