Eldar Namazov: «Hava limanında Rüstəm Ibrahimbəyova qarşı qanunsuzluğa yol verilərsə, insan axınının qarşısını almaq çətin olacaq»
Bu il prezident seçkisi ili olduğu üçün bütün dünyanın diqqəti Azərbaycandadır. Demokratik qüvvələrin bir araya gələrək Milli Şura yaratması, vahid namizədlə seçkidə iştirak etməyə qərar verməsi beynəlxalq aləmdə və cəmiyyətdə müsbət qarşılanır.
Milli Şuranın vahid namizədi Rüstəm Ibrahimbəyov iyulun 31-də Azərbaycana gələcəyini bildirib.
Rüstəm Ibrahimbəyovun Azərbaycana budəfəki, gəlişi əvvəlkilərdən bütün parametrlər üzrə fərqlənir.
Çünki Rüstəm Ibrahimbəyov ölkəyə tanınmış kinossenarist, görkəmli ziyalı kimi yox, həm də müxalifətin prezidentliyə vahid namizədi kimi gəlir.
Virtualaz.org saytının məlumata görə, hava limanının əməkdaşı bildirib ki, Rüstəm Ibrahimbəyovun Bakıya gələcəyi gün hava limanının mühafizə xidməti gücləndirilmiş iş rejiminə keçiriləcək, aeroportda qarşıdurma, gərginlik və qeyri-qanuni hərəkətlərin olmaması üçün təhlükəsilik məqsədilə müvafiq əlavə tədbirlər görüləcək. AZAL rəhbərliyi hansısa aksiya təşkilinə imkan verməyəcək.
Saytlardakı bu tipli xəbərlər “Rüstəm Ibrahimbəyova xəbərdarlıq” başlığı ilə tirajlanıb.
AZAL-ın xidmət rəisi Məhərrəm Səfərli qəzetimizə açıqlamasında bildirdi ki, saytlarda yazılanlar reallığı əks etdirmir və biz siyasi məsələlərə qarışmırıq.
Milli Şura sədrinin icra aparatının rəhbəri Eldar Namazov deyilənlərə münasibətində bildirdi ki, Rüstəm Ibrahimbəyov bir neçə dəfə hava limanında qanunsuz hallarla üzləşib və hava limanının işçiləri bu qanunsuzluğun iştirakçısı olublar: “Beynəlxalq hava limanının xidmət başında olan hər bir əməkdaşının borcu siyasi əqidəsindən, tutduğu mövqedən asılı olmayaraq hər bir vətəndaşı qanunauyğun formada qarşılamaq və yola salmaqdır. Hava limanının işçisi insanların siyasi baxışını təftiş edə bilməz. Digər tərəfdən, bu kimi hallar nə mənəvi dəyərlərə, nə hüquqa, nə də etikaya uyğun deyil.
Rüstəm Ibrahimbəyov iyulun 31-də Bakıya gələcək. Təbii ki, hava limanında onu yaxın dostları, jurnalistlər, həmkarları qarşılayacaqlar və həmişə də bu qarşılama olub. Ancaq Rüstəm Ibrahimbəyovun qarşılanması zamanı hansısa kütləvi axının olması hava limanın işçilərindən və rəhbərliyindən asılıdır. Rüstəm Ibrahimbəyova, onunla gələn insanlara, onu qarşılamağa gələn şəxslərə qarşı hansısa qanunazidd, əxlaqazidd hərəkətlər olmazsa, hansısa insan axınına da ehtiyac olmayacaq. Əgər hava limanında Rüstəm bəyə qarşı hansısa qanunsuz hərəkət baş verərsə, insan axınının qarşısın almaq mümkün olmayacaq”.
Ilham Hüseyn
