Qarşıdurma zamanı tərəflər bir-birilərinə daş və dəyənəklərlə hücum ediblər
Birləşmiş Ştatlar səfirliyinə doğru yürüş edən Mursi tərəfdarları təhrir meydanından keçərkən burada oturaq aksiyaya başlayan hökumət tərəfdarları ilə qarşılaşıblar. Qarşıdurma zamanı tərəflər bir-birilərinə daş və dəyənəklərlə hücum ediblər. Məlumata görə, qarşıdurmalarda 26 nəfər xəsarət alıb. Hücumlar zamanı, həmçinin, atəş səsləri də eşidilib. Hökumət qüvvələri qarşıdurmaları yatırmaq üçün bölgəyə hərbi texnika yeridib.
“Əl nur” məscidi qarşısında isə, minlərlə qadın bir araya gələrək Məhəmməd Mursiyə dəstəyini ifadə edib. Fəallar aksiyalar zamanı qadınlara qarşı göstərilən zorakılıqlara görə hökumətə qarşı şüarlar səsləndiriblər. Daha sonra Müdafiə Nazirliyinə doğru yürüş edərək nazir Əbdəl Fəttah Əl-Sissinin istefasını tələb ediblər.
Etirazçı, Kərimə Məhəmməd: “Biz Mursinin qayıtmasını istəyirik. Bu gün bura “Müsəlman qardaşlığının” legitimliyini müdafiə etmək üçün toplaşmışıq. Xalq qanuni yolla seçdiyi nümayəndəsini hökumətin rəhbəri kimi görmək istəyir. Biz demokratiyanın nə olduğunu təcrübədən keçirmişik. Ona görə də hərbi rejimə geri qayıtmayacağıq. Hərbi rəhbərliyin hakimiyyətə yiyələnməsi xalqın iradəsinə ziddir”.
Ölkədə davam edən iğtişaşlar fonunda Misir prezidenti ədli mənsur tərəfləri barışığa çağırıb.
Misir prezidenti, Ədli Mənsur: “Biz ölkədə yeni səhifələr açmaq istəyirik. Yeni həyat yolumuzda isə, nifrətə yer yoxdur. Misirdə yaxşı işlər görmək istəyənlərə dəstək olmalı, ölkəni dağıtmaq istəyənlərə isə əngəl olmalıyıq. Uğurlu gələcək üçün ümummilli barışığa nail olmaq lazımdır”.
Oxşar aksiyalar, eyni zamanda, Qaliub şəhərində də qarşıdurmalarla nəticələnib. Təhlükəsizlik qüvvələrinin məlumatına görə, burada bir nəfər başından aldığı güllə yarasından ölüb. Bir neçə nəfərin isə xəsarət aldığı bildirilir.
