Nəqliyyat naziri monopoliyasını genişləndirmək üçün özəl marşrutları sıradan çıxarır
Nəqliyyatın Intelektual Idarəetmə Mərkəzi (NIIM) bağlanan marşrutların siyahısını açıqlayıb. Mərkəzdən Modern.az-a verilən məlumatda bildirilib ki, Bakı şəhərində bağlanan avtobus marşrutların siyahısı artıq hazırdır.
Siyahıda bu xətlərdə işləyən nəqliyyat vasitələrinin nömrələri var: 4, 7, 19, 27, 34, 41, 58, 63, 68, 72, 74, 89, 112, 114, 117, 138, 178, 180, 182, 203, 206.
“Azadlıq”a daxil olan məlumatlara görə isə əslində bu, nəqliyyat naziri Ziya Məmmədovun bu sahəni tam monopoliyaya götürməsi üçün düşünlmüş addımdır. Məsələ burasındadır ki, bundan əvvəl də bir neçə xətt bağlanmışdı. Lakin bir müddət keçdikdən sonra həmin xətlərdə Ziya Məmmədovun oğlu Anar Məmmədovun rəhbərlik etdiyi “Transqeyt” şirkətinin avtobusları görünməyə başladı. Güman ki, bir qədər keçəndən sonra yuxarıda sadalanan xətlərə də “Transqeyt”in avtobusları buraxılacaq.
Ziya Məmmədov nəqliyyat sahəsində monopoliyanı genişləndirməklə həm də “yuxarılar”ın bu sektora daha çox diqqət yetirməsinə səbəb olub. Məlumatlara görə, nəqliyyat sahəsində vahid kart sisteminin tətbiq olunması məsələsi bununla bağlıdır. Bildirilir ki, Ziya Məmmədovdan qısa müddətdə vahid kart sisteminə keçilməsinin təmin etmək tapşırılıb. Nəqliyyat naziri isə müxtəlif bəhanələrlə hələ ki, bu işi yubadır. Çünki vahid kart sisteminə keçid nəqliyyat sahəsində dövr edən pulun real məbləğini bilmək üçün “yuxarılar”in işini asanlaşdıracaq.
Azad
