“İlham Əliyev hiss edir ki, onu saymırlar və verdiyi qərarları yerinə yetirmirlər”
Asəf Quliyev: «Seçki dönəmində beynəlxalq aləmin hakimiyyətə sərt, prinsipial münasibətinin şahidi olacağıq»
Dövlət başçısı Ilham Əliyev son müşavirədə bildirib ki, cəmiyyətin 70 faizi ölkədə korrupsiya və rüşvətə qarşı real mübarizə aparıldığını düşünür. Bu bəyanat Azərbaycanın adının hər il korrupsiya və rüşvətin səviyyəsinə görə nüfuzlu beynəlxalq təşkilatların açıqladığı hesabatlarda ilk sıralarda yer aldığı reallığının olduğu halda deyilir. AXCP sədrinin müavini Asəf Quliyevlə söhbətə bu açıqlamaya münasibətini öyrənməklə başladıq.
– Hakimiyyətin içərisində bir isterika yaşanır. Cəmiyyətdə son iki ildə baş verən proseslər, ayrı-ayrı bölgələrdə narazılıqların baş qaldırması, sosial şəbəkələrdə hakimiyyətin kəskin tənqid olunması iqtidara təsirsiz ötüşməyib. Hakimiyyət gözəl anlayır ki, bütün bu proseslər hakimiyyətin nəzarətindən kənar baş verir. Zaman ötdükcə əhalinin böyük əksəriyyəti hakimiyyətdən üz döndərir. Dünyanın tanınmış mətbu orqanlarında Azərbaycandakı korrupsiya, rüşvətxorluqla bağlı informasiyaların verilməsi, ölkədən maliyyənin çıxarılıb xaricə aparılması, xaricdə hakim ailəyə məxsus əmlakların elan olunması – bütün bunlar hakimiyyətə bir mesajdır. Hakimiyyət, içərisində yaşanan təlaşı pərdələmək üçün cəmiyyətə yalan mesajlar verməyə çalışır. Iki gün öncə mətbuatda Rusiyanın dövlət başçısının Azərbaycana səfər edəcəyi ilə bağlı məlumat yayılmışdı. Amma bu məlumat yayıldığı kimi də təkzib olundu. Hakimiyyətə yaxın mətbu orqanlarında bu cür yanlış, reallıqdan uzaq məlumatların buraxılması sırf cəmiyyəti aldatmağa xidmət edir. Bütün dünyaya bəllidir ki, Azərbaycanda rüşvətxorluq, korrupsiya tüğyan edir və ona qarşı heç bir mübarizə aparılmır.
– Eyni müşavirədə dövlət başçısı Brüsselə etdiyi son səfərdən məmnun qaldığını bildirsə də, eyni zamanda Avropa Birliyini tənqid etməyi də unutmayıb. Rəsmi Brüsselin Azərbaycanla bağlı qəbul etdiyi son sərt addımları dilə gətirən I.Əliyev hakim komandaya bir növ bu bəyanatları, Qərbin təzyiqlərini nəzərə almamaq mesajını verməyə çalışırdı…
– Bu da hakimiyyət daxilində baş verənlərin bir təzahürüdür. Əgər hakimiyyət içində baş verənlər mətbuata tam formada çıxmırsa, bu o demək deyil ki, heç bir şey baş vermir. Hakimiyyət daxilində böyük bir parçalanma var. Hakimiyyətdə qruplararası qarşıdurmalar daha da dərinləşir. Prezidentliyə namizədliklə bağlı fikir ayrılıqları, ortada iki namizədin olması da bunun göstəriciləridir. Sözsüz ki, beynəlxalq aləm də Azərbaycan hakimiyyətinin daxilində baş verənlərdən xəbərsiz deyildir. Hazırda dünyada demokratikləşmə dalğasının geniş vüsət aldığı, dünyada yeni bir düzənin qurulduğu bir zamanda hər hansı bir diktatorun müdafiə olunması, bir ailənin hakimiyyətdə qalması müzakirə mövzusu ola bilməz. Azərbaycandakı rejimin beynəlxalq aləmdə heç bir siyasi dayağı yoxdur. Hakimiyyət ona görə daxildə bürokratik aparatını, yeganə dayağını saxlamaq üçün bu cür bəyanatlara əl atmağa məcburdur. Hakimiyyətin xarici siyasətinin tam iflasa uğradığı açıq şəkildə ortadadır. Hazırda verilən bəyanatların da ömrü uzun ola bilməz. Yaxın iki ayda – seçki dönəmində beynəlxalq aləmin hakimiyyətə sərt, prinsipial münasibətinin şahidi olacağıq.
“İlham Əliyev baş verənlərin qarşısında acizdir”
– Əgər bundan əvvəlki müşavirədə dövlət başçısı məmurları və onların yaxın qohumlarını sərt tənqid etmişdisə, bu dəfə bu baş vermədi. Halbuki ötən müddətdə dövlət məmurlarının övladlarının hərəkətləri ilə bağlı mətbuatda müxtəlif məlumatlar yayılıb. Zərdabın icra başçısının oğlu polisi döyüb, Anar Məmmədovla bağlı mətbuatda qalmaqalı məlumatlar gedib. Amma bu faktların heç birinə reaksiya verilmədi…
– Ilham Əliyevin son iki ildə verdiyi qərarlara nəzər yetirmək lazımdır. Ilham Əliyevin verdiyi qərarların, bəyanatların heç birinə əməl olunmur. Bir müddət əvvəl avtomobillərdə görüntünü məhdudlaşdıran plyonkaların sökülməsiylə bağlı qərar olsa da, daha sonra bu qərar unuduldu. Ona görə bir dövlət başçısı ki, məmur övladının maşınından plyonkanı yığışdıra, yumurtanın qiymətini sala bilmirsə, ondan nəsə gözləməyə dəyməz. Ilham Əliyev baş verənlərin qarşısında acizdir. Dövlət başçısı artıq bu reallığı anlamalı və ona qarşı addımlar atmalıdır. Ilham Əliyev özü hiss edir ki, onu saymırlar və onun verdiyi qərarlar yerinə yetirilmir. Bir neçə dəfə özü bunu hiss edib. Seçki yaxınlaşdıqca dövlət başçısı məmurlara qarşı addım ata bilmir. Çünki seçkinin taleyindən qorxur və sərt addımların nəylə nəticələnəcəyini bilmir. Daxildə məmurlar arasında ciddi qarşıdurmanın getdiyi bir zamanda bu, ehtirasları daha qızışdıra bilər. Bəzi informasiyalara görə, hakimiyyət daxilindəki dözülməz duruma etiraz olaraq 3 dövlət məmuru ölkəni tərk edib.
– Bu ərəfədə Əli Həsənov Ilham Əliyevin heç bir seçki təbliğatına ehtiyac olmadığını bəyan etsə də, hakim komandanın təmsilçiləri artıq bu istiqamətdə təbliğatlara başlayıblar. Bu addımı necə dəyərləndirmək olar?
– Əli Həsənovun son vaxtlar bu tipli müxtəlif açıqlamaları var. Əli Həsənovun bu açıqlamalarında heç bir məntiq yoxdur. Hər dəfə bir-birinə zidd bəyanatların verilməsi ciddi gülüş doğurur. Əvvəl belə bir açıqlama verilmişdi ki, Azərbaycanda seçkiöncəsi normal mühit yaradılacaq. Amma artıq seçkiyə az müddət qalsa da, ölkədə seçki ab-havası hiss edilmir. Hakimiyyət hələ yekun namizədlərinin kim olacağını müəyyən edə bilməyib. Ona görə də əslində hakimiyyət hazırda yeganə bir namizədin üzərində təbliğat aparmır. Amma hakimiyyət təbliğatında istədiyi effekti görmür. Hakimiyyətin nəzarətində olan KIV-lərin hamısı, yerlərdəki məmurlar iqtidarın təbliğatı ilə məşğul olsa da, özləri də gözəl bilirlər ki, apardıqları təbliğat özlərinə qarşı əks-təbliğata çevrilir. Artıq hakimiyyətin dediyi sözə inam yoxdur.
“Əliyevin namizəd olmayacağı çoxdan həll edilib”
– Mehriban Əliyevanın prezidentliyə namizədliyi ilə bağlı bu addımı atan şəxslər bu istiqamətdə israr edirlər. Hakimiyyət namizədlə bağlı qərarını dəyişə bilərmi?
– Məncə, sonda qərar dəyişəcək. Dövlət katibinin müavini Tomas Melia Bakıda olarkən 3-cü dəfə namizədliyin verilməsinin qırmızı xətti keçmək olduğunu bəyan edib. Dövlət katibinin kəskin şəkildə məsələni ortaya qoyması əslində Ilham Əliyevin namizədlik məsələsini o zaman həll etmişdi. Digər aparıcı dövlətlərdən də bu istiqamətdə ciddi təpkilər var. Ona görə düşünmürəm ki, Ilham Əliyev riskə getsin. Belə bir zamanda Mehriban Əliyevanın da namizədliyinin verilməsi təsadüfi deyil. Görünür, belə düşünülür ki, Ilham Əliyev son anda namizədliyini Mehriban Əliyevanın xeyrinə götürə bilər. Mehriban Əliyeva hakimiyyətdə parçalanmanı daha da dərinləşdirməmək üçün bir müddət ikinci namizəd kimi saxlanılacaq.
– Mübariz Qurbanlı bəyan edib ki, Ilham Əliyevin əleyhinə səs verə biləcək kəsim yalnız 4 faizdir. Bu yanaşmanı necə dəyərləndirirsiniz?
– Sosial şəbəkə istifadəçiləri arasında keçirilən son altı sorğuda Əli Kərimli Ilham Əliyevə qalib gəlib. Reallıq budur. Bu reallıqdan qaçmaq olmaz. Əgər Azərbaycanda real seçki keçirilərsə, bəlkə də Mehriban Əliyeva 4 faiz səs toplaya bilər. Ilham Əliyev bu faizi belə qazana bilməz. Ilham Əliyev özünə bütün inamı itirmiş və cəmiyyətdə qəbul olunmayan bir şəxsdir. Əgər normal seçki olarsa, hakimiyyətin səs qazanmaq imkanı olmaz.
“Naxçıvanda etirazların qarşısı alınmağa çalışılır”
– Naxçıvanda Milli Şuranın yerli şöbəsi yaradılıb. Bu addımı necə dəyərləndirirsiniz və gözləntiləriniz nədən ibarətdir?
– Naxçıvanda fəaliyyət göstərən siyasi partiyalar, QHT-lər, tanınmış ziyalılar bir yerə toplaşaraq Milli Şuranın yerli strukturunu yaradıblar. Naxçıvan, hakimiyyətin bir laborator bölgəsidir. Amma bütün bunlara baxmayaraq, əhalinin Milli Şura ətrafında birləşməsi, ona etimadını göstərməsi yüksək dəyərləndirilməlidir. Hakimiyyət hazırda Naxçıvandan iqtidara qarşı hər hansı etirazın qarşısını almağa çalışır. Biz Naxçıvandakı aktivliyi Naxçıvan Ziyalılar Hərəkatının yaranmasında da gördük. Hakimiyyət Naxçıvanda tədbirlərin Ictimai Palata səviyyəsində keçirilməsini belə həzm edə bilmir. Amma rejimin sərtliyinə baxmayaraq, Naxçıvanda Milli Şuranın yaranması göstərir ki, naxçıvanlılar bu hakimiyyətə qarşıdır və Milli Şuranın yanındadır.
– Heç kimin şübhəsi yoxdur ki, Azərbaycan hakimiyyəti seçkiləri saxtalaşdıracaq. Belə olan halda sizcə, Azərbaycanda postsovet məkanında bundan əvvəl baş vermiş demokratik inqilabların hansının ssenarisi reallaşa bilər?
– Bütün dünyada qəbul olunan reallıqlar var. Əgər bugünkü hakimiyyət xalqın haqqını tapdalayırsa, onun bütün hüquqlarını əlindən alırsa, xalqın qalxıb bu hakimiyyəti yıxmaq hüququ var. Cəmiyyət hazırda öz hüquqlarının qorunması üçün aktivlik göstərməlidir. Millət gücünü ortaya qoymalı və seçkinin demokratik keçirilməsinə nail olmalıdır. Ən azı demokartik qüvvələrin vahid namizədi kimi Rüstəm Ibrahimbəyovun namizədliyi təsdiqlənməlidir. Əgər bu olmursa, o zaman Ukraynadakı kimi xalq ayağa qalxmalıdır və hakimiyyətin istefasını tələb etməlidir. Əgər demokratik seçki mühiti yaranmazsa, o zaman Milli Şura Ilham Əliyevin seçkiyə qədər istefasını belə qabarda bilər. Bütün dünyada xalqlar qalxıb demokratiya və azadlığı özü təmin edir.
Xəyal
