21 yaşlı Salaməddin Nağıyev Moskvaya bir neçə günlük qonaq gedibmiş…
Moskvada işləyən atasının yanına getmiş 21 yaşlı azərbaycanlı Salaməddin Nağıyev orada çayda boğulan 3 azyaşlı qız uşağını xilas etdiyi halda, özü batıb. Hadisə Lyuberetsk rayonunda baş verib. Gündüz saatlarında çayın kənarında gəzən Salaməddin yardıma çağıran qışqırıq səsi eşidib. Qızların çayda boğulduğunu görən azərbaycanlı gənc körpüdən suya tullanıb. O, iki qızın sahilə çıxmasına yardımçı olub.
Şahidlərin sözlərinə görə, hər şey qısa müddətdə baş verib. Hətta Salaməddin özü batdığını hiss eləyəndə də üçüncü qızın suyun üzünə çıxmasına kömək edib. Bir neçə dəqiqənin içində özü isə suda görünməz olub.
“O, qızların çıxmasına kömək etdi, özü isə suyun dibinə getdi. Biz onun xilas etdiyi qızlara kömək etdik, özü isə suyun dibinə getmişdi deyə, onu çıxarmaq bizim üçün mümkünsüz idi”, – deyə şahidlərdən biri bildirib.
Hadisədən dərhal sonra mərhumun yaxınları meyitin tapılıb çıxarılması işində yardım üçün yerli polis şöbəsinə müraciət ediblər. Lakin hadisə baş verən ərazi Lyuberetski və Ramenski rayonlarının birləşdiyi hiss olduğundan axtarış əməliyyatları bir qədər ləngiyib. Ona görə də mərhumun yaxınları dövlət strukturlarını gözləmədən öz şəxsi maliyyələri hesabına özəl xilasedicilər vasitəsilə axtarışlara başlayıblar.
“Biz dalğıclar tapdıq və saatı 4 min rubl olmaqla onlara pul ödədik. Güclü axın Salaməddini dərinliklərə aparıb salmışdı”, – deyə Salaməddinin yaxınları bildirib. Qeyd edək ki, Salaməddinin meyiti hadisədən beş gün sonra tapılıb.“Salamı qətiyyən tanımırıq. Amma o, ömür boyu bizim yaddaşımızda əsl qəhrəman kimi qalacaq”, – deyə öz həyatı bahasına xilas etdiyi qızların valideynləri Salaməddin haqda deyib.
Aytən
