Onlar bildirir ki, sökülən evlərinə görə ayrılan kompensasiyanın bir hissəsini məmurlar mənimsəyir
Dünən günorta saatlarında Xətai rayonunun bir qrup sakini etiraz aksiyası keçirib. Etirazçılar “Ağ şəhər” layihəsi çərçivəsində sökülən evlərinə veriləcək kompensasiyanın miqdarından narazıdır.
400-ə yaxın sakin Bakı şəhər Icra Hakimiyyətinin binasının qarşısına yığışaraq, Hacıbala Abutalubovla görüşmək istəsələr də, icra başçısı onları qəbul etməyib. Bu qurumdan sakinlərə bildiriblər ki, sökülən evlərin hər kvadrat metri üçün 750-1000 AZN kompensasiya ayrılıb. Lakin sakinlər bu məbləğin az olduğunu bildirir və kompensasiyanı hər kvadrat metr üçün 1500-2000 manata qədər artırılmasını istəyirlər. Vətəndaşlar hesab edir ki, ayrılan vəsait əslində, çoxdur, sadəcə, məmurlar onlara az məbləğ verərək, qalanını mənimsəyirlər.
Bakı Şəhər Icra Hakimiyyətindən çıxaraq Prezident Administrasiyasına doğru yürüş edən şikayətçiləri əvvəlcə Administrasiyada dinləmək istəməsələr də, sonradan qurumun əməkdaşlarından biri gələrək, onların problemlərini dinləyib. Bundan sonra etirazçılar polis zorakılığı ilə Prezident Administrasiyasının qarşısındakı parka doğru sıxışdırılıb, ərazi ciddi nəzarətə götürülüb.
Aksiyaçılar bildirirlər ki, bir aydan artıqdır, aidiyyəti qurumlarla bu məsələni çözməyə çalışsalar da, heç nəyə nail ola bilməyiblər. Onlar müvafiq sərəncamdakı məbləği öz gözlərilə görmək istəsələr də, sənədi göstərən yoxdur.
Onu da qeyd edək ki, dünən etirazçılardan 2 nəfər polis bölməsinə aparılıb. Onlara qarşı qrup yaratmaqla bağlı ittiham irəli sürüləcəyi bildirilib. Lakin sakinlərin aramsız etirazlarından sonra hÿər 2 şəxs sərbəst buraxılıb.
Informasiya şöbəsi
