Milli Şura gənc fəallar Ülvi Həsənli, Məcid Mərcanlı və Kənan Qasımlının həbsilə bağlı bəyanat verib. Bəyanatda deyilir:
Demokratik Qüvvələrin Milli Şurası iyulun 14-ü Milli Şuranın İcra Aparatının və Seçki Qərargahının sosial şəbəkələr üzrə xidmət rəhbəri, Azad Gənclik Təşkilatının İdarə Heyətinin üzvü Ülvi Həsnli, eyni təşkilatın İdarə Heyətinin başqa bir üzvü Məcid Mərcanlı və “NİDA” Vətəndaş Hərəkatı İdarə Heyətinin üzvü Kənan Qasımlının həbsini gənclərə qarşı aparılan repressiyanın tərkib hissəsi sayır. “NİDA”çı gənclərin həbsiylə başlayan bu repressiv siyasətin davamı narahatlıq doğurur. Ölkənin seçki prosesinə qədəm qoymağa hazırlaşdığı bir zamanda baş verən hadisələr seçkinin anti-demokratik ab-havada keçəcəyinə daha bir işarədir.
Milli Şura gənclərin qondarma ittihamlarla həbsini hakimiyyətin cəmiyyətdə xof yaratmaq, siyasi aktivliyin qarşısını alınmaq cəhdi kimi dəyərləndirir. Milli Şura Azərbaycan hakimiyyətinin siyasi oponentlərinə və müstəqil mövqedən çıxış edən gənclərə qarşı qanunsuz əməllərini pisləyir və siyasi motivlərlə həbsə atılanların dərhal azad olunmasını, siyasi təzyiqlərə son qoyulmasını tələb edir.
