Əli Kərimli “Qarabağ bloku”nun təşəbbüsülə keçirilən toplantı barədə yayılan xəbərə münasibət bildirdi
“Qarabağ bloku”nun təşəbbüsü ilə keçirilən bu görüşü İsa bəylə müzakirə etmişdik. O, da həmin görüşə dəvət olunmuşdu. Lakin hansısa səbəbdən qatılmadı”.
Bu sözləri “Azadlıq”a AXCP sədri Əli Kərimli “Asiman” restoranında siyasi partiyaların görüş keçirməsilə bağlı yayılan məlumata münasibət bildirərkən deyib. Məlumatı müsavat.com saytı yayıb və görüşü Müsavat Partiyasına, İctimai Palataya münasibətdə separatçılıq kimi dəyərləndirib. Bu qənaətə Müsavat Partiyası təmsilçisinin görüşdə iştirak etmədiyinə görə gəlinib. Xəbərdə həmçinin iddia edilib ki, görüşlə bağlı İctimai Palatanın Koordinasiya Şurası məlumatlandırılmayıb.
Əli Kərimli məlumatın bu cür təqdim edilməsindən təəccübləndiyini deyib: “Belə bir görüş bundan əvvəl də olub. Həmin görüşdə İsa bəy də iştirak edib. Bu görüş barədə də İsa bəy məlumatlı olub. Digər tərəfdən mənim mövqeyim hər kəsə bəllidir. Mən İctimai Palatanı müxalifətin ən uğurlu birlik formatı hesab edirəm. Eyni zamanda İctimai Palatadan kənarda olan demokratik qüvvələrlə də əməkdaşlıq yollarının tapılmasının və daha geniş əməkdaşlığın tərəfdarıyam. Bu əməkdaşlıqda Müsavat Partiyasının kənarda qalmasının əleyhinəyəm. Çünki biz geniş birlik istəyiriksə, Müsavat Partiyasının iştirakı olmadan bu birlik tam hesab oluna bilməz. Ona görə də “Qarabağ bloku”nun təşəbbüsü ilə keçirilən görüşün bu sayaq təqdim edilməsi, təhrif olunması doğru deyil və təəssüf doğurur”.
