“Texnikabank” işi üzrə Bakı Ağır Cinayətlər Məhkəməsində hakim Ramella Allahverdiyevanın sədrliyilə keçirilən məhkəmə prosesi yekunlaşmaq üzrədir. Artıq məhkəmə istintaqı başa çatıb, prokuror da çıxış edərək təqsirləndirilən şəxslərə kifayət qədər ağır cəza istəyib. Hazırda prosesdə vəkillərin çıxışı mərhələsidir.
Vəkillərin bir qismi əvvəlki məhkəmə iclaslarında çıxış etmişdi. Dünən təqsirləndirilən şəxslərdən daha 12 nəfərin vəkili müdafiə nitqilə çıxış edib. Vəkillər bildirib ki, hüquqlarını müdafiə etdikləri şəxslərə qarşı irəli sürülmüş ittihamlar məhkəmə prosesində sübuta yetirilmədi. Ona görə də vəkillər müvəkkillərinə bəraət verilməsini istədilər.
Qeyd edək ki, bu iş üzrə məhkəmə qarşısına çıxarılanlar sırasında “Texnikabank”ın idarə heyətinin keçmiş rəhbəri Samir Hüseynov, onun müavini Nicat Abdullayev, bankın Yasamal filialının keçmiş müdiri Azər Cəfərli, onun müavini Elnur Seyidov (AXCP sədri Əli Kərimlinin qaynı-red.), Abşeron, paytaxt və Xəzər filiallarının müdirləri və daha 17 nəfər var.
Məhkəmə prosesi avqustun 31-də digər vəkillərin çıxışıyla davam etdiriləcək.
