Təhmasib Novruzov özü haqda ittihamlara cavab verib
MTN-in 2006-cı ildə AXCP sədri Əli Kərimliyə sui-qəsd hazırladığı və bu işdə Təhmasib Novruzovun rol aldığı haqda 7 saylı ciddi rejimli kalonda cəza çəkən əlbəyaxa döyüş növü üzrə üçqat dünya çempionu Bəhlul Muradovun mediada yayılan məktubuna Novruzov münasibət bildirib. Xatırladaq ki, məktub əvvəlcə göndərildiyi “Millətim” qəzetində dərc olunub, sonra isə ölkə mediasında tirajlanıb.
T.Novruzov “Azadlıq”a açıqlamasında yazılanların həqiqəti əks etdirmədiyini iddia edib. O xüsusilə Əli Kərimli ilə bağlı məqama toxunub: “Mən ictimai birlik sədriyəm, Əli bəy isə hakimiyyətlə mübarizə aparan müxalif partiya sədridir. Mənim Əli bəylə hansı problemim ola bilər ki, ona qarşı hansısa provaksiya təşkil edim, ya da onu öldürmək tapşırığı verim?! Məgər mən anlamıram ki, Əli Kərimli siyasi fiqurdur və ona qarşı bu cür addımın dünya miqyasında rezonansı olacaq?! Bunu yazan adam dəfələrlə dələduzluğa görə həbs olunub. O vaxt onu hörmətli şəxslər mənim yanıma gətirdilər. Dedilər ki, döyüşçü olub, idmançıdır və s. Biz də onu gənclər birliyinə cəlb etdik. Amma bu adam dələduzluq əməllərində əl çəkmədi. Sonda da bəlli oldu ki, xeyli adama pul atıb və buna görə də həbs edildi. Onun həbsindən mənə nə?! Əksinə mən onun həbs edilməməsinə çalışmışam. Ailəsi də bunu bilir. Indi bilmirəm həbsxanada onun yanında kim var kim yox, bu böhtan necə ortalığa çıxıb. Sizə tam səmimi deyirəm ki, mən onu həyat yoldaşına zəng vurub dedim ki, Bəhlul bu nə qələtdir edib. Elə belə də dedim. O da cavab verdi ki, Bəhlul bunu yaza bilməz. Çünki onu “paralic” vurub”.
Təhmasib Novruzov əlavə edib ki, bu məsələ ilə bağlı məhkəməyə müraciət edəcək: “Mən bununla bağlı bəyanat hazırlamışam yayacam. Bundan başqa məhkəməyə müraciət edib. Bu məsələlərin araşdırılmasını tələb edəcəm. Bu cür ağır ittihamlara görə məni öldürsünlər. Demə mən adam döydürürmüşəm, adam öldürməyi tapşırırmışam. Məni tanıyanlar bilir ki, mən siyasi və hüquqi müstəvidə mübarizə aparıram. Adam döydürmək və s. bu kimi işlər mənim xarakterimə yaddır. O zaman da belə bir şey yazılmışdı. Mən məhkəməyə müraciət etdim. Bunu yazan “Millətim” və “Nota Bene” qəzeti redaktorları həbs olundu. Indi də çalışacam ki, bu məsələ məhkəmə müstəvisində araşdırılsın”.
