Hakimiyyət «Miylarderlər Ittifaqı» sədrinin oğlunu «ilişdirmək» istəyir
Hakimiyyət daxilində “Milyarderlər Ittifaqı”nın sədri, baş nazirin sabiq müavini Abbas Abbasov problemindən birdəfəlik qurtulmaqla bağlı plan cızılır. Bu barədə məlumatı “Yeni Müsavat” qəzeti yayıb. Məlumatda deyilir ki, tamamilə mümkündür ki, yaxın günlərdə Abbas Abbasovun deputat oğlu Aydın Abbasov nümayişkaranə şəkildə cəzalandırılsın. Hətta onun həbs edilməsinin də gündəmdə olduğuna dair məlumatlar var. Xəbərdə deyilir ki, Aydın Abbasovu deputat olaraq bizneslə məşğul olmaqda suçlayıb əvvəlcə mandatdan məhrum edəcəklər. Sonradan isə barəsində vergidən yayınmaq maddəsi ilə cinayət işi başlanması da müzakirə mövzusudur.
Lakin Baş Prokurorluq dünən yaydığı açıqlamada Aydın Abbasov barədə hər hansı araşdırma başlanmayıb.
Yada salaq ki, Abbas Abbasov “Milyarderlər Ittifaqı”nın rəhbəri olduqdan sonra hakimiyyətin hədəfinə gəlib. O, Ilham Əliyevə sadiq olduğunu bildirsə də, bir neçə dəfə hökumətə yönəlik bəyanatlarla çıxış edib. Bu isə Abbas Abbasovla Azərbaycan hakimiyyəti arasında münasibətlərin daha da gərginləşməsinə səbəb olub. Onun Azərbaycanda yaxınlarının təqib olunmasına başlanılıb. Məlumatlara görə, Abbas Abbasovun yaxın qohumu “Qoçu” ləqəbli Qoca Quliyevin Gəncədə həbsi də məhz baş nazirin sabiq müavini ilə iqtidar arasındakı gərginlikdən qaynaqlanır.
Yeri gəlmişkən, Qoca Quliyevin həbsindən sonra onun müxtəlif cinayətləri barədə məlumatlar yayıldı. Həmin məlumatlarda Abbas Abbasovun bu şəxsi himayə etməsinin xüsusi vurğulanması onun da adının hansısa cinayətdə hallandırıla biləcəyinə işarə sayıla bilər. Elə məlumatlara görə, Aydın Abbasova qarşı qurulan planda Qoca Quliyevin cinayətlərindən də yararlanmaq niyyəti var. Bildirilir ki, deputata vergi ilə bağlı ittihamlar deyil, daha ağır suçlamalar irəli sürülə bilər. Hakimiyyət hələki bu planın üzə çıxmasında maraqlı deyil. Prokurorluğun yayılan məlumatlara dərhal reaksiya verməsi də bununla izah edilir.
Başqa məlumatlara görə isə Abbas Abbasovun Azərbaycanda olan qohumlarına baş nazirin sabiq müavini ilə əlaqələri kəsmələri üçün ciddi təzyiqlər edilir. Artıq bəzi qohumları Abbasovlar ailəsindən uzaq gəzməyə başlayıb.
Azad
