4 nazir istefa verib müxalifətə qoşuldu; «Müsəlman qardaşları»nın baş qərargahı dağıdıldı
Misirdə prezident Məhəmməd Mursinin istefası tələbilə etiraz aksiyası keçirənlər artıq ilk siyasi qələbələrini qeyd edə bilərlər. Misir hökumətinin dörd naziri ölkə müxalifətilə həmrəylik nümayiş etmək və onlara dəstək məqsədilə vəzifələrindən istefa verib.
“Əl-Ərəbiyyə” telekanalının yaydığı məlucmata görə, istefa verənlər turizm naziri Hişam Zauzuu, ətraf mühit naziri Xalid Fəhmi, parlament məsələləri və planlaşma naziri Hakim Bocato, informasiya texnologiyaları və kommunikasiya naziri Atif Hilmidir. Istefa verən nazirlərin heç birinin prezident Mursinin də təmsil olunduğu “Müsəlman qardaşları” partiyasına aidiyyəti yoxdur.
Etirazçılar “Müsəlman qardaşları” partiyasının baş qərargahına hücum edərək, oranı dağıdıblar. “Frans Press” agentliyinin bu barədə yaydığı məlumatda bildirilir ki, qərargaha hücum edənlər mebelə qədər bütün əşyaları götürüb aparıblar. Şahidlərin sözlərinə görə, hücum ərəfəsində partiya üzvləri qərargahı tərk ediblər.
Misirdə baş verənlərlə əlaqədar Milli Ordu da mövqeyini açıqlayıb. Misir Ordusunun generalı Əbdül Fəttah Əl-Sisi bəyan edib ki, hakimiyyət 48 saat ərzində əhalinin tələblərini yerinə yetirməlidir. Əgər bu baş verməsə, hərbçilər özünün “yol xəritəsi”ni ortaya qoyacaq.
Məlumata görə, Misirdə bazar günü keçirilmiş etiraz aksiyalarında qarşıdurma nəticəsində 10 nəfər həlak olub, 600 nəfər yaralanıb. Daxili Işlər Nazirliyi bəyan edib ki, etiraz aksiyalarında 14 milyona yaxın etirazçı iştirak edib.
Etirazçılar da prezident Mursiyə iki gün vaxt veriblər.
Xatırladaq ki, etirazçılar prezident Məhəmməd Mursini avtoritar idarəçiliyə qayıtmaqda, o cümlədən ölkəni “Müsəlman qardaşları”nın maraqlarına uyğun idarə etməkdə günahlandırır.
azadliq.info
