TQDK sədrinin sürücüsü vətəndaşın maşınını əlindən alaraq qaytarmır, özünü isə hədələyir
“Tələbə Qəbulu Üzrə Dövlət Komitəsinin rəhbəri Məleykə Abbaszadənin Ramin adlı sürücüsü mənə məxsus maşını ələ keçirərək qaytarmır”. Bunu “Azadlıq”a Bakı sakini Elçin Əliyev deyib. Onun sözlərinə görə, Məleykə Abbaszadənin sürücüsü ilə tanış olub: “Mən 90 ET 005 dövlət nömrə nişanlı ”Prado-Leksus” markalı avtomobilimi satırdım. Ramin də bildirdi ki, o maşını almaq istəyir. Mən maşını kreditlə almışam.
Maşın “Əmrah Bank”da girovluqdadır. Raminlə belə razılaşdıq ki, 15 min özümə verəcək və banka olan borcu ödəyəcək. O, maşını götürərək bir həftəyə pulumu verəcəyini bildirdi. Lakin artıq neçə aydır ki, nə pulu verir, nə də maşını qaytarır. Maşını da sənədsiz sürür. Çünki mən ona etibarnamə verməmişəm. Deyir, Məleykə Abbaszadənin sürücüsü olduğuma görə mənə heç kim heç nə edə bilməz”.
Elçin Əliyevin sözlərinə görə, bir neçə dəfə maşını almağa cəhd edib. Lakin TQDK sədrinin sürücüsünün hədələri ilə üzləşib: “Məni Məleykə Abbaszadənin adı ilə hədələyir. Deyir get nə istəyirsən elə, mənim arxamda Məleykə Abbaszadə dayanıb. Faktiki olaraq maşınımı əlimdən alıb, vermir”.
Elçin Əliyev bu məsələ ilə bağlı indiyə qədər hüquq-mühafizə orqanlarına müraciət etməməyinin səbəbini də Məleykə Abbaszadə faktoru ilə izah edir: “Açığı ehtiyat edirdim. Düşünürdüm ki, hüquq-mühafizə orqanlarına müraciət edəcəyim təqdirdə qarşı tərəfdən mənə qarşı ciddi təzyiqlər ediləcək. Lakin sonradan fikirləşdim ki, bu məsələni ictimailəşdirim. Məsələnin ictimailəşməsi mənim sığortamdır. Indi mənimlə bağlı nə baş verərsə, məsuliyyət Məleykə Abbaszadə və onun sürücüsünün üzərində qalacaq. Bu məsələ ictimailəşəndən sonra isə hüquq-mühafizə orqanlarına şikayət edəcəm. Mənə bəlli deyil ki, Məleykə xanım bu məsələdən nə qədər xəbərdardır. Əgər xəbərdar deyilsə, mətbuatdan oxuyub baş verənlərdən agah olar. Ümid edirəm ki, o, bu məsələnin dərinləşməsinə yol verməz və sürücüsünün qanunsuz əməli ilə bağlı tədbir görər. Mən artıq heç nə istəmirəm, maşınımı qaytarsınlar”.
Mövzunu diqqətdə saxlayacağıq.
Azad
