AXCP Gənclər Komitəsi bəyanat verdi
AXCP Gənclər Komitəsinin Suraxanı şöbəsinin üzvü Rahib Hacıyev 21 iyulda Suraxanı rayon Yeni Günəşli qəsəbəsində saxlanılıb. 7 nəfər polis formasında, 5 nəfər mülki formada olan şəxslər onu yaşadığı blokun qarşısında tutub, yaşadığı mənzilə aparıb.
Uzun axtarışdan sonra guya evdən narkotik maddə tapılıb. Iki gün müddətində prokurorluq orqanları Hacıyevin saxlanılması istiqamətində məlumat yaymayıb. Bu gün günün sonunda Rahib Hacıyev barəsində “narkotik maddələrin satışı” ittihamı ilə 2 aylıq həbs qətimkan tədbiri seçilərək Kürdəxanı istintaq təcridxanasına aparılması məlum olub. AXCP Gənclər Komitəsi bəyan edir ki, Rahib Hacıyevin saxlanılması siyasi fəaliyyəti ilə bağlıdır və həbs siyasi sifarişdir. Rahib Hacıyev partiya sıralarında məsuliyyətli, fəal vətəndaşlıq mövqeyi olan, işgüzar şəxs kimi tanınıb. Bu həbs Ilham Əliyev hakimiyyətinin Azərbaycanın müxalifətçi gənclərinə qərəzli münasibətinin nümunələrindən biridir. Bundan əvvəl cəbhəçi gənclərin sıralarından onlarla gənc şərlənərək həbs olunub, narkotik ittihamı ilə Cabbar Savalanlı, hazırda həbsdə olan Daşqın Məlikov həbs olunub. Bu cür sifarişli cəzalar cəbhəçi gəncləri Ilham Əliyevin avtoritar və korrupsioner hakimiyyətinə qarşı qətiyyətli və ardıcıl mübarizədən çəkindirmir. Hər həbs bizim bu hakimiyyətə qarşı mübarizəmizi daha ardıcıl edir.
AXCP Gənclər Komitəsinin məqsədi köklü dəyişikliklərdir, qanunsuz həbslərdən müdafiə olunmaq deyil. Biz avtoritarizmə qalib gələcəyik! Hər bir gənc həmyaşıdımızı bizimlə birgə mübarizənin ön sıralarında olmağa, Ilham Əliyevsiz cəmiyyət qurmağa çağırırıq.
