Növbəti beş ildə daha nələr olacaq?
Ilham Əliyev deyib ki, beş ilə Azərbaycanda heç bir problem qalmayacaq. Bu bəyanat bir çox dairələrdə fərqli yozuldu. Əlbəttə, dövlət başçısı olan bir şəxsin belə bir bəyanatla çıxış etməsi həm də xeyli dərəcədə qeyri-ciddi mənzərə yaradır. Əvvəla, problemləri “həll etmək”lə “ləğv etmək” arasında kifayət qədər fərq var. Ümumiyyətlə isə bütün problemlərin həllindən danışmaq inandırıcı səslənmir. Təkcə ona görə yox ki, bu mümkün deyil. Həm də ona görə ki, Ilham Əliyev bütün ölkəni özünün və yaxınlarının adına sənədləşdirdiyindən bu istiqamətdə həvəsli görünmür.
Rifah səviyyəsinə görə dünyanın ən öndə gedən ölkələrinin strateqləri belə, Ilham Əliyev kimi qəti bəyanatlar vermir. Ona görə yox ki, onlar Ilham Əliyevdən acizdilər. Ona görə ki, ciddi siyasi xadimlər bilirlər ki, problem olmadığı yer insan olmayan yerdir. Bu mənada, Ilham Əliyevin bəyanatından iki mühüm nəticə çıxarmaq olar. Bunların birincisi isə Ilham Əliyevin ürəyində tutduğu ola bilər…
Mane olmaq məhv olmaqdır
Azərbaycanda rəsmi siyasətin qeyri-rəsmi çalarları da hakim ailənin maraqlarına uzlaşdırılır, onlarla eyni rəngdən doğur. Görünür, Ilham Əliyev yaxın beş ildə ona mane olan hər şeyi yox edəcəyini planlaşdırır. Yadınızdadırsa, o, vaxtilə belə bir bəyanat da vermişdi ki, 2008-ci ilə kimi Azərbaycanda müxalifət qalmayacaq. Sonra isə hər kəsi sıradan çıxarmaq üçün əlindən gələni etdi – siyasi partiyaları ofisindən çıxartdırdı, aparıcı siyasi liderin ümumvətəndaşlıq pasportu əlindən alındı… Amma nəticədə bütün ölkə görünməmiş bir müxalifətə çevrildi. Narazılıq dalğası bütün Azərbaycanı bürüdü. Iki rayonda xalq üsyanı oldu, yerli hakimiyyət dəyişdirildi.
Görünür, Ilham Əliyev bu nəticələri təhlil etmədiyindən, növbəti bəyanatı verməkdən özünü saxlaya bilməyib. Amma başqa bir məsələ də var ki, bu cür bəyanatlar siyasi isterikadan doğur. Hazırda hakimiyyət üçün problemlər saysız həddə çox olduğu üçün o, isterik olaraq, bütün problemləri həll edəcəyini dilə gətirir. Məqsəd isə hakimiyyətin üz-üzə qaldığı gərginliyi azaltmaqdır. Amma özü də bilmədən elə tonda “qorxmuram” deyir ki, qorxduğunu açıq-aşkar biruzə verir.
Belə vəziyyətlərdə əlbəttə, məntiqli bir izah vermək politoloji cəhətdən çətindir. Amma görünür ki, hadisələrin politoloji mahiyyətindən daha çox patologiya həddi daha həlledicidir. Indi Azərbaycanın taleyinə Ilham Əliyevin siyasi bacarıqları və ya siyasi planları deyil, onun baş verən hadisələrə yanaşarkən əsəblərinin nə yerdə olması daha çox təsir edir. Bütün hallarda, Ilham Əliyevin verdiyi bu bəyanatın daşıdığı plan yükü odur ki, o, hər kəsi sıradan çıxarmağı və məhv etməyi planlaşdırır.
Xalqın problemləri həll olunsa…
Ilham Əliyevin bəyanatına bir də Azərbaycan xalqının gözləntiləri kontekstindən yanaşaq. Bu o deməkdir ki, növbəti beş ildə rüşvət olmayacaq, korrupsiyanın kökü kəsiləcək. Seçkilər saxtalaşdırılmayacaq. Iş adamlarının yaxınlarını həbs edib, onları soymayacaqlar. Bütün parklar, xiyabanlar Heydər Əliyevin heykəllərilə bəzədilməyəcək. Qızıl mədənləri Azərbaycan xalqına qaytarılacaq. Offşor zonalardakı pullar xalqımızın gələcəyinə sərf ediləcək. Məktəblərdə fond pulu yığılmayacaq, körpə uşaqlar rüşvət alıb-vermək üzrə “master dərslər” almayacaqlar. Gədəbəydən, Lənkərandan, Zaqataladan insanlar öz əməklərinin bəhrəsini Bakıya satmağa gətirərkən Nəqliyyat Nazirliyinin qoçuları tərəfindən soyulmayacaqlar. Atalar, analar övladlarının qarşısında gözükölgəli olmayacaqlar. Insanlar çox sadə haqlarını təmin etmək üçün savaşmayacaqlar. Bir sözlə, Ilham Əliyev olmayacaq!
Seymur Həzi
