Hotel tikintisinə görə metronun arxasındakı evləri sökürlər
«Kökümüz, mülkümüz burdadır. Niyə başqa yerə köçməliyik?»
Metronun “Içərişəhər” stansiyasının arxasında yerləşən evlər sökülür. Artıq 5 mənzil yaxınlıqda tikilən sahibi bilinməyən hotelin güdazına gedib. Sakinlərə iyulun 19-da bildiriş gəlib, ancaq onlara nə qədər kompensasiya veriləcək, bu hələlik məlum deyil…
“Nədən hotel tikintisinə görə buradan çıxmalıyıq”?
Sözügedən ünvanda “Təmiz Dünya” təşkilatı da yerləşir. Təşkilatın rəhbəri Mehriban Zeynalova deyir ki, son üç gündə hökumət nəsə edə bilərdi: “Ancaq etmədi. Bizim alver etmək fikrimiz yoxdur. Məqsədimiz ofisimizin fəaliyyətinin davam etməsidir. Əlverişli bir yerdə sığınacaq üçün şəraitli mənzil versələr, təbii ki, qəbul edərik. Ancaq bizə konkret söz deyilmir”.
Hadisə baş verən kimi təşkilat “Içərişəhər” Dövlət Tarix-Memarlıq Qoruğuna müraciət edib. Ancaq qoruq nümayəndələri ofisdə olsalar da, ofisin aktlaşdırılmasından imtina ediblər.
Mehriban Zeynalovanın sözlərinə görə, kompensasiya ilə bağlı hələlik onlarla heç bir söhbət aparılmayıb.
Ancaq başqa sakinlər onlara hər kvadrat üçün 2 min manat kompensasiyanın verilməsi barədə məlumat aldıqlarını deyirlər.
Ilyas Əfəndiyev küçəsi 18 ünvanında yaşayan Imran Ibrahimovun evinin sahəsi 16 kvadratmetrdir: “16 kvadrata 32 min manat verirlər. Bu pulla harada mənzil almaq olar? Tikinti işlərinə başlanılıb, biz artıq burada yaşaya bilmərik. Evimiz qəzalı vəziyyətdədir. Yaşamaq mümkün deyil, normal pul, ya da bazar qiymətlərinə uyğun kompensasiya verilsə, yaxşı olar”.
“Biz burada böyümüşük, burada yaşayırıq. Kökümüz, mülkümüz burdadır. Niyə başqa yerə köçməliyik? Nədən hotel tikintisinə görə buradan çıxmalıyıq?”, – deyə sakinlər sual edirlər.
Xarici vətəndaşa dəyib-dolaşan yoxdur
Indi beş mənzil qəzalı vəziyyətdə olsa da, onların evlərindən çıxarılması barədə qərar verilsə də, başqa sakinlər də narahatdır: “Içərişəhərin köhnəliyi gedir. Hər şeyi ləğv etmək istəyirlər. Bu gün bura, sabah isə başqa yerlər söküləcək. Hissə-hissə evləri sökəcəklər. Bu ərazilər ”Içərişəhər” Dövlət Tarix-Memarlıq Qoruğuna tabedir. Onlar bizə cavab vermirlər”.
Ilyas Əfəndiyev 29 ünvanında yaşayan Arzu adlı sakinin sözlərinə görə, Iran vətəndaşı Səriyyə Deqati qeyri-qanuni yolla pəncərə, qapı açıb: “1896-cı ilin binasıdır. Indi qəzalı vəziyyətə gətiriblər. Iran vətəndaşı 3-cü mərtəbədə istədiyini edir. Eyvanını 2 metr uzadıb. Heç kim ona bir söz demir. Indi binanı qəzalı vəziyyətə gətiriblər. Sabah da gəlib deyəcəklər ki, kvadratına 1500 manatdan veririk, köçün. Niyə köçməliyəm? Mən Içərişəhərdə doğulmuşam, burada böyümüşəm, niyə Əhmədliyə, Yeni Günəşliyə, ”Vosmoy”a getməliyəm? “Azneft”də ev versinlər, köçüm ora. Ya da bazar qiymətlərinə uyğun kompensasiya ödəsinlər, gedib istədiyim yerdə özümə ev alım”.
Arzu xanım deyir ki, hər yerə müraciət edib, ancaq heç bir nəticəsi olmayıb: “Bakı şəhər Icra hakimiyyətinə, ”Içərişəhər” Qoruq idarəsinə müraciət etdik. Hamı göz yumur, konkret cavab verilmir. Bizim sözümüzü eşidən yoxdur”.
Sakinlərdən iki tələb!
Başqa bir sakin deyir ki, bu günlərdə evinə sahə müvəkkili gəlib: “Həyətdə tikinti işləri gedirdi. Sahə müvəkkili yanında 5-6 adamla gəlib tikintiyə mane oldu, dağıtdılar. Dedilər ki, tikmək istəyirsinizsə, bir az aralı tik. Çünki bir az aralıda imkanlı şəxslərdən kimsə nəsə inşa etdirir. Yəni bizim işimiz ona mane olur. Deməli, biz tikəndə başqalarına mane oluruq. Ancaq imkanlı şəxslər istədiyini edə bilər? Bu nə deməkdir?”.
“Təmiz Dünya” təşkilatının hüquqi yardımından istifadə edən Münəvvər Qədirova deyir ki, bir aydır bura gəlir: “Ali təhsilli insanam 40 yaşdan yuxarı adamları işə götürmürlər, 60 yaşdan aşağı olanlara da təqaüd vermirlər. Indi nə etməliyəm? Acından ölməliyəm? Hər yerdə hotel tikirlər. Tikinti də mənzilləri qəzalı vəziyyətə gətirir. Bura gəlməkdə məqsədim mənə yardımın edilməsidir. Istəyirdim ki, iş tapım. Indi ofisi dağıdıblar, qalmışıq çarəsiz”.
Zinyət Rzayeva da təşkilata hüquqi xidmət üçün təşrif buyuranlardandır: “Burada hüquq xidməti yardımı edirlər. Məni səmimi qarşıladılar. Heç bir narazılığım yoxdur. Bəzi işlər var idi ki, onları görməli idik. Indi işimiz yarımçıq qalıb. Bu cür təşkilatlara ölkənin ehtiyacı var. Ofisin fəaliyyət göstərilməsi üçün imkan yaradılmalıdır”.
Hazırda beş mənzil qəzalı vəziyyətə gətirilsə də, ərazidə yaşayan 20-dən çox ailə durumlarının pis vəziyyətdə olduqlarını deyirlər. Tezliklə onlara da növbə çatılacağını deyən sakinlərin iki tələbi var: ya bazar qiymətlərinə uyğun kompensasiya, ya da indi yaşadıqları ərazidə təmirli mənzil.
Hoteli kim tikdirir?
“Bizim iki istəyimizdən başqa heç bir tələbimiz yoxdur. Ya bizə ev versinlər, ya da normal kompensasiya. 1500-2000 manatla biz heç yerdə ev ala bilmərik. Bura şəhərin ən mərkəz ünvanıdır. ”Sahil”də tikilən binada evlərin kvadratı 5 min manatdan aşağı deyil. Bəs bizə niyə 2 min manat təklif edirlər? Bu qiyməti kim müəyyənləşdirib? Hotel tikirlər deyə bizi buradan köçürməlidirlər?”, – sakinlər narazılıqlarını ifadə edirlər.
Içərişəhərlilər tikinti işlərinin arxasında kimin dayandığını bilmədiklərini söyləyirlər. Indiyə qədər onlara şirkət rəhbərliyindən kimsənin yaxınlaşmadığını bildirirlər: “Bizimlə heç kim söhbət etmir. Bilmirik ki, bu tikinti işlərini kim həyata keçirir. Gah deyirlər ki, Ədliyyə naziri, gah fövqalədə hallar naziri, gah da başqa bir nazirin bu işlərin arxasında dayandığını deyirlər. Biz isə heç nə bilmirik”.
Ramin DEKO
