Azərbaycan iqtidarının repressiya siyasəti Türkiyə mətbuatında
Türkiyənin bir neçə dildə yayımlanan media orqanı “Timetürk” Azərbaycanda Ilham Əliyevin prezident seçkisi öncəsi müxalifətçilərə qarşı repressiya siyasəti, o cümlədən narkotik şərləməsilə gənc fəalların həbsxanaya atılmasından bəhs edən məqalə hazırlayıb. “Əliyev müxalifətçiləri hətta su bəhanəsilə həbsə atdırır” başlıqlı məqaləni təqdim edirik:
***
“Human Rights Watch” beynəlxalq hüquq-müdafiə təşkilatı öz hesabatında Azərbaycan hökumətini tənqid edərək, bu ölkədə müxalifətçilərin qondarma narkotik ittihamıyla həbs olunaraq işgəncələrə məruz qaldığını açıqlayıb.
Azərbaycanda atası Heydər Əliyevin ölümündən sonra 2003-cü ildə prezident olan Ilham Əliyev 10 illik hakimiyyətini davam etdirmək üçün müxalifətçiləri yalan ittihamlarla həbs etdirərək susdurmaqda günahlandırılır. “Human Rights Watch” Əliyevin oktyabr ayında keçiriləcək prezident seçkimi öncəsi onu açıq şəkildə tənqid edən fəal gəncləri saxta narkotik ittihamıyla həbs elətdirdiyini açıqlayıb.
Dindarı belə həbs elədilər
Təşkilatın yaydığı məlumata görə, iki ay ərzində 4 nəfər müxalifətçi eyni üsulla həbsxanaya göndərilib. Əvvəlcə martın 7-də “NIDA” Vətəndaş Hərəkatının üzvü, 21 yaşlı Məhəmməd Əzizov narkotik saxlamaq və satmaq ittihamıyla həbs olundu. Ardınca “facebook”da hökuməti tənqid edən bir yazı qələmə alan 22 yaşlı Daşqın Məlikov martın 26-da eyni şəkildə narkotik saxlamaqda ittiham olunaraq həbs edildi. Universitetdə ilahiyyat fakültəsinin müəllimi olan 31 yaşlı Taleh Bağırzadə yenə narkotik ittihamıyla həbs olundu. Əliyev hakimiyyəti mayın 9-da 31 yaşlı müxalif blogger Rəşad Ramazanovu da eyni səbəblə həbs elədi.
Istintaqda işgəncə
“Human Rights Watch”ın Cənubi Qafqaz üzrə nümayəndəsi Georgi Qogia bildirib ki, adları çəkilən dörd fəaldan üçü dindirmə zamanı ağır işgəncələrə məruz qalıb: “Həbs olunurlar və üzərlərindən müəyyən miqdarda narkotik çıxır… Bu həbslər seçki öncəsi hökumətin tənqidlərin qarşısını necə aldığının göstəricisidir. Bu həbslər və həbs olunanlara verilən işgəncələr müxalifətçi olmaq, hökumətə etiraz etmək istəyənlərə mesaj vermək məqsədi güdür”.
Azərbaycan mətbuatı isə narkotik ittihamıyla həbs olunan müxalifətçilərin sayının 7 nəfər olduğunu bildirir. Məhkəmə qarşısına çıxarılan müxalifətçilər isə bu ittihamları rədd edir. Barələrində həbs-qətimkan tədbirinin dəyişdirilməsi haqda müraciətləri qəbul olunmayan və həbsdə saxlanılmaqda davam edən müxalifətçiləri indi 5 ilə qədər həbs cəzası gözləyir.
Azərbaycanda insan hüquqları sahəsindəki vəziyyətlə əlaqədar pis imicə malik olan Əliyev hökuməti mütəmadi olaraq, beynəlxalq hüquq-müdafiə təşkilatları tərəfindən tənqid olunur.
“Human Rights Watch”ın hesabatının ardından Avropa Şurasının insan haqları komissarı Nils Mujneks rəsmi Bakıya siyasi məhbusların qısa müddətdə azadlığa buraxılması haqda çağırış edib.
İnformasiya şöbəsi
