“Boşluğu biz doldurmalı, heç kimi gözləmədən təbliğata başlamalıyıq”
İyulun 20-də Azərbaycan Xalq Cəbhəsi Partiyası (AXCP) Ali Məclisinin növbəti sessiyası keçirildi. Vətəndaş Həmrəyliyi Partiyasının qərargahında keçirilən sessiyada əvvəlcə Ali Məclis sədri Həsən Kərimov gündəlikdə duran məsələlər barədə məlumat verdi. Gündəliyə ölkədəki ictimai-siyasi vəziyyətin, seçki ilində partiyanın qarşısında duran vəzifələrin və cari məsələlərin müzakirəsi təklif olundu. Gündəlik layihəsi səsə qoyularaq qəbul edildi.
Gündəliyin təsdiqindən sonra partiya sədri Əli Kərimli ictimai-siyasi vəziyyət barədə çıxış etdi.
Heç kimi gözləmədən, Rüstəm İbrahimbəyovun seçki təbliğatına başlamalıyıq
Əli Kərimli çıxışına demokratik qüvvələrin Milli Şurasının yaranmasını və vahid namizəd irəli sürməsini qiymətləndirməklə başladı: “Ali Məclisin sonuncu iclasında inamla demişdim ki, yaxın zamanlarda ölkədə demokratik qüvvələrin böyük birliyinə nail olacağıq və olduq. Biz təxminən 1 ildir ardıcıl şəkildə Azərbaycan müxalifətinin qarşıdan gələn prezident seçkilərində vahid komanda kimi iştirak etməsini təbliğ edirdik. İlkin mərhələdə müəyyən müqavimətlər var idi. Bizim məqsədyönlü fəaliyyətimiz, xalqın sosial sifarişi, cəmiyyətin, ziyalıların mövqeyi müxalifətin birləşməsini qaçılmaz etdi və biz ilk dəfə olaraq böyük formatda bir araya gəldik. Bu böyük tarixi hadisədir və bunun qədrini bilməliyik.
Biz birliyə nail olmaqla hökuməti çaş-baş salmışıq, onun planlarını pozmuşuq, birliyin alınmayacağına olan ümidlərini boşa çıxarmışıq. Hakimiyyətin “müxalifət birləşə bilmir” kimi ənənəvi təbliğatı alt-üst olub.
Digər tərəfdən vahid namizədin seçilməsi, Rüstəm İbrahimbəyovun yekdilliklə qəbul edilməsi, beynəlxalq diqqəti də Azərbaycana yönəldib. Bu günlərdə ABŞ Konqresinin Helsinki Komissiyasında Azərbaycandakı seçkiqabağı vəziyyətlə bağlı müzakirə təşkil olundu. Bu, mühüm müzakirə idi, dostlarımız Eldar Namazovla Erkin Qədirli də orada iştirak edirdi. Müzakirə zamanı birmənalı mövqe ortaya qoyuldu, prinsipial sənədlər qəbul edildi. Artıq vahid namizədimiz dünya mətbuatının diqqətin cəlb edib.
Ancaq müxtəlif obyektiv və subyektiv səbəbdən Milli Şuranın strukturları tam formalaşa bilməyib və bu bizim məsuliyyətimizi artırır. Rüstəm İbrahimbəyov görkəmli bir ziyalıdır və heç bir siyasi qüvvəni təmsil eləmir. Bunun mənfi tərəfi də var və müəyyən boşluq yaradır. Biz Rüstəm İbrahimbəyovun seçki kampaniyasında səmimi şəkildə iştirak edib, bu boşluğu doldurmalıyıq. Biz heç kimi gözləmədən, qolumuzu çırmayıb seçki təbliğatına başlamalıyıq. Seçki komissiyalarının fəaliyyətinin sürətləndirilməsində bütün imkanlarımızı səfərbər etməliyik. Bu, iş bizim ürəyimzdən gələn işdir. Kimsə bu işə müxtəlif motivlərlə yanaşa bilər, kimsə ictimai basqının nəticəsində bu yolu seçə bilər. Ancaq biz bu birliyi hesabat xatirinə etməmişik. Azərbaycanda köklü dəyişikliklərə nail olmaq üçün bu birliyə imza atmışıq”.
“Azadlıq” qəzeti müxalifətin varlığının şərtidir
AXCP sədri sonra cəbhəçiləri çətin günlərini yaşayan “Azadlıq” qəzetinə dəstək olmağa səslədi. Hazırda “Qasid” yayım firmasının qəzetə olan borcunu ödəmədiyi üçün qəzetin Nəşriyyata borcu yarandığı və buna görə dayanmaq təhlükəsilə üzləşdiyi barədə məlumat verən Əli Kərimli cəbhəçilərə belə müraciət etdi: “Ötən aylar ərzində cəbhəçilər “Azadlıq” qəzetinə kütləvi şəkildə abunə yazılmaqla, qəzetin ayaqda qalmasına kömək edib. Buna görə bütün cəbhəçilərə təşəkkür edirəm. Ancaq bu, yetərli deyil. Bütün müxalifətin varlığının şərti olan bu qəzeti yaşatmalıyıq”.
Bu xüsusda AXCP sədri hakimiyyətin ölkədə qısa müddətdə kifayət qədət pupolyarlıq qazanan “Azərbaycan saatı” televiziya proqramının yayımına mane olması, bunun üçün hətta “kosmik xuliqanlığa” belə əl atması barədə də danışdı.
Cəbhəçi hər gün mübarizə aparmalıdır
AXCP sədri daha sonra təşkilatlanma işində partiya üzvlərinin üzərinə düşən vəzifəərdən bəhs etdi. Bildirdi ki, təşkilatlanmaq hər zaman AXCP üçün prioritet olub. Partiya müxtəlif təzyiqlərə baxmayaraq, Azərbaycanın bütün coğrafiyasında təşkilatlanır. Ancaq bu, kifayət deyil. “Biz təşkilatlanma işini yüksək şəkildə başa çatdırmalıyıq. Fəaliyyətimizi yeni çağın tələblərinə uyğun davam etdirməliyik. Cəbhəçi hər gün təşkilatlanma ilə məşğul olmalıdır. Cəbhəçilər ölkənin işıqlı sabahı üçün daha çox fədakarlıq etməlidir. Bu günkü beynəlxalq şərtlər, xalqın sifarişi bizi daha çox işləməyə vadar edir. Cəbhəçilər qarşıdan gələn seçkilərdə könüllülər ordusuna çevrilmlədir. Günün istənilən vaxtında cəbhəçi çağırışa səs verməlidir”, – deyə o, qeyd etdi.
Gəncləşmə siyasəti partiya üçün strateji məsələdir
Əli Kərimli partiyanın yerli təşkilatlarının gənclər siyasətinə də önəm verməli olduqlarını dedi: “Biz hər zaman gənclərin önünü açmağa çalışmışıq. AXCP yarananda da gənclər prosesin önündə gedib. Bu gün bizim çox güclü gənclər komandamız var. AXCP Gənclər Komitəsi indiyə qədər heç bir təşkilata müyəssər olmayan bir işi görür. Gənclərimiz bütün Azərbaycan üzrə təşkilat komitəsi yaratmağı qarşılarına məqsəd qoyub. Biz bu təşkilatlanmaya dəstək verməliyik. Gənclərin təşkilatlanması partiya üçün strateji məsələdir, bir nömrəli prioritetdir. Gəncləşmə siyasəti yalnız gənclər komitəsinə kömək etməkdən ibarət deyil. Gəncləşmə siyasəti partiyanın yerli strukturlarında gənclərin irəli çəkilməsində də özünü ifadə etməlidir. Gənclərə səlahiyyətlər verilməlidir”.
Qadınların prosesdə iştirakı vacibdir
AXCP sədri eyni şeyləri partiyanın qadınlar siyasətinə də aid olduğunu əlavə etdi: “Apardığımız mübarizədə qadınlar həmişə fəal olublar. Ancaq hazırda etiraf edək ki, qadınların təmsilçiliyi yüksək səviyyədə deyil. Azərbaycan xanımları özlərini bu ölkənin tam hüquqlu vətəndaşı hissi etməyənə qədər, ölkənin etibarlı, dayanıqlı demokratiyasını qurmaq mümükün deyil. Azərbaycanın gəlcəyi həm də Azərbaycan xanımlarının bu günkü mövqeyindən asılıdır”.
İnternetin imkanlarından maksimum istifadə etmək lazımdır
Əli Kərimli növbəti vəzifə kimi internetləşməni və sosial şəbəkələrdə fəal iştirakı göstərdi. O, bir neçə nümunə gətirərək, internetləşmənin siyasi mübarizədə vacib faktor olduğunu diqqətə çatdırdı: “Bir neçə gün öncə Rusiyalı bloqqer Novalnı həbs olundu. Bu həbs xəbəri yayılan kimi insanlar sosial şəbəkələrdə çağırış etdilər. Bir neçə saatın ərzində Moskavanın mərkəzinə on minlərlər insan toplandı və 26 şəhərdə mitinq təyin olundu. Rusiya hökuməti başa düşüdü ki, sosial şəbəkələr Rusiya cəmiyyətini də dəyişib və kompromisə getdi – hazırda Novalnı azadlıqdadır. Biz internetin gücünü Türkiyədə, Ərəb inqilablarında da gördük. Azərbaycanda sosial şəbəkələrin rolunu 10 mart, 12 yanvar aksiyalarında hiss etdik. Cəbhəçilər bu prosesdə də aktiv olmalıdır. Düzdür, sosial şəbəkələrdə cəbhəçilər ən güclü mövqeni tutur. Ancaq bu daha yüksək formada olmalıdır. Artıq siyasət sosial şəbəkələrdə formalaşır, insanlar internetdə müzakirələr aparır, qərarlar qəbul edirlər. Bu gün internet qədər effektiv vasitə yoxdur”.
Vahid namizədin təbliğatı bizim üçün prioritetlərin prioritetidir
AXCP sədri sonra yenidən Milli Şuranın vahid namizədinin kampaniyasını aparmaq məsələsindən bəhs etdi. Bildirdi ki, ən mühüm məsələ Milli Şuraya, onun vahid namizədinə dəstək verməkdir: “Bu, bizim üçün prioritetlərin prioritetidir. Vaxt itirmədən, hər günümüzü bu işə həsr etməliyik. İlk növbədə ölkə boyu Milli Şuranın vahid namzidənin, rüstəm İbrahimbəyovun namizədliyini irəli sürməkdən ötrü təşəbbüs qrupları yaradılmalıdır. Ölkənin hər yerində yüzlərlə üzvü olan təşəbbüs qrupları fəaliyyət göstərməlidir. Partiyanın bütün üzvlərinin bu işdə könüllü iştirakını təmin etmək üçün siyahılar tutulmalıdır. Hər kəs hansı işi görə biləcəyini konkret göstərməlidir. Hakimiyyətin saxtakarlığının qarşısın almaq üçün ciddi kampaniyaya hazır olmaq lazımdır. Müxtəlif təbliğat vasitələrindən istifadə edilməlidir. Bütün seçki məntəqələrində kifayət qədər müşahidəçimiz təmsil olunmalıdır. Təcrübəsi olan bütün cəbhəçilər seçkiyə səfərbər olunmalıdır. Seçkiyə az vaxt qalıb. Azərbaycan cəmiyyətinə seçki ab-havası gətirmək cəbhəçilərin vəzifəsidir. Demokratik qüvvələrin qələbəsi naminə cəbhəçilər bütün bacarıqlarından istifadə etməlidilər”.
Əli Kərimlinin çıxışından sonra müzakirələr başladı.
“Böyük risk olmadan, böyük uğur qazanmaq olmaz”
AXCP Xəzər rayon şöbəsinin sədri Hacı Əmrulla bildirdi ki, seçki kampaniyası aparmaq üçün zəruri işlərin görülməsinə başlanıb, 2 dayaq dəstəsi yaradılıb: “Fəaliyyətimiz artan xətt üzrə davam edir. Sona qədər mübarizəmizi davam etdirəcəyik. Vahid namizədin seçki kampaniyasında bütün gücümüzü səfərbər edəcəyik”.
AXCP Masallı rayon təşkilatının sədri Laçın Əsgərli bildirdi ki, indiki dövr ən məsuliyyətli dövrdür və bu imkandan maksimum istifadə etmək lazımdır: “Əgər bu mübarizənin sonu həbsdirsə, ölümdürsə, biz buna da hazırıq. Bəzən deyirlər ki, xarici dəstək lazımdır. Mənim bu ifadədən xoşum gəlmir. Bu ölkədə dəyişikliyi biz etməliyik. Yeganə güc xalqdır, ən böyük dəstək cəmiyyətin dəstəyidir”.
AXCP-nin Nəzarət Təftiş Komissiyasının sədri Rahim Hacıyev bildirdi ki, böyük miqyaslı səfərbərlik, cəmiyyətin böyük qətiyyəti olmadan dəyişiklik mümkün deyil: “Böyük risk olmadan, böyük uğur qazanmaq mümkün deyil. Cəmiyyətin istəyi böyük olmalıdır. Siyasət həftəlik, aylıq iş deyil. Siyasət çox çətin və hər gün iş tələb edən peşədir. AXCP ən güclü təşkilatdır. Ancaq bu il qarşımızdakı mübarizənin məsuliyyəti də böyükdür. Biz qarşımızdakı çətin döyüşə adekvat fəaliyyət göstərməliyik. Biz özümüzü bu işə proqramlaşdırmalıyıq”.
AXCP Neftçala rayon şöbəsinin sədri Əflatun Əhmədzadə Neftçalada cəbhəçilərin fəaliyyətindən, seçkiyə hazırlıqlardan, rayondakı çətin vəziyyətdən söhbət etdi: “Bizim müşavirələrimizə polis müdaxilə edir, hər addımımız izlənilir. Ancaq biz təşəbbüs qrupunu yaratmağa çalışacağıq, son nəfəsimizə qədər mübarizə aparacağıq”.
AXCP Ağstafa şöbəsinin sədri Sövdəgər Mürsəlqulu da rayonda müşavirələrə polisin müdaxilə etdiyini, insanları qorxudaraq mübarizədən çəkindirməyə cəhd göstərdiyini bildirdi: “Mən təzyiqləri sadalamaqla özümü sığortalamaq istəmirəm. Biz bütün şərtlər daxilində mübarizəmizi davam etdirməliyik. Biz seçkiyə vahid namizədlə getməliyik, vahid namizədimizi dəstəkləməliyik”.
AXCP Göyçay rayon şöbəsinin sədri Şahverdi Mikayılov bildirdi ki, təşkilatlanma məsələsi Göyçayda da uğurla gedir. Gənclər komitəsi, qadınlar şurası və 15 kənddə dayaq dəstəsi yaradılıb.
AXCP Ismayıllı rayon şöbəsinin sədri Sadiq Umudov bildirdi ki, ölkədə dəyişiklik üçün mühüm məqam yarandığı hiss olunur. Həmçinin beynəlxalq aləmin də Azərbaycan xalqına demokratiya mübarizəsində dəstək verəcəyinə inam var: “Vahid namizədin təbliğatına öz partiya liderimizin namizədliyi kimi çalışmalıyıq”.
“Heç bir iddiamız olmadan ən böyük işlər görməyə hazırıq”
AXCP Rəyasət Heyətinin üzvü Seymur Həzi bildirdi ki, cəbhəçilər narazı xalqı etirazçı təbəqəyə çevirməklə dinc mübarizəni davam etdirir: “Bu gün mübarizə aparmaq yox, mübarizə aparmamaq riskdir. Bu cür davam etsə, ölkə idarəolunmaz mərhələyə keçə bilər və hər kəs üçün risk o zaman yaranar. Biz heç bir iddiamız olmadığı halda, heç bir vəzifə istəmədən, öz namizədimiz olmadan belə, ən böyük iş görmək, seçki kampaniyasında iştirak etmək niyyətindəyik. Və bizim iddiasızlığımız xalqa ən böyük mesajımızdır. Bizi bu yolda heç nə qorxuda bilməz”
AXCP Ali Məclis sədrinin müavini İradə Əliyeva bildirdi ki, cəbhəçilər bütün sahələrdə cəmiyyətə nümunə olmalı, mübarizəni də şəxsi nümunələr kontekstində aparmalıdır: “Biz qəhrəman insanlarıq. Ancaq, bu bizi arxayın etməməlidir. Bütün gücümüzlə mübarizəni davam etdirməliyik. Bəziləri bu ili ”son şans” adlandırır. Bununla razı deyiləm. Biz ölməyə hazırlaşmırıq. Hər şey qarşıdadır, bizim kimi insanlar üçün son şans ola bilməz. Ən çətin iş hakimiyyətə gəldikdən sonra başlayacaq”.
“Ölkəni azğınlardan təmizləyəcəyik”
AXCP Gənclər Komitəsinin sədri Əbülfəz Qurbanlı rəhbərlik etdiyi qurumun fəaliyyəti və üzləşdiyi çətinliklərdən danışdı: “Fevral ayından təşkilat komitələri yaratmağa başlamışıq. Bu işdə şöbə rəhbərlərinin fədakarlığı böyük rol oynayır. Sentyabrda Gənclər Komitəsinin qurultayını keçirməyi planlaşdırırıq”.
Qarabağ qazisi olan AXCP Saatlı rayon şöbəsinin üzvü Zaur Ağayev bildirdi ki, yaxın zamanlarda Qarabağ qazilərinin Milli Şuraya dəstək bəyanatı olacaq.
AXCP Samux rayon şöbəsinin sədri Firqayıl Qasımov bildirdi ki, Demokratik Azərbaycanda yaşamaq uğrunda mübarizəni davam etdirəcəklər.
AXCP Sumqayıt şöbəsinin sədri İsa Qurbanov şöbəsinin fəaliyyəti haqda məlumat verdi: “Biz bu prosesdə son damla qanımıza qədər iştirak edəcəyik və azğınlardan ölkəni təmizləyəcəyik”.
“İbrahimbəyovun namizədliyinin üstünlüklərini dərk etməliyik”
AXCP sədrinin müavini Fuad Qəhrəmanlı bildirdi ki, dinc mübarizə yerində saymaq deyil, təşkilatlanaraq daha da böyümək, kütləviləşmək deməkdir: “Avtoritar rejimə qarşı yeganə mübarizə üsulumuz resurslarımızı artırmaqdan ibarətdir. Bizim kimi təşkilatlanmış qüvvələr cəmiyyəti hazırlamaqla məşğul olmalıdır. Biz 20 ildir bu yolu gəlmişik. Illər keçdikcə biz yox, hakimiyyət itirir. Hər il hakimiyyətə beynəlxalq təzyiqlər artır, hakimiyyətdaxili ziddiyyətlər meydana çıxır. Ona görə də ”son şans” fikri düzgün deyil. Biz Rüstəm Ibrahimbəyovun namizədliyini yüksək şəkildə müdafiə etməliyik və bu namizədin bizə verdiyi üstünlükləri dərk etməliyik”.
AXCP Rəyasət Heyətinin üzvü Məhəmməd Talıblı təbliğat kampaniyasının aparılmasından, namizədin cəmiyyətə təqdim edilməsi qaydalarından danışdı: “Siyasət həvəskar insanların işi deyil. Siyasət peşəkar adamların işidir, daimi prosesdir. Bu məsələdə məğlubiyyət də, qalibiyyət də var. Bu, bir prosesdir və prosesi düzgün qiymətləndirmək lazımdır. Biz passiv tərəfdarları aktiv etirazçılara çevirməliyik”.
“Vahid namizədin təbliğatını öz təbliğatımız kimi aparmalıyıq”
Sessiyanın sonunda Əli Kərimli yekun nitqini söylədi: “Azərbaycanın bütün bölgələrində Milli Şuranın təbliğatı ilə məşğul olmalıyıq. Bilirəm ki, çətinliklər var, Lənkəranda, Lerikdə, Ağdaşda və digər rayonlarda sərt müdaxilələr olub. Ancaq müşavirə keçirməyə müdaxilə edilməsi o demək deyil ki, tədbir baş tutmayıb. Əksinə, bütün dünya görür ki, bir qrup idealist insan haqq-ədalət uğrunda döyüşür.
Biz cəbhəçilər hər cür məhrumiyyətlərdən keçmişik. Biz hakimiyyət dəyişikliyinin real görünmədiyi zamanlarda da yolumuzdan dönmədik. Çünki biz başqa cür yaşaya bilmirik. İndi isə dəyişiklik üçün şanslar hər gün artır. Hakimiyyət dəyişikliyi mütləq olacaq. Biz bu qələbə üçün ciddi şəkildə çalışsaq, dəyişiklik tezliklə olacaq.
Xalq Cəbhəsi, xalqın cəbhəsidir. Biz yorulmadan mübarizəni davam etdirməliyik. Hər gün özümüzə hesabat verməliyik ki, mən bu ölkə üçün nə etdim.
Avqustun birinci yarsına kimi seçki hazırlıqları başa çatmalıdır. Təlimatlara uyğun olaraq, hər gün fəaliyyət göstərməli və bu kampaniyaya öz kampaniyamız kimi qoşulmalıyıq”.
İlham Hüseyn
