Konqresindəki müzakirənin yekun sənədindən: “Azərbaycan demokratiya ilə avtoritarizmin yolayrıcındadır”
Xəbər verildiyi kimi, iyulun 16-da ABŞ Konqresində Helsinki Komissiyasının təşkil etdiyi “Problemli tərəfdaş: Azərbaycanda artmaqda olan avtoritarizm” adlı müzakirə keçirilib. Müzakirənin sonunda yekun sənəd qəbul edilib. “Media forum”un təqdim etdiyinə gör, yekun sənəddə deyilir ki, ABŞ Azərbaycanın və onun xalqının dostudur.
“ABŞ-ın Azərbaycan hökuməti ilə ümumi maraqları var. Bu sıx əlaqələr bizim illərlə davam edən əməkdaşlığımızda çox önəmli faktor olub. Biz əlaqələrimizi daha da gücləndirmək istəyirik.
Azərbaycan yolayrıcındadır. Bir yol demokratiya, iqtisadi tərəqqiyə, o biri yol isə avtoritarizm, korrupsiya və sonunda da iqtisadi durğunluq və tənəzzülə aparır. Bu payızda keçiriləcək prezident seçkisi Azərbaycanın bu yollardan hansını seçməsində önəmli fürsət olacaq. Bu seçkidə bütün namizədlərə heç bir qorxusuz, təqiblərsiz, azad kampaniya aparmaq, sərbəst hərəkət etmək imkanı verilməlidir. Jurnalistlərə heç bir qondarma ittihamla həbs qorxusu, fiziki hücum, peyk yayımlarına maneə olmadan seçki kampaniyasını azad şəkildə işıqlandırmaq şəraiti yaradılmalıdır.
Qeyri-hökumət təşkilatları, dini qurumlar və vətəndaş cəmiyyətinin başqa elementlərinə hər hansı bürokratik, ya da hüquqi maneələr olmamalıdır. Azərbaycan cəmiyyəti inanmalıdır ki, onun hökuməti hansısa kiçik bir qrupun deyil, şəffaf, hüquqi normalar çərçivəsində hamının maraqlarına uyğun şəkildə idarə edilir. Bunlar Azərbaycan Respublikasının BMT, ATƏT və başqa beynəlxalq təşkilatlarda üzərinə götürdüyü öhdəliklərdir”, – deyə sənəddə qeyd olunur.
