Prezident Administrasiyasının dörd müavinli rəhbəri, çox hörmətli akademik Ramiz Mehdiyev Elşad Abdullayevin onunla bağlı sensasiyalı yazısını cavablandırmaqla yalanın ayaq tutub yeriməsinə imkan vermədi, dərhal qabaqlayıcı tədbir gördü və bizləri xeyli şad elədi.
Amma Ramiz Mehdiyevdən daha tutarlı və sarsıdıcı cavab gözləyən bizlər çox yox, bir balaca yanıldıq. Çünki çox hörmətli dörd müavinli akademik öz cavabı ilə bir sıra suallara və xarakterik xüsusiyyətlərinə aydınlıq gətirmiş oldu ki, bu, heç də onun ictimai statusuna müsbət ştrixlər əlavə etmir.
Başlayaq ondan ki, Ramiz Mehdiyev Elşad Abdullayevin “nüfuzlu şəxsdən yalvar-yaxar” etməsinin nəticəsi olaraq onu qəbul etdiyini dedi.
Təsəvvür etdinizmi? Bir ölkənin universitet rektorunu həmin ölkənin Prezident Administrasiyasının rəhbəri qəbul etmək istəmirmiş. Məcburiyyət qarşısında qəbul etdikdə isə onu qapı ağzında, ayaq üstə saxlayıbmış…
Kimliyindən asılı olmayaraq, otağına gələni ayaq üstə saxlamamaq və onun sözünü dinləmək ilk olaraq hərtərəfli təsəvvürün yaranması üçün vəzifənin diqtə etdiyi tələbdir, ikinci isə sırf mədəniyyət məsələsidir. Neyləmək olar, görünür, hörmətli akademiki təkcə hərtərəfli informasiyadan doğru nəticə çıxarmağa meylli olan vəzifə sahibi kimi yox, həm də həddən artıq təvazökar, sadə və yüksək könül sahibi kimi xarakterizə etməkdə ciddi çətinliklərimiz yaranır.
Ikincisi, Ramiz Mehdiyev Elşad Abdullayevin şəxsiyyətinin hansı durumda olduğunu müəyyənləşdirmək üçün onun “yüzlərlə gəncə saxta diplom verməsini, valideynləri dələduzluqla aldatmasını” ön plana çəkir.
Bu sözlərin qarşısında Ramiz Mehdiyevə nəinki hansısa irad bildirmək olar, əksinə, təşəkkür etmək düşür – əlbəttə ki, dəyərli akademik bu haqlı və ədalətli etirafının doğurduğu suallara da cavab versəydi…
Azərbaycan Beynəlxalq Universiteti 1996-cı ildə San Marinonun nəzdində yaradılıb və yarandığı gündən də ölkədə diplom satmaqla, dələduzluqla məşğul olub – ta 2010-cu ilə qədər. Görəsən, 14 il müddətində Korrupsiyaya Qarşı Mübarizə üzrə Komissiyanın sədri Ramiz Mehdiyev niyə bircə dəfə də olsun, ABU və Elşad Abdullayevin əməlləri haqqında heç nə deməyib, bu dələduzun həbsi üçün öz yüksək mənsəbindən və vəzifəsinin verdiyi səlahiyyətlərdən istifadə etməyib?
Hətta ABU-su bağlanıb, özü quru yurdda qalan Elşad Abdullayev ölkədən gedənə və bəs-bəlli videoları yayana qədər onun dələduzluqla məşğul olması ilə bağlı cinayət işi qaldırılmamışdı. Niyə?
Əgər Anti-korrupsiya Komissiyası ABU-dakı korrupsiyadan və saxtakarlıqdan xəbərdar deyildisə, onda Ramiz Mehdiyevin vəzifəsinin öhdəsindən gəlmədiyini, ətrafındakıların onu xəbiscəsinə aldatdığını düşünməliyik; yox, xəbərdar idisə, ancaq tədbir görmürdüsə, onda Ramiz Mehdiyevin məsuliyyətinin daha ağır olduğunu düşünməliyik.
Görəsən, hörmətli akademik bunlara nə vaxt aydınlıq gətirəcək?
Üçüncüsü, Elşad Abdullayev Ramiz Mehdiyevlə görüşəndən sonra “deputatlığın pul işinə baxan” Gülər Əhmədova və Sevinc Babayevə ilə alver etdiyini, Alı Qocayevlə görüşdüyünü deyir və… ikincinin videosunu yayacağını bəyan edir – birincinin görüntüsünü artıq yayıb! Vəd edilən video üzə çıxsa və Gülər Əhmədova kimi, Alı Qocayev də “alverin” Ramiz Mehdiyevin adı ilə bağlı olduğunu dolayısıyla açıqlasa, onda nə olacaq? Görəsən, ona da “dələduz” deyib, sonra sözlərini dəbbələyəcək və bütün nəzərləri yenə də Ramiz müəllimin təmiz, halal, aydan arı-sudan duru adının üstünə yönəldəcəklərmi?
Yeri gəlmişkən, hörmətli Ramiz Mehdiyevin Şah Ismayılla bağlı ilk dəfədir (!) bəyəndiyim elmi yazısına seçdiyi epiqrafın (Şahın vəsiyyəti) Əzizə Cəfərzadənin bədii təxəyyülünün məhsulu olduğunu bilməməsi və bunu tarixi həqiqət kimi qəbul edib, məqaləni onun üstündə qurması hörmətli akademikin elmi biliklərinə də kölgə salmaqdadır…
Nəsə, dəyərli və qocaman akademikin son vaxtlar işləri heç gətirmir: bir tərəfdən 4 müavin təyinatı ilə hakimiyyətdəki mövqeyinə, o biri tərəfdən Elşad Abdullayev vasitəsilə təmiz və halal adına, lap o biri tərəfdən isə çox gərəkli və məqamında yazılmış elmi məqaləsinə qeyri-elmi epiqraf dürtüşdürməklə “geniş savadı haqqında ümumxalq rəyinə” balta çalırlar.
Axx, nankorlar, heç olmasa, adamın savadı və elmi qabiliyyəti ilə işiniz olmasın!
Bu nankorlar Ramiz Mehdiyevdən nə istəyirlər?
•
