Ədliyyə Nazirliyi yox deyir, məlumatlarda isə bildirilir ki, məhkumlar həbsxanadakı şəraitə etiraz ediblər
Qaradağ rayonunda yerləşən 12 saylı Cəzaçəkmə Müəssisəsində məhkumluq həyatı yaşayan şəxslər qiyam qaldırıb. Hadisə dünən baş verib. Xəbəri AzNews.az yayıb. Məlumata görə, qiyamın böyümədən yatırdılmasına çalışılıb. Bununla belə həbsxananın qarşısına xeyli sayda əli avtomatlı əsgərlər cəlb edilib.
Penitensiar Xidmətin informasiya şöbəsinin rəhbəri Mehman Sadıqov isə məsələ ilə bağlı açıqlamasında qiyam xəbərini təsdiqləməsə də, 12 saylı Cəzaçəkmə Müəssisəsinə xüsusi konvoyların göndərildiyini bildirib. O, bunun məhkumların Müalicə Müəssisəsinə köçürülməsi ilə bağlı olduğunu deyib.
Daxil olan məlumatda isə israr edilir ki, həbsxanada baş verən həqiqətən də qiyamdır. Məhkumlar həbsxanadakı şəraitə etiraz olaraq bu yola baş vurublar.
Mehman Sadıqov ANS PRESS-ə isə deyib ki, cəzaçəkmə müəssisəsinin qarşısında məhkumlar toplaşdığı və hüuqq-mühafizə orqanalrının da orda olmsı səbəbindən bu fikir yayılıb. Lakin əslində heç bir qiyam yoxdur.
“Hər həftə olduğu kimi Qaradağ rayonundakı cəzaçəkmə müəssisələrində məhkumların yerləşdirilməsi və müalicə keçən məhkumların cəzaçəkmə müəssisələrinə paylaşdırılması prosesi gedir. Bu gün də, məhkumlar lazımı cəzaçəkmə müəssisələrinə yerləşdirilirdi. Kimsə məhkumları kütləvi şəkildə bir yerdə görüb və qiyam olduğunu düşünüb”.
