“Görünür, onların bizi güdməkdən başqa görəcək işləri yoxdur”
“Bu, Naxçıvan MTN-inin muxtar respublikada fəaliyyət göstərən jurnalistlərə qarşı ilk böhtanı deyil. Dəfələrlə belə şər və böhtanlarla üzləşmişik. Görünür onların bizlə məşğul olmaqdan başqa görəcək işləri yoxdur”. Bu sözləri Naxçıvanda fəaliyyət göstərən jurnalist, hüquq müdafiəçisi Məlahət Nəsibova Naxçıvan MTN-inin son açıqlamasına münasibətində deyib.
Xatırladaq ki, həmin məlumat Turac Zeynalovun ölümü ilə bağlı açıqlamalar verən İbrahim Musayevlə bağlı yayılmışdı. Orada M.Nəsibova ilə də bağlı məqam yer almışdı: “Gülnar Ağayeva Naxçıvan MTN-inə ərizə ilə müraciət edərək bildirib ki, mərhum həyat yoldaşı Turac Zeynalovun ölümü ilə əlaqədar Bakı şəhərində olarkən telefonuna naməlum nömrədən zəng gəlib və özünü qeyri-hökumət təşkilatının hüquqşünası kimi təqdim edən şəxs ona hüquqlarının qorunmasında yaxından köməklik göstərmək istədiyini bildirib. Həmin şəxs Gülnar Ağayevanın etibarını qazanmaq və özünü imkanlı bir şəxs kimi göstərmək məqsədi ilə “Dəmirbank”ın əməkdaşı olduğunu da deyib. Gülnar Ağayeva bu şəxsin sonradan əslində İbrahim Musayev olduğunu öyrənib. İbrahim Musayev sonrakı müddətdə Gülnar Ağayevaya Naxçıvan Muxtar Respublikasında fəaliyyət göstərən Demokratiyaya Dəstək və İnsan Hüquqları Resurs Mərkəzinin sədri Məlahət Nəsibova ilə birgə çalışdığını, sonuncunun xarici təşkilat və ölkələrdən külli miqdarda qrantlar aldığını bildirib, adıçəkilən QHT rəhbərinə köməklik etməklə Milli Təhlükəsizlik Nazirliyini birgə şantaj edib çoxlu pul qazanmaq, xarici səfirlik və nümayəndəliklərlə görüşlər keçirib, gələcəkdə Avropa ölkələrinin birində siyasi sığınacaq ala biləcəklərini vəd edib”.
M.Nəsibova təəssüf edir ki, Naxçıvan MTN-i strateji əhəmiyyətə malik olan region üçün gərgin işləməkdənsə, onları güdməklə məşğuldur: “Heyfslənirəm. Ancaq bir şeyi unutmamalıdılar biz bu torpaqlarda doğulub böyümüşük və təhdidlərə, böhtanlara baxmayaraq Naxçıvandayıq. Bizim məqsədimiz həmvətənlərimizin azad, müstəqil və təhlükəsiz yaşamasıdır. Və bu yöndə də mübarizəmizi davam etdirəcəyik. Onların nə yazıb və nə deməkləri önəmli deyil. Cəmiyyət özü ağı qaradan seçməyi bilir”.
