“Bəzi dar düşüncəli və bəsirətsiz adamların hiylə, kələk və fitnələrinə baxmayaraq münasibətimiz çox yaxşıdı”
“Hakimiyyətə yaxın nəşrlərin birində təxribatçı məqalə hazırlanır və məni kriminal aləmlə əlaqədə günahlandırmaq istəyirlər”
Hakimiyyətə yaxın KİV-də Rusiyada yaranan «Milyarderlər İttifaqı»na qarşı ittiham kampaniyası səngimək bilmir. Artıq sosial şəbəkələrdə də bu tip məlumatlara rast gəlmək olur. Belə ki, «Facebook» sosial şəbəkəsində hakimiyyətə yaxınlığı ilə seçilən KİV və QHT-in nümayəndələri «AzərRos» prezidenti Söyün Sadıqovun ünvanına ittihamlar səsləndirib.
Onların yaydığı məlumata görə, «Milyarderlər İttifaqı»nın üzvləri Söyün Sadıqovu Telman İsmayılovun ofisinə çağıraraq ona qarşı iradlarını bildiriblər. Təşkilat üzvləri məhz Söyün Sadıqova görə onların Azərbaycan hakimiyyəti ilə münasibətlərinin korlandığını əsas gətirərək «AzərRos» prezidentindən onlardan uzaqlaşmağı tələb ediblər. Həmçinin bəzi KİV-də S.Sadıqovun katibəsinin, sürücüsünün və mühasibinin erməni olması barədə də məlumatlar yayılıb. Bu xəbərlərin nə dərəcədə həqiqət olub-olmadığını öyrənmək üçün Söyün Sadıqova müraciət etdik.
«Azadlıq»a göndərdiyi açıqlamasında Söyün Sadıqov bunları deyib:
“Mənimlə RATİ həmtəsisçiləri arasında heç bir ziddiyyət və fikir ayrılığı yoxdur”
Azərbaycan KİV-də, indi isə sosial şəbəkələrdə mənin və RATİ həmtəsisçiləri barədə peyda olan məlumatların çoxu məni artıq təəccübləndirmir. Bəzilərinin arzu etdiklərini həqiqət kimi qələmə verməklə kiməsə yarınmaq üçün etdiyi cəhd təbəssüm doğurur. Əgər onlar bununla rahat olacaqlarsa, qoy əylənsinlər. Həqiqət isə belədir: mənimlə RATİ həmtəsisçiləri arasında heç bir ziddiyyət və fikir ayrılığı yoxdur. Bizim əvvəlki tək olduqca yaxşı və isti münasibətlərimiz var. Bizim yaratdığımız təşkilat bəzi dar düşüncəli və bəsirətsiz adamların hiylə, kələk və fitnələrinə baxmayaraq yaşayacaq və fəal işləyəcək. RATİ-nin əsas təsisçisi AzərRos AFMK-dı. Bir çox hallarda Azərbaycan kütləvi informasiya vasitələrində çıxan məlumatlar ilk növbədə ictimaiyyəti aldatmaq və Rusiya Azərbaycan Təşkilatları İttifaqını nüfuzdan salmağa yönəlib. Siz RATİ və onun təsisçiləri barədə «Salam News» və «Azadlıq»da dərc edilən məlumatlara etibar edə bilərsiniz. Təəssüf ki, digər nəşrlərdə bir çox səbəbdən maraqlı şəxslərin göstərişi ilə hazırlanan məlumatlar ya ziddiyyətlidir ya da yalandı. Etibarlı mənbələrdən mənə məlum olub ki, hakimiyyətə yaxın nəşrlərin birində təxribatçı məqalə hazırlanır və məni kriminal aləmlə əlaqədə günahlandırmaq istəyirlər. Məsələ bundadır ki, var-dövləti və hakimiyyətə təmiz yolla əəldə etməyən bu məqalənin sifarişçiləri elə düşünürlər ki, ətrafdakıların hamısı onlar kimi əxlaqsız və murdardılar. Xoşbəxtlikdən bu belə deyil.
“Azərbaycan siyasətçiləri respublikada 20-30 min erməninin yaşadığı ilə öyünürlər”
Yanımda ermənilərin işləməsinə və bunun mənim digər millətlərin nümayəndəsinə münasibətimə təsir etməsinə gəldikdə, rəhbərlik etdiyim kollektivlərdə müxtəlif xalqların nümayəndələri çalışır. Onlar özlərini çox rahat hiss edir, buna da çox şadam. Qeyd etmək istəyirəm ki, mən adamları milli, sosial, dini və cinsi mənsubiyyətindən asılı olmayaraq yaxşılara və pislərə bölürəm. Dostluqda da bunu əsas tuturam. İnsanları onların insani, işgüzar və professional keyfiyyətinə görə qiymətləndirirəm. Bu məsələyə toxunanlar isə çox güman ki, həyatda beynəlxalq ictimaiyyətin qəbul etdiyi prinsipləri deyil, tamam başqa prinsipləri əsas götürürlər. Buna görə də onlar mağara dünya görüşünə malik olduqlarına görə özlərini sivil insan saya bilməz. Azərbaycan siyasətçiləri tez-tez dünyaya hazırda respublikada 20-30 min erməninin yaşadığını xatırladırlar və onların, yəni ermənilərin dini, etnik dözümsüzlüklə üzləşmədiyi ilə öyünürlər, baxmayaraq ki, ölkə Ermənistanla müharibə vəziyyətindədir. Həqiqətən də bu Azərbaycan xalqının tolerantlığı və müdrikliyindən xəbər verir. Əgər həqiqətən də mənim yanımda ermənilər işləsəydi, bu cinayət və əxlaqsız hərəkət olardı?! İndi özünüz nəticə çıxarın: bu insanlar məni «bağışlanmaz» günahda ittiham etməklə nəyə nail olmaq istəyirlər.
Fizzə
