Əli Kərimli: “Zorakı rejimə qarşı aparılan bu mərd mübarizə Azərbaycan xalqının gerçək qurtuluşu ilə nəticələnəcək”
İsa Qəmbər: “Hakimiyyət xalqdan, müxalifətdən nə qədər qorxduğunu növbəti dəfə sübut etmiş oldu”
“10 dekabr Beynəlxalq İnsan Haqları Günündə İctimai Palatanın fəalları, cəbhəçilər, müsavatçılar və digər partiyalardan olan dostlarımız uğurlu aksiya keçirdilər”. Bunu İctimai Palatanın Koordinasiya Şurasının üzvü, AXCP sədri Əli Kərimli dünənki aksiyanı qiymətləndirərkən deyib: “Aksiyada iştirak edən fəallar siyasi məhbusların azad edilməsini tələb etdilər, insan haqlarının pozulmasına etiraz etdilər, saxta parlamentin buraxılması tələbini səsləndirdilər. Baxmayaraq ki, dekabrın 10-da bütün dünyada insan haqlarının qorunması günü kimi qeyd olunur, amma Azərbaycan hakimiyyəti hətta bu gündə də nümayişçilərlə olduqca qəddar davrandı. Yüzdən artıq insan həbs olundu, bir çoxlarına açıq-aşkar zorakılıq göstərildi. Azərbaycan hakimiyyəti öz mahiyyətinə sadiqdir və sivil mübarizədən kənar olduğunu nümayiş etdirir. Amma Azərbaycan xalqı və İctimai Palatanın fəalları öz mövqeyində israrlıdırlar. Onlar rejimin bütün zorakılıqlarına baxmayaraq insan haqlarını, azadlığı müdafiə etməkdə qərarlılıq göstərirlər”.
Ə.Kərimli bir gün bu mübarizənin Azərbaycan xalqının gerçək qurtuluşu ilə nəticələnəcəyini bildirir: “Mən bu gün bu zorakı rejimlə mərdi-mərdanə, dinc mübarizə aparan yüzlərlə fəala öz təşəkkürümü bildirirəm. Onların apardıqları bu mübarizə Azərbaycan xalqını azadlığa və demokratiyaya ciddi şəkildə yaxınlaşdırır”.
Müsavat başqanı İsa Qəmbər hesab edir ki, aksiyanın məqsədi bütün dünyanın İnsan Haqları Gününü qeyd etdiyi vaxtda Azərbaycanda bu sahədəki vəziyyətə diqqət çəkmək idi: “Məhz buna görə də şüarlar siyasi məhbusların azad edilməsi, sərbəst toplaşmaq azadlığının bərqərar olunması, söz və mətbuat azadlığının təmin edilməsi, saxta parlamentin buraxılması v s. ilə bağlı idi. Yüzlərlə insan – əsasən İctimai Palatanın üzvləri, müsavatçılar, cəbhəçilər, eyni zamanda ADP üzvləri çox böyük fədakarlıq göstərdilər. Hakimiyyət həmişə olduğu kimi qanunu, Konstitusiyanı pozaraq dinc aksiyanın keçirilməsinə müqavimət göstərdi, dinc insanlara qarşı zorakılıq tətbiq etdi, yüzlərlə insan həbs edildi. Hakimiyyət növbəti dəfə xalqdan, cəmiyyətdən, İctimai Palatadan, müxalifətdən nə qədər qorxduğunu sübut etmiş oldu. Hesab edirəm ki, demokratik qüvvələr, İctimai Palata bir daha uğurlu bir aksiya keçirdilər. Həm ölkə ictimaiyyətinin, həm beynəlxalq ictimaiyyətin diqqətini Azərbaycanda insan hüquqlarının necə kobud şəkildə pozulmasına cəlb edə bildilər”.
