Bakının Bibiheybət qəsəbəsində jurnalistlər üçün inşa edilmiş binada 156-cı mənzilin sahibi məlum olub.
KİV-in İnkişafına Dövlət Dəstəyi Fondunun icraçı direktoru Vüqar Səfərli “Movqe.az”a bildirib ki, ölkə prezidenti İlham Əliyevin sərəncamına əsasən həmin mənzil “Xalq qəzeti”nin baş redaktoru Həsən Həsənova verilib.
Vüqar Səfərli deyib: “Cənab prezident bu barədə müvafiq göstəriş verib və jurnalistlər üçün inşa olunmuş binadakı 156-cı mənzil “Xalq qəzeti”nin baş redaktoru Həsən Həsənova təqdim edilib. Beləliklə, bütün mənzillər tam şəkildə paylanmış olub”.
Jurnalistlər üçün tikilən binanın açılış mərasimi iyulun 22-də keçirilib. Bina 156 mənzildən ibarətdir. Mənzillərin 84-ü ikiotaqlı, 68-i üçotaqlı, 4-ü dördotaqlıdır.
İyulun 22-də 155 mənzilin – ikiotaqlı və üçotaqlı mənzillərin hamısının, dördotaqlı mənzillərdən isə üçünün sahibi müəyyənləşmişdi.
Həsən Həsənova verilən mənzil dördotaqlıdır.
