DADP sədrinin saxlanıldığı, icraçı katibin isə deportasiya edildiyi bildirilir
Ölkə başçısı Ilham Əliyevin xanımı Mehriban Əliyevanın namizədliyini dəstəkləyən Demokratik Azərbaycan Dünyası Partiyasına (DADP) ciddi təzyiqlər başlayıb. Məlumatlara görə, partiyadan bu mövqeyindən geri çəkilmək tələb olunur. Bəzi məlumatlara görə isə DADP-nin sədri Əlisahib Hüseynov polis tərəfindən saxlanılıb. Partiyanın yetkilisi Sevda Xurşudova isə Gürcüstana deportasiya olunub.
Bu məlumatla bağlı Əlisahib Hüseynov və Sevda Xurşudovanın mövqeyini öyrənmək mümkün olmayıb. Hər iki şəxsin mobil nömrələrinə zəng çatmayıb.
Yada salaq ki, bir neçə gün əvvəl də Mehriban Əliyevanın namizədliyini dəstəkləyən Azərbaycan Azad Respublikaçılar Partiyasına (AARP) və Azərbaycan Mübarizlər Partiyasına (AMP) da mətbuat konfransı keçirməyə imkan verilməmişdi. Bu barədə veteninfo.az-a AARP sədri Kamil Seyidov məlumat vermişdi. O, bildirmişdi ki, mətbuat konfransında Mehriban Əliyevanı dəstəkləyən partiyaların seçki bloku elan edilməli imiş. Tədbirin keçirildiyi yerə gəlincə, bunu üçün “Trend” Informasiya Agentliyinin konfrans zalı nəzərdə tutulubmuş. Adı çəkilən media qurumu ilə razılıq da əldə olunubmuş. Lakin son anda “Trend”dən bildiriblər ki, zal təmirə dayanıb.
Mehriban Əliyevanın namizədliyi ilə bağlı hakimiyyətdə birmənalı mövqenin olmadığı sirr deyil. Bu çbarədə mətbuatda xeyli yazılıb və indiyə qədər hakimiyyət düşərgəsindən yazılanlara əks-reksiya verilməyib. Xüsusilə hakimiyyətdəki “Naxçıvan” qruplaşması Mehribanın Əliyevanın namizədliyini qəbul etməməkdə israrlıdır. Hətta bu addım bəzi mülahizələrə görə Bakı-Şirvan elektoratını parçalamaq üçün atılsa belə.
Görünür, artıq hakimiyyət daxilində bu məsələ ətrafındakı fikir ayrılıqları pik həddə çatıb. Və Mehriban Əliyevanı dəstəkləyən partiyaların susdurulması əmri verilib.
Hikmət
